Luka 6:19-47

¹⁹Ŋaclai kêsa aŋga ênê, tec gêgôm samob ôliŋ ŋajam kêsa, amboac tonaŋ lau pebeŋ sêgôm mocsac gebe sêmoasac eŋ.

²⁰Jesu kêsa laŋôanô sa gêdêŋ nê ŋacseŋomi ma kêsôm gebe “Aê aoc êôc amac lau ŋalêlôm sawa, gebe Anôtônê gamêŋ kêtu amacnêm.

²¹Aê aoc êôc amac, taŋ mo gêjô amac galoc naŋ, gebe oc aniŋ gêŋ e êôc amac tôŋ. Aê aoc êôc amac, taŋ galoc ataŋ naŋ, gebe oc aômac.

²²“Aê aoc êôc amac embe ŋamalac têntac endec amac to sêmasuc ma sêmbu amac to sêsôm gebe amac lau sec êtu Ŋamalacnê Latuŋa.

²³Têmtac ŋajam êsa êndêŋ bêc ônê toôlim êpigeŋ gebe amacnêm ŋagêjô ŋajam kapôêŋ gêc undambê. Êsêacnêŋ lau ŋanô sêgôm gêŋ tonaŋ gêdêŋ propete amboac tonaŋgeŋ.

²⁴“Ojae amac lau tolêlôm, gebe nêm moasiŋ tec akôc kwanaŋgeŋ.

²⁵Ojae amac, taŋ galoc têmtac kêkôc naŋ, gebe mo oc êjô amac. Ojae amac, taŋ galoc aômac naŋ, gebe almac oc têmtac ŋawapac to ataŋ.

²⁶“Ojaê amac, embe lau samob aweŋ aôc amac naŋ, gebe êsêacnêŋ lau ŋanô sêgôm gêŋ tonaŋ gêdêŋ propete dansaŋ kêtôm tonaŋgeŋ.

²⁷“Mago aê jasôm êndêŋ amac, tec aŋô aêŋoc biŋ amoa nec, gebe Têmtac êwiŋ nêm soŋo-soŋo to amoasiŋ êsêac, taŋ têntac gedec amac naŋ.

²⁸Anam mec êsêac, taŋ sêpuc boa amac, to ateŋ mec êtu lau, taŋ sêsac amac naŋŋa.

²⁹Ŋac, taŋ êtap aôm alimanô ŋamakeŋ naŋ, ôkêŋ ŋamakeŋ êndêŋ eŋ êwiŋ, ma ŋac taŋ êjaŋgo nêm ŋakwê su naŋ, ôŋgamiŋ obo êndêŋ eŋ atom.

³⁰Samob taŋ teteŋ gêŋ êndêŋ aôm naŋ ôkêŋ, ma êsêac, taŋ sêkôc nêm gêŋ su naŋ, oteŋ êêac gebe sêkêŋ êm u êmêŋ êtiam atom.

³¹Gêŋ taŋ amac abe lau sêŋgôm êndêŋ amac naŋ, taôm aŋgôm êndêŋ êsêac.

³²“Embe têmtac êwiŋ lau, taŋ têntac gêwiŋ amac naŋ, oc ŋanô amboac ondoc, gebe lau sec têntac gêwiŋ lau, taŋ têntac gêwiŋ êsêac naŋ amboac tonaŋ.

³³Ma embe amoasiŋ lau, taŋ sêmoasiŋ amac naŋ, oc ŋanô amboac ondoc. Lau sec sêgôm nêŋ gêŋ amboac tonaŋ.

³⁴Ma embe akêŋ gêŋ êtu tôp êndêŋ lau ma taêm êka gebe sênac ŋatôp, oc ŋanô amboac ondoc. Lau sec sêkêŋ gêŋ kêtu tôp gêdêŋ lau amboac tonaŋgeŋ.

³⁵Têmtac êwiŋ nêm soŋo-soŋo to amoasiŋ lau ma akêŋ gêŋ êsêac, taêm êka ŋagêjô atom, go amacnêm ŋagêjô ŋajam êtu kapôêŋ ma atu Lôlôc Ŋatau latui, gebe eŋ kêtu lau têntac dani to lau sec nêŋ ŋac gabêjam.

³⁶Taêm walô lau amboac Tamemi taê walô.

³⁷“Amêtôc lau atom, go Anôtô êmêtôc amac atom. Anac jatu lau atom, go Anôtô ênac jatu amac atom. Anac pêla lau, go Anôtô ênac pêla amac.

³⁸Akêŋ gêŋ êndêŋ lau, go Anôtô êkêŋ gêŋ êndêŋ amac. Oc êkêŋ gêŋ êndêŋ amac êsêp nêm gadob e mêŋêc ma ekoloŋ, go ênsalê ŋagêdô ênsac ŋaô êwiŋ, gebe dôŋ, taŋ anam dôŋ lau naŋ, oc Anôtô ênam dôŋ amac.”

³⁹Go Jesu kêsôm biŋgôliŋ tonec gêdêŋ êsêac gebe “Matapec teŋ kêtôm gebe êwê matapec teŋ atom. Agêc lulu oc sêu tauŋ sêsêp sê sêna.

⁴⁰Kwapuc teŋ êlêlêc kwalam laŋgwa atom. Mago kwapuc samob embe sênac dabiŋ ŋapep, go têtôm nêŋ kwalam laŋgwa.

⁴¹“Asageŋ gôlic ka ŋasili, naŋ gêguŋ lasim mataanô, ma ŋadambê, taŋ kêkô taôm matamanô naŋ, gôlic sapu.

⁴²Ma amboac ondoc ôsôm êndêŋ lasim gebe ‘Lasicenec, ondecgeŋ ma jambuc ŋasili, taŋ gêguŋ matamanô naŋ sa.’ Mago ka ŋadambê, taŋ kêkô aôm taôm matamanô naŋ, gôlic sapu. Aôm dansaŋtêna, ômbuc ka ŋadambê aŋga taôm matamanô sa acgom e matamanô ŋawa êsa, go ômbuc ŋasili, taŋ gêguŋ lasim mataanô naŋ sa.

⁴³“Ka ŋajam oc ênam ŋanô sec atom, ma ka sec oc ênam ŋanô ŋajam atom.

⁴⁴Ka samob tajala êndêŋ ŋanô êndêŋ-êndêŋgeŋ. Sêpip jambô ŋanô aŋga locgôm atom ma sêwa aiŋ aŋga okêm atom.

⁴⁵Ŋamalac ŋajam kêtaiŋ gêŋ ŋajam sa aŋga nê awa ŋajam, taŋ gêc nê ŋalêlôm naŋ, ma ŋamalac sec kêtaiŋ gêŋ sec sa aŋga nê awa sec. Gebe gêŋ, taŋ gêlôc gêc nê ŋalêlôm tonaŋ tec mêŋêsa awasuŋ.

⁴⁶“Amboac ondoc, amac asam aê gebe ‘Apômtau, Apômtau,’ mago agôm biŋ, taŋ kasôm naŋ, ŋanô kêsa atom.

⁴⁷Lau samob, taŋ dêdêŋ aê sêmêŋ to sêŋô aêŋoc biŋ ma sêgôm ŋanô kêsa naŋ, aê janam dôŋ êsêac amboac tonec.