Luuka 6:19-47

¹⁹Yimɓe ɓee fuu ana njiɗi memde mo, sabi baawɗe ana njalta e makko cellina ɗum'en fuu.

²⁰E oon wakkati fuu, o hunci gite makko o ƴeewi taalibaaɓe makko ɓee, o wii: —Onon misikiina'en, on mbelii hoore, sabi onon njey Laamu Laamɗo oo.

²¹Onon yolbuɓe jooni, on mbelii hoore, sabi on kaaran. Onon woyooɓe jooni, on mbelii hoore, sabi on njalan.

²²On mbelii hoore so yimɓe mbaɲii on, ndibbii on, njennii on, mbonnii inɗe mon saabe Ɓii Neɗɗo.

²³Ɲannde mum, ceyee, ilino-ɗon, sabi mbarjaari mawndi ana doomi on dow kammu. Hono non ɓe ngaɗunoo annabaaɓe aranndeeɓe ɓee.

²⁴Kaa bone woodanii on, onon arsukunte'en, sabi on keɓii neema mon.

²⁵Bone woodanii on, onon haarɓe jooni, sabi on njolban. Bone woodanii on, onon jalooɓe jooni, sabi on cuŋlan, on mboyan.

²⁶Bone woodanii on, so yimɓe fuu manii on, sabi hono non ɓe ngaɗunoo annabaaɓe peneeɓe ɓee duu.

²⁷—Kaa onon hettindantooɓe kam ɓee, miɗo wiya on: njiɗee konnee'en mon, tikkanɓe on ngaɗanon ɗum'en moƴƴere.

²⁸Nduwanee huɗooɓe on, torrooɓe on duu, ɲaagano-ɗon ɗum'en Laamɗo.

²⁹So won piiɗo ma banaawo, accu ɗum fiye bannge goɗɗo oo duu. So won teetuɗo ma dolloke maa, pati haɗu ɗum forgo oo duu.

³⁰Neɗɗo fuu ɲaagiiɗo ma, ndokkaa ɗum. Teetuɗo ma jawdi maa, njoppiraa ɗum.

³¹Ngaɗiranee yimɓe no njiɗ-ɗon ɓe ngaɗirana on nii.

³²So yiɗuɓe on tan njiɗaton, ɓural hongal keɓaton? Fay luuttooɓe ana njiɗi yiɗuɓe ɗum'en.

³³So waɗanooɓe on moƴƴere tan ngaɗanton moƴƴere, ɓural hongal keɓaton? Fay luuttooɓe ɓee hono non ngaɗata.

³⁴So ɓe miil-ɗon heɓude e mum tan ɲamloto-ɗon, ɓural hongal keɓaton? Fay luuttooɓe ɓee ana ɲamloo luuttooɓe hono mum'en, yalla ana njoɓee ɲamaande mum'en.

³⁵Kaa onon, njiɗee konnee'en mon, ngaɗon moƴƴere tawa on ɗaminaaki hen fay huunde. Nden, on keɓan mbarjaari mawndi, on laatoto ɓiɓɓe Laamɗo Toowɗo oo, sabi oon ana neemina bonnooɓe moƴƴere ana neemina bonɓe duu.

³⁶Laatee yurmotooɓe, no Baabiraaɗo mon oo laatorii jurmotooɗo nii.

³⁷—Pati ɲiŋee, on ɲiŋataake. Pati njukkee, on njukkataake. Njaafee, on njaafete.

³⁸Ndokkee, on ndokkete. So on ndokkii, on cowirante saawal lobbal, kebbinaangal faa ana yuppoo, sabi ko etiranton woɓɓe koo, ɗum etirante-ɗon.

³⁹O ɓeydani ɓe hen banndol gonngol, o wii: —Bumɗo ana waawi ɗowde bumɗo hono mum naa? So ɗum waɗii, wanaa ɓe ɗiɗon fuu, ɓe caaman ley ngaykaare naa?

⁴⁰Taalibbo ɓurataa moobbo mum, taalibbo kiɓɓuɗo laatoto hono moobbo mum.

⁴¹Ko saabii so aɗa yiya kuɗol ley yitere sakiike maa, tawee aan nee, a yiyataa leggal gonngal e ley nde maa ndee?

⁴²Hono mbaawru-ɗaa wiide sakiike maa: «Sakiike, ɗal mi ittane kuɗol gonngol e yitere maa ngol», tawee aan nee, a maatataa leggal gonngal e ley nde maa ndee? Naafigi, ittu leggal gonngal e yitere maa ngal tafon, nden jiile maa laaɓata, faa keɓaa no ittiraa kuɗol gonngol e yitere sakiike maa ngol.

⁴³—Lekki lobbi rimataa ɓiɗɗe bonɗe, lekki ki wooɗaa rimataa ɓiɗɗe lobbe.

⁴⁴Sabi lekki fuu ana annditiree ɓiɗɗe mum. Ibbe teɓataake e kebbe, peguuje teɓataake e gi'e.

⁴⁵Neɗɗo moƴƴo, ko moƴƴi iwata e ndesaari ngonndi ley ɓernde mum. Neɗɗo bonɗo, ko boni iwata e ndesaari ngonndi ley ɓernde mum. Sabi ko woni e ɓernde, ɗum yaltata e hunduko.

⁴⁶—Ko saabii so oɗon noddira kam «Moobbo», kaa on ngaɗataa ko mbii-mi?

⁴⁷Neɗɗo fuu garɗo e am so hettindii haalaaji am so jokki ɗi, mi hollan on mo nanndi: