Lucas 6:19-47

¹⁹Id nokkaanokkaa iddos langun no minuvu amoy'd pokosomad ki Disas, su duwon kotuusan no id pomon diyot kandin no nokovawi kandan langun.

²⁰Nopongnga idda, id tongtongngan ni Disas iddos mgo tinodduwan din, woy kahi rin to, “Moppiya kod kotomanan dow, sikiyu no worowora, oyyos od pokolonug kow to kodharit Monama.

²¹Moppiya kod kotomanan dow, sikiyu no id gutasan ko‑ungkay, oyyos od ivuungon kow rad. Moppiya kod kotomanan dow, sikiyu no id sinoggow ko‑ungkay, oyyos od kosu‑at kow rad kangkan pomon to kahaan.

²²Moppiya kod kotomanan dow otik id kolingasa‑i kow to mgo minuvu, id pa‑awa kow, id sumpalit woy id doddorattan pomon to koddumoruma row koddi no Anak to Minuvu.

²³“De‑en otik od puungan dan ini koniyu, kahaa kow woy sayow kow to kahaan, oyya su dakkoo kos ganti no id panoy atag koniyu riyot datas to langit. Su iddos id puungan dan koniyu, ungketen dad en mandad kos id puungan to kovuyyahan dan diyot mgo propeta.

²⁴Piru sikiyu no noratu ko‑ungkay, moko‑eru‑eru kow, su notanggap dowd kos kahaan ka‑ay to ampow't ingod.

²⁵Moka‑arat‑arat kod kotomanan dow, sikiyu no novuung ko‑ungkay, oyyos od inguma en kos timpu nod gutasan kow. Moka‑arat‑arat kod kotomanan dow, sikiyu nod kosu‑at ko‑ungkay, oyyos od inguma kos timpu nod kaanu woy'd pondaawit kow.

²⁶Moka‑arat‑arat kod kotomanan dow, sikiyu no od doongon ko‑ungkay to mgo minuvu, su ungketen dad en mandad kos id puungan to kovuyyahan dan diyot od po‑uvag‑uvag no mgo propeta.

²⁷“Piru od ikohiyan ku sikiyu no id pominog koddi, ginowanni row kos od kuntra koniyu woy puungi row to moppiya iddos nolingasa koniyu.

²⁸Buyu kow riyot Monama no od pokita sikandin to kopiyannoy taddot od doddora‑at koniyu, woy dasaa kow atag taddot od ayu‑ayu koniyu.

²⁹Otik duwon od tabpit bonnong dow, potabpi row mandad kos divauy. Otik duwon od ahaw to lapid no umpak dow, boggoy row ahad iddos umpak dow.

³⁰Boggayi row iddos langun nod bovuyu koniyu, woy otik duwon od ahaw to mgo koruwonnan dow, yo rowd idda owiya.

³¹Puungi row riyot duma iddos id kopi‑i row nod puungan dan koniyu.

³²“Otik iyon dow ra od ginowannon iddos id ginawa koniyu, ondan man kos nokomoppiya tadda? Su ahad iddos mgo mosaasaa, od ginawa man taddot id ginawa kandan.

³³Woy otik iyon dow ra od puungan to moppiya iddos od puung to moppiya koniyu, ondan man kos nokomoppiya tadda? Su ahad iddos mgo mosaasaa, od puung man mandad to ungketen.

³⁴Otik iyon dow ra od posombayon iddos duwon id pokovullas, ondan man kos nokomoppiya tadda? Su ahad iddos mgo mosaasaa, od posamboy man mandad diyot od pokovullas kandan.

³⁵Piru sikiyu, ginowanni row iddos od kuntra koniyu woy puungi row iddos od pokomoppiya kandan. Posamboy kow woy yo kow'd angat to bullas. Na, ko ungketen kos od puungan dow, dakkoo kos ganti nod kotanggap dow, woy od kokita no mgo anak kow en to Monama no Lampas to Langun. Su moppiya sikandin ahad taddot diid kotuig nod posolamat woy riyot morat no mgo minuvu.

³⁶De‑en ko‑ilangan no eeruwon kow iling taddot Monamon Amoy ta no eeruwon.

³⁷“Yo kow'd hukum to duma amoy dii kow mandad od hukuman to Monama. Yo kow'd oseng no ko‑ilangan en sikandan od silutan, su amoy konna kow mandad od silutan to Monama. Posinsya‑i row iddos duma amoy'd posinsyan kow mandad to Monama.

³⁸Boggoy kow woy od boggayan kow mandad to Monama. Oray'n dakkoo kos id boggoy rin koniyu, oyyos iling to boggas no id lasud diyot saku, od dosokkon idda woy kopongnga, od timulan taman tod koponnuponnu. De‑en iddos korokolloy no id boggoy row riyot duma, ungketen dad en mandad kos id boggoy to Monama koniyu.”

³⁹Na, duwon mandon ponunggelengan ni Disas, kahi rin to, “Waa en butud nod poko‑inahak to iling din no butud, su od pokodtapik dan da en nod ko‑uug diyot moraom no bobbo.

⁴⁰Waa tinodduwan nod pokolampas to tohodnonaw rin. Piru od pokoloppa ra kos tinodduwan taddot kandin no tohodnonaw, otik notuihan din don iddos langun no sinorollan tat tohodnonaw rin.

⁴¹“Mambot oray kow'd kita to disok no possok diyot mata to duma, piru id podtohon dow kos batang duwot mata row?

⁴²Na momonnu kow man od poko‑oseng diyot duma no, ‘Suwod, od ongayon ku kos possok to mata ru,’ no waa row man nokita kos batang duwot mata row? Od po‑uvag‑uvag kow! Unna‑a row pa man ongaya kos batang duwot mata row amoy oraroy row od kokita tod angoy iddos possok to duma.

⁴³“Iddos moppiyon kayu, konna en od bovunga to morat woy iling mandad tadda, dos morat no kayu, konnod bovunga to moppiya.

⁴⁴Dos ipat kayu, od kokilaa ukit to bunga tadda. Ponunggeleng, iddos kayu no duhiyon, waa od kopupu no igera pomon tadda, woy waa od ka‑angoy no ubas pomon diyot baahon.

⁴⁵Na iling mandad tadda, od kokilaa ta kos minuvu ukit to osengan din. Dos moppiyon minuvu, moppiya kos pusung din, de‑en moppiya mandad kos osengan din. Piru iddos morat no minuvu, morat kos pusung din, de‑en morat mandad kos osengan din. Oyyos ko ondan kos diyot pusung to minuvu, idda en mandad kos od leggua riyot bivig din.”

⁴⁶“Mambot od ngoranan a nikiyu no, ‘Longaggon,’ no waa kow man id tuman tod osengon ku koniyu?

⁴⁷Id paabbotlabbot ku koniyu iddos minuvu nod porani koddi, dos id pominog to koddin mgo osengan woy dos od tuman tadda.