Lucas 6:19-47

¹⁹Y tunor e gente war ucꞌani tuaꞌ upijchꞌiobꞌ ut e Jesús porque tunor tin e cꞌotoy upijchꞌi ut tzꞌacpobꞌ taca e cꞌotorer lo que locꞌoy tamar.

²⁰Pues entonces e Jesús cay uchꞌujcu uwira ut uyajcanuarobꞌ y che: —Chojbꞌesbꞌirox tunorox xeꞌ tzajtaca iut coner porque nox tuaꞌ ixcꞌotoy ixturuan tama uchinam e Dios.

²¹’Chojbꞌesbꞌirox nox xeꞌ war ixjaytzꞌa coner porque watar e día conda e Dios cꞌani uwesiox este que ixchuan. Chojbꞌesbꞌirox nox xeꞌ war ixaru coner porque watar e día conda e Dios cꞌani utzayjresox.

²²’Chojbꞌesbꞌirox nox xeꞌ war ixxejbꞌna iut umen e gente, y conda uchoquiox najtir, y conda ucꞌayox, y conda uturbꞌobꞌ icꞌabꞌa bꞌan cocha lo que intuj umen taca que war ixcꞌupseyan tamaren xeꞌ Uyunenen e winic.

²³’Tzayenic nox y tzayjresic ibꞌa meyra porque watar e día conda ixixin ichꞌami inteꞌ nuxi tuanibꞌir tuaꞌ e Dios conda ixixin tichan tut e qꞌuin. Pues bꞌan cay cꞌaynobꞌ tunor e profetobꞌ xeꞌ turuanobꞌ tama e onian tiempo umen utata viejobꞌirobꞌ e gente era, che e Jesús. Y de allí cay ojron e Jesús taca e inmojr gente y che:

²⁴Tzajtaca iut nox xeꞌ ricox tara tor e rum porque tamar taca era cꞌapa ichꞌami ituanibꞌir, y matucꞌa más tuaꞌ ichꞌami otronyajr.

²⁵Tzajtaca iut nox xeꞌ chuanox tara tor e rum porque watar e día conda cꞌani ixjaytzꞌa. Tzajtaca iut nox xeꞌ war ixtzene tara tor e rum porque watar e día conda cꞌani ixaru.

²⁶Tzajtaca iut nox xeꞌ tattzbꞌirox umen tunor e gente porque bꞌan uchiobꞌ itata viejobꞌirobꞌ taca e profetobꞌ xeꞌ ajmajresiajobꞌ tama e onian tiempo, che e Jesús.

²⁷Y che e Jesús: —Pero nox xeꞌ war iyubꞌi ninuc era, cꞌani inwareox que ucꞌani tuaꞌ iyajta ut tunor tin e war aqꞌuijna uwirox, y ucꞌani tuaꞌ itacre tin e war uxejbꞌiobꞌ iut.

²⁸Chojbꞌesic ut tin e war ubꞌaxeox y cꞌajtinic taca e Dios tuaꞌ atacarna tin e war ucꞌayox.

²⁹Y jay ayan tin e uyajqꞌuet tama inxejr acajram, actan uyajqꞌuiquet teinxejr ubꞌan. Y jay ayan tin e ulocse inteꞌ abꞌujc y uqꞌueche axin, actan uqꞌuechic chic otronteꞌ abꞌujc ubꞌan.

³⁰Chic taca tiaꞌ ayan tin e ucꞌajti tabꞌa, ajcꞌun. Y tin e ulocse lo que ayan tabꞌa, ira acꞌajti tuaꞌ achꞌami uyeror otronyajr.

³¹Y tunor lo que war icꞌani que e inmojr uchiobꞌ tacarox, bꞌan ixto ucꞌani tuaꞌ iche nox tacarobꞌ ubꞌan.

³²Porque jay war iyajta ut tin taca xeꞌ war uyajta iut, matucꞌa tuaꞌ ichꞌami tuaꞌ e Dios tamar era, porque tin e mabꞌambꞌan uwirnar war ucꞌani tin e uyet ajmabꞌambꞌanirobꞌ.

³³Y jay war itacre ajtaca tin e war utacriox, matucꞌa tuaꞌ ichꞌami tuaꞌ e Dios tamar era, porque bꞌan taca uchiobꞌ tunor tin e ajmabꞌambꞌanirobꞌ.

³⁴Jay war iwajcꞌu ajtaca tin e axin utoyet otronyajr, matucꞌa tuaꞌ ichꞌami tuaꞌ e Dios tamar era, porque tin e ajmabꞌambꞌanirobꞌ uyajcꞌuobꞌ uyet ajmabꞌambꞌanirobꞌ y war ucojcobꞌ tuaꞌ uchꞌamiobꞌ uyeror otronyajr.

³⁵Pero nox ucꞌani tuaꞌ iyajta utobꞌ tin e uxejbꞌiobꞌ iut, y tacrenicobꞌ, y ajcꞌunic prestado, y ira iware que ucꞌanto uyeror. Porque jay ixixin iche cocha era, cꞌani ichꞌami inteꞌ nuxi tuanibꞌir tuaꞌ e Dios. Y tamar era cꞌani anatanwa que nox uyunenox e Dios tichan, porque jaxir war uchojbꞌes utobꞌ tunor e gente tara tor e rum iraj iraj, motor jay ayan tin e machi war utattzꞌiobꞌ ucꞌabꞌa tamar y motor jay ajmabꞌambꞌanirobꞌ, pero e Dios warto uchojbꞌes utobꞌ tunorobꞌ.

³⁶Turbꞌanic ibꞌa tuaꞌ aquetpa incꞌun iwirnar tut e gente tuaꞌ itacriobꞌ conda ayan lo que ucꞌaniobꞌ tibꞌa, bꞌan cocha incꞌun uwirnar e Dios ticoit tuaꞌ utacrion conda ayan lo que cacꞌani non, che e Jesús.

³⁷Y che e Jesús: —Ira ixojron upater otronteꞌ tuaꞌ machi ixcꞌayna umen e Dios. Y ira ixbꞌaxon tuaꞌ machi ixjajtzꞌa umen e Dios. Cꞌumpenic taca tunor tin e axin uche e mabꞌambꞌanir ipater y e Dios axin acꞌumpa tacarox nox ubꞌan.

³⁸Ajcꞌunic otronteꞌ lo que ucꞌani, porque bꞌan cocha itacre otronteꞌ y bꞌan tuaꞌ ixtacarna umen e Dios ubꞌan. Y e Dios tuaꞌ asutpa ubꞌutꞌi más ibolsa umen que war itacre otronteꞌ. Y jaxir axin uteqꞌue ibolsa tama ubꞌijsibꞌir xeꞌ bueno. Y axin utene ibolsa tuaꞌ uwajpi más tama unac. Pero e Dios axin ucꞌampes ubꞌijsibꞌir bꞌan cocha war icꞌampes tuaꞌ asutpa ubꞌisi otronyajr lo que cꞌani asutpa uyajcꞌox, che e Jesús.

³⁹Y de allí e Jesús ojron tama inteꞌ ojroner xeꞌ mucur cora y che: —Ma erer aqꞌuejcha axin inteꞌ winic xeꞌ tajpem unacꞌut umen otronteꞌ winic xeꞌ tajpem unacꞌut ubꞌan. Porque jay bꞌan uchiobꞌ, chatertiobꞌ erer oꞌjriobꞌ axin tama inteꞌ chꞌen.

⁴⁰Y inteꞌ ajcanuar machi unata más que lo que unata uyajcanseyaj, este que acꞌapa acano tunor lo que unata uyajcanseyaj, y entonces erer acꞌotoy unata jax taca lo que unata uyajcanseyaj.

⁴¹’¿Y tucꞌa era que net wacchetaca war awira que ayan imbꞌijc sojc chꞌur tama unacꞌut inteꞌ awermano, pero net machi cꞌani awira abꞌa que ayan inteꞌ nuxi teꞌ chꞌur tama unacꞌoit?

⁴²Y jay chꞌur inteꞌ nuxi teꞌ tama unacꞌoit y machi cꞌani anata que bꞌan, ¿cocha tuaꞌ aware awermano que: “Actanen inlocsic e sojc tama unacꞌoit?” Ajqꞌuecraneret, locsen bꞌajxan e teꞌ xeꞌ chꞌur tama unacꞌoit net, y de allí uyubꞌi awira bien tuaꞌ atacre ulocse e sojc lo que chꞌur tama unacꞌut awermano, che e Jesús.

⁴³Y che e Jesús: —Inteꞌ teꞌ xeꞌ bueno machi uyubꞌi uyajcꞌu uyutir xeꞌ mabꞌambꞌan, y nien inteꞌ teꞌ xeꞌ mabꞌambꞌan machi uyubꞌi uyajcꞌu uyutir xeꞌ bueno.

⁴⁴Pues tunor e teꞌ chequer tama uyutir, porque ma erer ichꞌami ingojr muy tama inteꞌ tꞌix, y ma erer ichꞌami inteꞌ poxteꞌ tama inteꞌ chꞌuyur chꞌan.

⁴⁵Y bꞌan ixto cocha era tama e winicobꞌ ubꞌan, que inteꞌ winic xeꞌ imbꞌutz uwirnar, imbꞌutz uyojroner ubꞌan, porque bꞌutꞌur uyalma tacar lo que imbꞌutz. Y inteꞌ winic xeꞌ mabꞌambꞌan uwirnar, mabꞌambꞌan uyojroner ubꞌan, porque bꞌutꞌur uyalma taca e mabꞌambꞌanir. Porque tamar lo que bꞌutꞌur uyalma inteꞌ, jax taca tuaꞌ alocꞌoy oꞌjron tama uyej, che e Jesús.

⁴⁶Y che e Jesús: —¿Y tucꞌa tuaꞌ war iwaren que Iwinquiraren conda machi cꞌani iche lo que inwareox?

⁴⁷Cꞌani inwareox chi tacar lar tin e ayopa taniut y uyubꞌi niwojroner y oꞌbꞌian tut.