Luk 6:19-47

¹⁹Ana yomba prapra ye akenamunedi pre yombuglo erikwa. Sraglpre, okuna akingwa yomba ye yombuglomo ende menda undre ana ye kindeno prapra erewakai orkwa.

²⁰Yesus yene disaipelma wagle kandre ana dungwa, “Kiuglgiunde yomba God eran ene gun yenaglkwa, God kingdomo ene pre yongwa.

²¹Yomba erme kindan geglkwa God eran ye gun yenaglkwa, okuwo ene nembi kau sinambuka. Yomba erme kai erikwa. God eran ye gun yenaglkwa, okuwo ene gaugl eraglkwa.

²²Yomba ta ene kankinde yeimbi God eran ene gun yenaglkwa, ene mane ditendre ka kinde dite, ana ene yomba kinde we dinaglkwa enge God eran ene gun yenaglkwa. Sraglpre i prapra Yomba Wam pre erikwa.

²³“Yeglmere ta plau dinan ene gunyei katno engriyo. Sraglpre topono kande heven suna ene pre yei-pangwa. Kowano awano okuna kuno yegl ere propet wagle teingwa.

²⁴“Ba diminge mere paitongwa yomba ene yumbun pond inaglkwa, ene okuna kana wakai moglpai erikwa.

²⁵Erme ene kaiya mokna ne kau singwa, ene yumbun pond inaglkwa. Okuwo ene kindan goraglkwa. Te erme gaugl erikwa yomba ene yumbun pond inaglkwa, okuwo ene mitno gogl kai pond eraglkwa.

²⁶Yomba prapra ene pre dembinosi mitna endinaglkwa enge ene yumbun pond inaglkwa, ye kowano awano propet kakimbi yomba kuno yegl ere teimere erikwa.

²⁷“Ba na kanna pirkwa yomba ene diteinga, ene kundano ikine kan wakai yendre, deno kumbro ene teingwa yomba ye ene erewakai ere teiyo.

²⁸Yomba ta ene mangaglsi tembi, ene wakai ere ye teiyo. Te yomba ta ene kinde eretembi ene ye pre kamange ere teiyo.

²⁹Yomba ta paunan koglo atndang sinan, koglo ama temin atndang sinano. Yomba ta ene gatn suna kande inan, ene kanwinge etn gatn suna kembra akiye inano.

³⁰Yomba taragl ta pre kraporambuka, i prapra to. Ana yomba ene taragl ake-nenga ta imbi, ene i-ikine endinagledi krapoglkro.

³¹Ene yomba taragl ere naraglmedi pitnere yeglmere ene yomba ere to.

³²“Ba yomba ene wakai kanigwa, i keunde wakai kanimbi, ene sraglmere God taraglmo wakai inaglme? Tandaglme erikwa yomba, yomba ta ye wakai kanigwa, yomba i ye ama wakai kanigwa.

³³Ene yomba wakai ere tenaglkwa i keunde ene wakai ere tembi, ene sraglmere God taraglmo wakai inaglme, tandaglme yomba ama yegl erikwa!

³⁴Ana ene taragl yomba nare ikine endinaglmedi poglodi pirtre tembi, sraglmere ene God taraglmo wakai inaglme? Tandaglme erikwa yomba yegl ere tandaglme erikwa yomba taragl teingwa, taragl kuno yegl i-ikine endinamnedi pirtre erikwa.

³⁵Ba ene kunda ikine kan wakai yei ana wakai ere tendre ana ene taragl kanekane i-ikine endekragledi pirtre teiyo. Ana okuwo ene topo pond i-ikine endindre ana ene God mitna imbo kaima nangiglma moraglkwa. Sraglpre yomba ye dembiye sitekriwa ana mitno gogl te yomba mambuno kinde erikwa ye wakai ere tongwa.

³⁶Ene Neno yomba pre mitno goglmere yegl ene ama yomba pre mitno golo.

³⁷“Ene yomba mambunono yumbu sikrimbi ana God ene mambunono ta yumbu sikrambuka. Ene yomba kankinde yeikrimbi ana God ene kankinde yeikrambuka. Ene yomba tandaglmeno kindekondo teimbi ana God ene tandaglmeno kindekondo tenambuka.

³⁸Ene taragl yomba temin ana God ene tenambuka, ye yumbu wakai sindre ake pirir ere atne endinan ana toindinagledi eran tenambuka. Ene yomba ere tenaglkwa yeglmere God ama ene ere tenambuka.”

³⁹Ana Yesus ka i di simbogl ditongwa, “Ongumuglo kin yongwa ta ongumuglo kin yenambuka ta konbo okuna yei tenan, ye suwo-akiye yange maugl mina atne sikrambro?

⁴⁰Skul gak ta ye mogl-mitna ende ka beke tongwa yomba engrekrukwa, ba ye skul prapra beke i kondo pandigl ana ye ka beke tongwa yomba moglmere kuno yegl morambuka.

⁴¹“Sraglpre ene angitn ongumuglo mina endi surmane yongwa kandre, enene ongumutn mina endi bange pangwa i pir kankitn?

⁴²Ene sragl wedi angitn tenatne, ‘Angramo, ene kanwinge etn na ongumutn mina endi surmane moglkwa imenda ende tenaglka.’ Ana ene enene ongumutn mina suna endi bange pond pangwa i kankitno? Ene kakimbi yomba, okuna kana endi bange enene ongumutn mina pangwa imenda ende ana okuwo ene kanpogl sindre ana angitn ongumuglo mina endi surmane yongwa i ere i-endinatnga.

⁴³“Endi wakai mongo kinde ta koglkrukwa, te endi kinde mongo wakai ta koglkrukwa.

⁴⁴Endi prapra yene mongono keglmbi yomba kanaglkwa. Yomba endi kogla mongo kombugl-kanemail mina kogl panan urokraglkwa, te wain mongo kewan mina ta koglkrambuka.

⁴⁵Yomba wakai ye nomanemo mina suna taragl wakai kausi yongwa i dimenda endungwa, ana yomba kinde taragl kinde nomanemo mina kausi yongwa i dimenda endungwa, yeglpre ye nomanemo suna kausi yomere pre dra mina dimenda endungwa.

⁴⁶“Ene sraglpre na kangina dagl, Yaglkande, Yaglkande dindre ana na sragl ero diteimere erekitne?

⁴⁷Yomba ta ende na moglmara undre, na kanna pirtre ana dimere kongunmo eran, ana ye sraglmere moglkwa i ene ombuno ditenaglka.