Luka 6:19-47

¹⁹Bandu boti bapalage bankunywe, kwa mwanjaa nkati yake gapitage makakala ga kwatepwa boti.

²⁰Yesu ngaagalambukya banamasi' bake ngabaya, “Nantali mwenga mwamile mwaki'ba, kwa mwanjaa Ukulungwa wa Nnu'ngu' winu.

²¹Nantali mwenga mwamuminya njala nambi'yambi' kwa mwanjaa mwalu'a yukuta. Nantali mwenga mwamuli'la nambi'yambi' kwa mwanjaa mwalu'a eka.

²²“Nantali mwenga mwamusukilwa na bandu, mwamubaulwa, mwamui'mbu'lwa, no linyatia lina linu kwa mwanjaa ya Mwana wa Mundu.

²³Pagaapita ago goti mwaanapusike no u'mbau'mba, kwa mwanjaa upo yinu ngu'lu' ibile kunani. Kwa mwanjaa api'ndo babe baapangile alondoli ba Nnu'ngu' nyinyonyo.

²⁴Lakini mwakibona mwenga mwamatayili kwa mwanjaa mupatike upo yinu.

²⁵Mwakibona mwenga mwamuyukuta nambi'yambi' kwa mwanjaa mwalu'a minya njala palu'ngi'. Mwakibona mwenga mwamweka kwo napusika nambi'yambi' kwa mwanjaa mwalu'a li'la no lombola.

²⁶Mwakibona mwenga mwamulumbilwa na bandu boti kwa mwanjaa api'ndo babe baapangi alondoli ba ubu'su' nyinyonyo.”

²⁷“Lakini nimmakianga mwenga mwamunipi'kania, mwapende andumu binu, na mwapangi manogau babansukwanga.

²⁸Mwalu'bi makowe manogau balu' babannosa na mwalu'bi balu' babampangya ulau.

²⁹Mundu mana akuku'mbwi ligomo limo ung'alambukiye na linebi'li'. Mundu mana akupokonywi likoti lyako unneki na kiyampani sako.

³⁰Ywoywoti ywakulu'ba wampei na mundu mana akupokonywi kili'be sako kaneunnonge kuki'li'bu'ki'ya.

³¹Mwamupala bandu bampangi mwenga, na bembe mwapangi nyinyonyo.

³²“Mana mwaalu'a kwapenda babampendile mwenga mwalu'a pata upo yaku'? Ntu'pu' kwa mwanjaa ata bene sambi baapenda babaapendile.

³³Kai' mana mwapangi manogau balu' babampangi manogau mwalu'a pata upo yaku'? Kwa mwanjaa ata bene sambi bapanga gogogo.

³⁴Na mana kamwapeya ngu'ta balu' bamwu'bi'lya kunni'pya, mwapata upo yaku'? Kwa mwanjaa ata bene sambi baapeya ayabe li'nga baki'li'bu'ki'yi'lwe si'si'lu'si'lu'.

³⁵Ila mwenga mwapende andumu binu na kwapangya manogau, mwapei ngu'ta wangau'bi'lya ki'li'bu'ki'yi'lwa na upo yinu yapanga ngu'lu', namwe mwapanga mwabana ba Nnu'ngu' ywa kunani. Kwa mwanjaa ywembe nnogau kwa kingasukulu na bababile alau.

³⁶Mube na kiya kati Tati' binu mwababile na kiya.

³⁷“Kanemwasenwe bi'ngi' namwenga Nnu'ngu' ansenwali, kanemwabi'ki bi'ngi' lukoolo, namwenga Nnu'ngu' ammi'kyangali lukoolo, mwasami bi'ngi' na mwenga Nnu'ngu' ansamya.

³⁸Mwapei bandu ili'be yabapala na mwenga Nnu'ngu' ampeya, mwapokya kili'ngo satwi'la no indilya, tikyatikya ika no yitanika. Kwa mwanjaa kili'ngo sososo samwaali'ngya, nga samwaali'ngi'lwa na Nnu'ngu'.”

³⁹Ngaabakia lukongo, “Mbulibuli endakombwa kunnongoya ndi'la mbulibuli nnyine? Lili, boti abi'li' balu'a tumbukya mulyi'mbwa.

⁴⁰Mwanamasi' ampi'tali mwalimu wake, lakini mwanamasi' ywayitagile ngaywaba kati mwalimu wake.

⁴¹Mboni ukibona kielenje muliyo lya nnyino na lubago lwa muliyo lyako ulubonali?

⁴²Au ukombwa buli kummakia nnyino, ‘Nnyangu', nileka nikubu'ye kielenje sakibile muliyo lyako’, na wamwene lubile lubago muliyo lyako? Wammu'su'bu'su', ulubu'ye wi'ti' lubago lwa muliyo lyako, ngaummu'ye nyino.

⁴³“Nkongo unannoga upambikali itunda inannyata wala nkongo unannyata upambikali itunda inannoga.

⁴⁴Bandu bautanga nkongo bu'kana na itunda yake, itanganikwe panga, bandu batu'mbwali tini wala njabibu mumimimwa.

⁴⁵Mundu nnogau apiya manogau gagabile mumwoyo wake, na mundu nnau apiya malau gagabile mumwoyo wake. Kwa nyo, nkano wa mundu ulongela gagabile mumwoyo wake.

⁴⁶“Kwa mwanjaa buli munikema ‘Bwana, Bwana,’ ku'no kamukana panga ganimmakianga?

⁴⁷Nilu'a kumpeyanga lukongo lu'no lwa mundu ywaisa kasangu' kugayu'wa makowe gangu' na kugapanga.