Luka 6:19-47

¹⁹Moutuadi gamagaridi ia bena se abiitalaei; gigibori ia boeana eai i laoma, arinai gamagaridi i hemauridi.

²⁰Matana i lau‐laei ena heaheatayao aridi eai, i ene, “Omi gogogesagesa tataomiu e, au nuawoiwoina: Eaubada ena basileia omi enamiu.

²¹“Omi huia ta au guriam au nuawoiwoina: paana bogamiu abo se sese. Omi huia ta au doudou au nuawoiwoina: abo au marumaruhi.

²²“Tatao ena se ouyalayalaemiu, eo se lau‐suaraemiu, eo se alaliuliuaemiu, eo esamiu se awagabaei doha ginauri baabaaea, Tau Natuna debana eai, omi abo au nuawoiwoina.

²³Nei asubenana ne abo au kode, au kode lamposi: emi ainauia galewa eai abo ie lai: tamadiyao edi laulau doha ede peroveta aridi eai.

²⁴“Ahani omi monamonaune tataomiu e! paana emi henuhenu au abiyao.

²⁵“Ahani omi bogamiu se seseo! omi abo au guriam. Ahani omi huia ta au marumaruhi! abo au nuadubu eo au dou.

²⁶“Ahani omi, tatao gamagaridi se riba helolomiu! paana doha ede hinage tamadiyao edi laulau peroveta borabora aridi eai.

²⁷“Omi arinagu tauataiena arimiu eai ea ene, Ami waiunu au gadosisiedi, isi se ouyalayalaemiu adi gigi au hebigadi.

²⁸Isi se arina baaeaimiu au taubigaidi, isi hinage se hebaaeaimiu au lau uura enadi.

²⁹Ena tau esau paream ie wai, paream esau u mosei hinage; ia em lulu i girihai em pereue tabu u nuahi.

³⁰Tatao gamagaridi em ginauri se aibodaidi u mosedi: ia hinage em gogo i girihaidi tabu u abiuioidi.

³¹Laulau aisana u henua tatao se abi arim eai, meta doha hinage u abi isi aridi eai.

³²“Ena isi taugadosisiem mo u gadosisiedi, em lolo saha? Tatao baaea taugadosisiedi hinage se gadosisiedi.

³³Eo ena isi tauhelolomiu au helolodi hinage, emi lolo saha? Tatao baabaaeadi edi laulau hinage doha meta.

³⁴Ena ginauri au mosei, maisana bena se leawa, emi lolo saha? Tatao baaea ma heledi tatao baaea enadi se mosedi maisana gonogonoana bena abo se abi.

³⁵Omi ami waiunu au gadosisiedi, eo iilamiu se lolo, eo au mosei tabu maisana au nuatui, emi ainauia abo i lai, omi abo Saesaearirina nanatunayao eai au lau, paana tatao ia nige se nuatui i abiheloloedi, eo baaea tataodi hinage.

³⁶Abo tatao au nuatoatoaidi, doha hinage Tamamiu i nuatoatoaidi.

³⁷“Tabu au hekihekirainodi, abo nige se hekirainomiu: tabu au hebaaeadi, abo nige se hebaaeamiu: au ribagigiridi, abo se ribagigirimiu:

³⁸au mosei, abo hinage se lediwa arimiu eai; abanonoi abo se hemonau, se abitawai, se heluilui, se heboribori, tatao abo se tore nuapoumiu eai. Paana nonoi au nonoiei wa abo hinage se nonoieawa arimiu eai.”

³⁹Parabole esau i heribadi ede, i ene, “Taumatagibugibu abina i ata helena taumatagibugibu abo i woealaei? Abo se beu labulabui saga eai, e nige’e?

⁴⁰Tauheata ana tanuaga nige i saetawatawai: heaheata se heatakomakomaniyao ia abo doha ana tanuaga.

⁴¹Ue saha muari u ita em tau matana eai, eo oeagi oa matam eai nige u nuatui?

⁴²Hinage edoha em ribariba em tau arinai, u ene, ‘Egu tau e, muari oa matam eai sora bena ea abihai,’ oeagi oa matam alona eai ie ota nige u ita. Oa tauboraborasom, oeagi matam boeana eai u abihai bagunai, arinai abo u itaitalolo muari em tau matana eai abo u abihai.

⁴³“Paana oeagi lolona uaua baaeana nige i uaedi: hinage oeagi baaeana uaua lolona nige i uaedi.

⁴⁴Hari oeagi, hari oeagi uauadi aridi eai ta italobaidi. Tatao lagau nurinurina eai kuhou nige se gigidi, hinage popohauhau eai vine nige se gigidi.

⁴⁵Tau lolona ginauri lolodi nuaboeana eai i toredi abo ginauri lolona i lahahaidi, eo tau baaeana hinage ginauri baaea nuaboeana eai i toredi abo ginauri baaea i lahahaidi: nuaboeana ena monau boriboriri arinai awana eai i ribaribaei.

⁴⁶“Aue saha esagu au ataatai, au ene, ‘Guiau e, Guiau e’ na egu riba nige au lauwataidi?

⁴⁷“Taba tau esa tau esa i laoma arigu eai, egu riba i ataiedi, eo i abiwataidi hinage, ana ao abo ea heitamiu: