Luk 6:19-47

¹⁹Ra a taro rop, det nemi sur det in pam a pinin o Iesu, uni a dekdek i pirso gusuni, ma i ulangolango pas det rop.

²⁰O Iesu i tama anun a taro na ususer ra i watungi lena, “Mot ra mot sibo, mot dan, uni a matanitu anun o God, anumot!

²¹Mot ra uniri mot murak, mot dan, uni numur mot in masur. Mot ra uniri mot tangis, mot dan, uni numur mot in nongon.

²²Mot dan ra a taro det nget mot, o det pilok ru mot ma det watung laulau mot, ma det ban laulau a risamot, uni mot tagun a Nutun a Musano.

²³“Una bung ra din pam a kum utna ri torom mot, mot in gas, mot in sirsirok nama gasgas, uni i labo sakit anumot a ikul sapat una langit. Uni a kum utna ri, a kum tumtubun det tagun numugu det sa pam tari torom a kum poropet.

²⁴“Ikut in laulau torom mot a kum tene gongon, uni mot sa rakon pas anumot a wakakino.

²⁵In laulau torom mot ra uniri mot masur, uni numur mot in murak. In laulau torom mot ra uniri mot nongon, uni numur mot in tupunuk ma mot in tangis.

²⁶In laulau torom mot ra a taro rop det watung ulabo pas mot, uni a kum tumtubun det tagun numugu, det pami lenri torom a kum torotoro na poropet.

²⁷“An watungi tamot ra mot longoro iau, mot in nem anumot a kum ebar, ma mot in pam a wakakino torom det ra det nget mot.

²⁸Mot in watung udan det ra det saring o God sur in ban laulau mot, ma mot in wararing un det ra det ban laulau mot.

²⁹Ra taio in pasor tar a papor wam, un pukus ara papor bulung toromi. Ra taio in ras pas anum a saket, un madek tari kai anum a siot tano.

³⁰Un tabor det rop ra det saring ui. Ra taio in los pas tu utna anum, gong u saring meleti suri.

³¹Asau ra mot nemi sur a taro det in pami torom mot, mot kai, mot in ser pami torom det.

³²“Ra mot nem det kut ra det nem mot, din watung ulabo pas mot pepetlai? Uni a kum tene sakino kai det nem etetalai det ut.

³³Ra mot in pam a wakakino torom det ra det pam a wakakino torom mot, din watung ulabo pas mot pepetlai? Uni a kum tene sakino kai det ser pami lenra.

³⁴Ra a taro det saring mot sur tu utna, ma mot pitari kut torom det, ra mot tasmani lena, det in balu i ut torom mot, din watung ulabo pas mot pepetlai? Uni a kum tene sakino kai det pitar tar a utna tan a kum tene sakino, ma det nuki lena det in balu i.

³⁵Ikut mot in nem anumot a kum ebar, ra mot in pam a wakakino torom det. Ra a taro det nemi sur det in los pas tu utna munung gusun mot, mot in pitari kut, ma gong mot nemi sur det in balu i. Ra mot in pami lenra, anumot a ikul in labo sakit, ma mot a kum nutnutun o God a Labino Sakit, ra i ser maris det ra ka det ser watung wakak toromi, ma a kum tene sakino kai.

³⁶Mot in lason una marmaris, elar nama Tamamot a tene marmaris.

³⁷“Gong mot takun tar taio, sako o God in takun mot. Gong mot kuro tar taio sur in los a warkurai na minabalu, sako o God in kuro mot ra mot in los a warkurai na minabalu. Mot in dumano ru a kum sakino petutna ra a taro det pami un mot, ma o God in unus ru anumot a kum sakino petutna.

³⁸Mot in etabor, ma o God in tabor mot. Ikut a etabor anun o God torom mot in labo doko, ma din sogori, ma in bukus melet, ma in tilingis. Uni asi na ngas na etabor ra mot pitari, i labo o i natino, i kut kai ra o God in pitar meleti torom mot.”

³⁹O Iesu i watungi kai a wasiso elelar torom det lenri, “Tu pulu in ben lan taio kai ra i pulu? Pepetlai, der rop ka der in puku dorong un tin nutung?

⁴⁰A nat na ususer ke labo taun anun a tene ususer. Ikut o naro ra i sa urop pas anun a etowo, in elar kut nam anun a tene ususer.

⁴¹“Ilai ra u tama pasi kut a burbururup kura unin matan o tisim, ikut ko nuk pas a nuduwai pi kura ut unin matam?

⁴²Ra ko tama pas a nuduwai pi kura kut unin matam, un watung petlani torom o tisim lena, ‘Tising, an rakon ru a burbururup gusun in matam’? Ui a tene torotoro, un los mugu ru a nuduwai pi gusun in matam, ra un tamtama wakak, sur un rakon ru a burbururup gusun in matan o tisim.

⁴³“In wakak na duwai ken wu lako laulau na wino, ma in laulau na duwai kai ken wu lako wakak na wino.

⁴⁴Din tama lele a kum duwai tagun a windet. Ka din git pas tin niwino fig tagun in kadas, ma in niwino wain tagun in suksuk.

⁴⁵A wakak na musano i pam pat anun a wakak na petutna tagun a wakakino ra i kis una nun a nilaun, ma a laulau na musano kai, i pam pat anun a sakino petutna tagun a sakino ra i kis una nun a nilaun. Uni a wan a taro i watung puaso a petutna ra i bukus una nundet a nilaun.

⁴⁶“Ilai ra mot watung iau ‘Labino, Labino,’ ma ka mot pam asau ra a watungi tamot?

⁴⁷Osi ra i wan torom iau ma i longoro anung a kum wasiso, ma i muri, i elar nama musano ra an inanos mot nami.