Luka 6:19-47

¹⁹Thaj sa o them rodelas te čhon pe vas pe leste, kaj andar leste inkljelas e sila thaj von sa sastonas.

²⁰Vo dikhla pe pire učenikurija thaj phendas: “Blago tumenđe save sen čore, kaj si tumaro o carstvo e Devlesko.

²¹Blago tumenđe save sen akana bokhale, kaj čaljona. Blago tumenđe save akana roven, kaj asana.

²²Blago tumenđe kana e manuša mrzana tumen, kana odbacina tumen, kana ladžarena tumen, thaj kana phenena pale tumende kaj sen bilačhe, zbog godova kaj sledin e Čhaves e Manušesće!

²³Aven bahtale ande godola đesa thaj ćhelen, kaj dik, bari si tumari poćin ando nebo. Kaj sa godova bilačhipe isto gajda amaro them ćerelas amare prorokonenđe ande lenđe vrjama.

²⁴Ali teško tumenđe save sen akana barvale, kaj već primisardine e uteha tumari.

²⁵Teško tumenđe kaj sen akana čaljarde, kaj bokhavona. Teško tumenđe kaj asan akana, kaj rovena thaj tuguina.

²⁶Teško tumenđe kana savora lačhe mothona pale tumende, kaj isto gajda amaro them ćerelas amare hohamne prorokonenđe ande lenđe vrjama.”

²⁷“Ali tumenđe save ašunen phenav: Volin tumare dušmajen! Ćeran lačhipe okolenđe save mrzan tumen!

²⁸Blagoslovin okolen kaj dentumen romaja! Molintumen e Devlešće pale okola save vređon tumen.

²⁹Ako vareko pećel tut pe jek rig e muješći, bolde lešće vi aver rig. Ako vareko lijas ćiro ogrtači, deles vi ćiro gad.

³⁰Ko manđel tutar, deles. A okolestar kaj otmil ćiro na rode palpale.

³¹Thaj askal, sar kaman te ćeren e manuša tumenđe, gajda ćeren vi tumen lenđe.

³²Thaj ako volin samo okolen kaj tumen volin, sošći avela tumari poćin? Kaj vi e bezehale volin samo okolen save len volin.

³³Thaj ako ćeren lačhipe samo okolenđe kaj tumenđe ćeren lačhe, sošći avela tumari poćin? Kaj vi e bezehale ćeren gajda.

³⁴Thaj te den udžile samo okolen katar save ažućaren te bolden tumenđe, sošći avela tumari poćin? Kaj vi e bezehale den e bezehalen udžile te šaj palem dobin palpale.

³⁵Volin tumare dušmajen, ćeren lenđe lačhipe, den len udžile thaj na ažućaren khanči te bolden tumenđe. Ako ćeren gajda, avela bari tumari poćin, thaj avena čhave e Majbarešće, kaj si vo lačho čak vi okolenđe kaj si nezahvalne thaj vi e bilačhenđe.

³⁶Aven dakle bare ileja sago kaj si vi tumaro nebesko Dad bare ileja.

³⁷Na sudisaren, thaj či sudilape tumenđe. Na osudisaren thaj či avena osudime. Jartosaren thaj jartolape tumenđe.

³⁸Den, thaj dela pe tumenđe. Čhordola pe tumenđe ande angalja lačhi mera, nabime, ćhinosardi thaj preobilno kaj sošće merava merisaren kasavijava vi tumenđe merilape.

³⁹Thaj phendas lenđe akaja usporedba: “Dali šaj o koro e kore te vodil? Či li perena liduj ande hv?

⁴⁰Naj o učeniko majbaro katar piro sikavno. Svako savo si sikado dži ko krajo, avela sago vi o sikavno lesko.

⁴¹Sostar dićhes e kaštešći prušuk ande jak ćire phralešći, kana či haćares o baro kaš ande ćiri jak?

⁴²Sar šaj phenes ćire phralešće: 'Phrala, ažućar te inkalav e kaštešći prušuk savo si ande ćiri jak', kana ni korkoro či haćares o baro kaš ande ćiri jak? Dvolično! Maj sigo inkal o baro kaš andar ćiri jak, thaj majlačhe dićheja e kaštešći prušuk te inkales andar ćire phralešći jak.”

⁴³Lačho kaš či bijanel bilačhe plodurja, thaj bilačho kaš či bijanel lačhe plodurja.

⁴⁴Kaj svako kaš pe piro plodo pindžarelpe. E smokve thaj e drak či kušenpe katar e kangre.

⁴⁵Lačho manuš, andar e lačhi riznica pire ilešći inkalel lačhipe, a o bilačho manuš andar e riznica bilačhe ilešći inkalel o bilačhipe, kaj andar o muj inkljel sova si pherdo o ilo.

⁴⁶“Sostar akharen aman: 'Gospode! Gospode!' a naj sen pačivale okolešće so phenav tumenđe?

⁴⁷Sikavava tumenđe pe kaste anel svako savo avel mande, ašunel mungre alava thaj si pačavilo mungre alavenđe: