1Jisasi'a mago'ane zmasamino, tamage hu'na neramasmue, amafi otiza mni'naza vahepintira, ofri mani'ne'za Anumzamofo kumamo'a hanave'ane esige'za kegahaze.
26si'a zagegna evutegeno, Jisasi'a, Pitama, Jemisima, Jonikizmia zmavreno za'za agonafi mareriza zamagrake umani'ne'za, negageno avufagamo'a rukrehe huno ruzahe nehigeno,
3kukena'amo efe anentake huno tampre tampre hu'ne. Mopafina kukena sese nehigeno e'inahukna efenentake nosiaza huno efenentake hu'ne.
4Hagi Ilaija'a Mosesi'ene zmavuga efore huke Jisasi'ene naneke hu'naze.
5Ana higeno Pita'a anage huno Jisasina asami'ne, Hurami' nemoke, knare amafina mani'none. Hagi tagufa tona nona kigahune, mago nona Kagriki, mago nona Mosesinki, mago nona Ilaijanki huta kigahune.
6Na'ankure zmagra tusi koro nehazageno, na'ane naneke hugahie, Pita'a ontahineno ana kea hu'ne.
7Anante hampomo refitenezmantegeno, mago agerumo amanage ana hampopinti hu'ne, ama'i tusiza hu'na navesima nentoa Mofavreni'e. Agrama hania kea antahi amiho!
8Keganti kegma hu'za kazana, ame huke Moseke Ilaijake omninakeno, Jisasi Agrake mani'nege'za ke'naze.
9Zamagrama agonaregati magoka eneramizageno hanave ke zmasamino, ke'naza zana vahera ozmasamitfa hu'nenkeno, Vahe'mofo Mofavremo'a, fripinti otiteno hu'ne.
10Zamagra'a fritena otitanenoma hia nanekema nentahiza, na agu'agesare nehie hu'za hu'naze.
11Anante zmagra Jisasina anage hu'za antahige'naze, na'a hige'za kasegere ugagota hu'naza vahe'mo'za, hu'za Ilaija'a etenkeno'e hu'za nehaze?
12Jisasi'a anage huno zmasami'ne, Tamage Ilaija ko eno maka'zama haviza hu'neazana eriso'e hu'ne. Hagi na'a higeno avontafepina krenteno, Vahe'mofo Mofavremo'a rama'a ataza erina, vahe'mo'za zamefi humigahaze hu'ne?
13Hianagi anage hu'na neramasamue, Ilaija'a ko' ehanatige'za nanknazama hunte'nakuma haza'zana avon tafepima kre'nea kante ante'za maka'zana hunte'naze.
14Jisasi'ene tagufa amage'ma nentaza disaipol nagamo'zama, ete ruga'a amage'ma nentaza disaipol nagatema, e'za eme zmagazana kasegere ugagota hu'naza vahe'mo'za keha renezmantazageno eme zmage'naze.
15Ana maka vahe'mo'za Jisasina nege'za antri nehu'za, ame hu'za zmagare'za vu'za muse ome hunte'naze.
16Jisasi'a huno na'anku huge antahige zamagranena nehaze huno zmantahige'ne?
17Tusi'a vahepinti mago'mo ana kemofo nona'a anage hu'ne, Rempi hurami ne'moke, havi avamumo agu'afi mani'neno agira eri antrako higeno, ke nosia mofavreni'a avarena Kagrite neoe.
18Anama havi avamumo agu'afi nefreno'a azeri traka hutregeno mopafi masenegeno, ahirahi neregeno agipinti agremo zuzu nehigeno, avera anikreki nehuno mase havavu nehie. Ana nehigena avre'na Kagri kamage'ma nentaza disaipol nagate havi avamu humegi atresazegu zmantahigo'anagi, azeri so'e huonte'naze.
19Ana kemofo nona'a Jisasi'a anage huno zmasami'ne, tamagra tamentinti osu vahere! Nama'a gna tamagra nena manigahue? Nama'agna tmagri kna erina vugahue? Ana mofavre avaretma Nagrite eho.
20Hagi ana mofavre avare'za azageno, havi avamumo Jisasima anama negeno'a, ana mofavre azeri traka hutregeno mopafi traka huno maseno rukre rukre nehigeno, agipinti agremo zuzu huramine.
21Ana nehigeno Jisasi'a ana mofavremofo nefana antahigeno, Nanknafi ana zana agafa hu'ne? Higeno, mofavre maninegeno anazana fore humine huno hu'ne.
22Rama'a zupa tevefine tirupine ahefri'naku azeri traka hunetre. Hagi Kagrama azahuga hunesunka, kasunku hurantenka taza huo huno hu'ne.
23Jisasi'a anage huno ana mofavremofo nefana asami'ne, na'a higenka kagrama azahuga hunesunka azeri otio hunka nehane? Hagi mago'moma amentinti huno, maka'zana fore hugahie hanimofontera, amane maka'zana fore hugahie.
24Ana mofavremofo nefa'a ranke hantka huno anage hu'ne, namentinti huanki namentintima osu'zana naza huo!
25Jisasima keama rama'a vahe'mo'za ame hu'za eritru nehazageno, havi avamura hanavetino hunteno, kagra vahe'mokizmi zmazeri negi nenenka zamagi zamazeri antrako nehana havi avamumoka, hugantoanki agu'afintira atiraminka nevunka, mago'anena eofro.
26Higeno ranke huno azeri tagosi tagosi nehuno atiramino enevigeno, ana mofavremo fri vahekna huno mase'nege'za, hago frine hu'za hakare vahe'mo'za sumi sumi ke hugantigama hu'naze!
27Hianagi Jisasi'a azante akoheno azeri otigeno oti'ne.
28Ana huteno Jisasi'a nompi umarerige'za, amage'ma nentaza disaipol naga'mo'za, Agrane zamagraku umani'ne'za, na'a higeta havi avamura ahenati notrone hu'za antahige'naze?
29Jisasi'a anage huno zmasami'ne, amana huknazana, nunamuhu kantetike huntesageno atiramigahie.
30Jisasi ene amage'ma nentea disaipol naga'mo'za ana kumara atre'za, atiramiza Galili kaziga rukitagiza vu'naze. Hianagi Jisasi'a kama vazama'a mago vahemo antahi zankura ave'osine.
31Na'ankure amage'ma nentea disaipol nagara rempi hunezamino, anage huno zmasami'ne, Vahe'mofo Mofavre avare'za ha' vahe zmazampi antesageno ahe frina, tagufa kna maniteno kerifintira otigahie.
32Hianagi ana naneke antahi ama nosu'za, antahige'zankura koro hu'naze.
33Ananteti Kapanea kumatega ete'za, Jisasima nompinka enemanino'a anage huno zmantahige'ne, Kantegama ne-eta na'anku keaga huta e'naze?
34Hianagi kantegama ne-eza i'za amu'nontifintira ugagota hu'ne hu'za hugantugama hu'nazagu, zamagra kea osutfa hu'naze.
35Anante'ma Jisasi'ma mopafima nemanino 12fu'a amage'ma nentaza disaipol naga'a, kehuno anage huno zmasamine, iza'o ugagota hunaku'ma hanimo'a, henkarfa nemanino, maka vahe'mofo eriza vahe manigahie.
36Agra osi mofavre amunozmifi azante azerino azeri onetino, anage huno zmasami'ne.
37Iza'o amanahu'kna osi mofavre, Nagri nagifi avreno azeri so'e huntesimo'a, Nagri navareno nazeri so'e hunantegahie. Iza'o Nagri'ma nevareno nazeri so'e hunante'nimo'a, Nagrike navreno nazeri so'e osugahianki, Nenfa hunantege'na e'nomofo avreno azeri so'e huntegahie.
38Joni'a Jisasi asamino, Hurami ne'moka mago ne'mo kagri kagifi havi avamutamina humegi netregeta negeta, ana osuo huta hunte'none. Na'ankure ana ne'mo'a tagranena vano osu'negu ana osuo huta asevazinte'none.
39Hianagi Jisasi'a anage hu'ne, i'o huonteho, na'ankure mago vahe'mo'e huno Nagri nagifima kaguvazama nehanimo'a, hantga huno hu haviza hu onantegahie.
40E'ina hu'negu iza'o tagri'ma ha'marema norante'nimo'a, tagri kaziga mani'ne.
41Na'ankure tamage hu'na neramasamue, iza'o, Kraisi amage'ma nentaza disaipol naga zmaza hanue huno nehuno, tima afi tamisimofona, mizama'amo'a fanane osugahie.
42Jisasi'a anage huno zmasamine, iza'o ama osi mofavremo'za, Nagrite zmentinti nehaza mofavre naga kumipi zmarentesamokizmia, tusi'a monu havereti anankempi rentete'za, hagerimpi matevu'za atresageno uramisiana knare'zantfa hugahie.
43Hagi kzamo'ma kumipi kavare nentesigenka akafritro, na'ankure ru tare kaza me'neno asu osu tevava tevefi kavarente zanku, magoke kaza me'nena manivava asimu erizampi ufresanana knare hugahie.
44Anampina knimo'a zamufgafi manivava hugahie. Hanki tevemo asu osu tevava hugahie.
45Hagi kagamo'ma kumipi kavare nentesigenka akafri tro, na'ankure ru tare kaga me'neno asu osu tevava tevefi kavarente'zanku, magoke kaga me'nena, manivava asimu erizampi ufresanana knare hugahie.
46Anampina knimo'a zamufgafi manivava hugahie. Hanki tevemo asu osu tevava hugahie.
47Hagi kavurgamo'ma kumipi kavare nentesigenka, tagati atro, na'ankure ru tare kavurga me'neno, asu osu tevava tevefi kavretre'zanku, magoke kavurgama me'nena, Anumzamofo kumapima ufresanana knare hugahie.
48Anampina knimo'a zamufgafi manivava hugahie. Hanki tevemo asu osu tevava hugahie. (Ais 66:24)
49Na'ankure ana mikomofona tevenu kre fatgo hugahie.
50Hagemo'a knare hu'neanagi, haga'ama atresigenka, inankna hunka ete kagra eri haga hugahane? Tamagra hagegna huta amuno tamifina ovesinte avesinte hutma maniho.
