Lukasi 6:19-47

¹⁹Wanhu weng'ha nawagana kumdoliza Yesu, nawona mong'ho wali ulawa mgati mwa heye na weng'ha waloholigwa.

²⁰Yesu kawalola walanguswa wa heye, kalonga, “Mbweda hemwe wazunwa, kwa vila Undewa wa Nguluwi wa hemwe.

²¹Mbweda hemwe mli na nzala sambi, kwa vila hamba mogutizwa. Mbweda hemwe muwele kulila sambi, kwa vila moza sechelela.

²²Mbweda hemwe wanhu wokwihilani, wokubagulani na kuwaliga, na kuwalonga hemwe mwiha kwa mbuli ya Mwana wa Munhu.

²³Msangalale na kuvina ago hogolawila, kwa vila chonolo chomuwichilwe kilanga chikulu. Kwa vila wasekulu wa hemwe na wawaditila waloli wa Nguluwi hiho.

²⁴Ila mane mwemwe hemwe muwele na lufufu, mina mhela wa hemwe wa kusechelela umala.

²⁵Mane mwemwe hemwe muwelengiguta sambi, mina hamba mohulika nzala! Mochona hemwe muwelenguseka sambi, mina hamba mozangulila!

²⁶Mogaya ng'hatu kota wanhu weng'ha, wone wanhu wawatogole, mina wasekulu wawo nawawaditila hiho waloli wa udesi.

²⁷“Ila ndangukulonjelani hemwe muwelengunyhulichiza, muwagane wang'honyo wa hemwe, muwadile ganojile wakwihileni.

²⁸Muwatambichize wala wawelenguwapanjilani, muwalandile kwa Nguluwi wawele nguwaditila gehile.

²⁹Munhu wone yakutowe izeze limwe mgalamlile na lya keli. Munhu wone yakusukule ikoti mlechele yahole na igwanda lyako.

³⁰Chila munhu yokulanda chinhu umhe, na munhu wone yakusukule chinhu cha hegwe uleche kumlonjela yakuhilulile.

³¹Waditileni wanhu kota vila vyomlingugana wanhu wawaditileni hemwe.

³²“Na wone mzenguwagana wala walinguwagana hemwe yeng'ha, mopegwa choni? Haduhu. Kwa vila na wehile nawo wanguwagana wala walinguwagana hewo.

³³Kahi wone mzenguwaditila ganojile wala wali nguwaditila hemwe ganojile mopegwa choni? Wehile nawo waditaga hiho.

³⁴Na wone muwaziche wala mlingona wokuhilusilani lelo mopegwa choni? Wehile nawo wawazikaga wali na gehile wayawo wogana wahilusilwe hihila.

³⁵Hebu, ila hemwe muwagane wang'honyo wa hemwe, na muwaditile ganojile, muwaziche mleka kugana kuhilusilwa na baho chila chompegwa chowa chikulu mowa wana wa Nguluwi mkulu nayali kuchanya ng'hatu. Kwa vila heye kana isungu na wala wohambe wamtogole na wanhu wehile.

³⁶Muwe na isungu kota Nguluwi wa hemwe vyoyawele na isungu.

³⁷“Mleche kuwatagusa wanhu wanji, namwe hamtagusigwa na Nguluwi, mleche kuwatagusa kwa wihe wanhu namwe hatagusigwa kwa wihe. Muwalechele wanji kwa gowaditile namwe molechelwa.

³⁸Muwape wanji gowawele ngugana, hemwe namwe mopegwa. Mobochela chipimo chinojile chimemile, chobamandizwa na kusunyunyiza sunyunyiza mbaka kubohoka. Kwa vila chipimilo chichila chomulinguwapimila wanji na heye Nguluwi kopimila chichila.”

³⁹Na baho Yesu kawalonjela nhelo imwe, wone muhnu yohambe yalole komlongoza miyage hambe yalole? Weng'ha weli wokwinjila mli ikulubila.

⁴⁰Mlanguswa hambe yamsinde mlangusa, ila yalingulanguswa wone yasinde, kanguwa kota mlangusa wa heye.

⁴¹“Ila kochona ndaze chibanzi chiwele miziho lya mng'holozo, ila uleka kuchona ching'hanzi chiwele miziho lya hegwe.

⁴²Koweza ndaze kumlonjela mng'holozo, ‘Mng'holozangu, Bete ndikuse chibanzi chiwele miziho lyako,’ Na kuno hambe uchone ching'hanzi chiwele miziho lya hegwe? Kwa mdesi hegwe! Tandi use chibanzi chiwele miziho lyako aho koweza kulavya ching'hanzi chiwele miziho lya mng'holozo.

⁴³“Igodi linojile halilelaga mafuza gehile, na hiho igodi lihile halilelaga mafuza ganojile.

⁴⁴Chila igodi lyozeleka kwa mafuza gake. Yangoneka wanhu hawabawaga masada kuli migodi jili na miwa, kahi hawabawaga ububu kulawa kuli mikwangwasale.

⁴⁵Munhu yanojile kangulavya ganojile, gawichigwe mnhumbula mwa heye, na munhu yehile kangulavya gehile kulawa mnhumbula ya heye, kwa vila munhu kalongaga kulawa gala gamemile mnhumbula ya heye.

⁴⁶“Lekachoni mwangunyhema, ‘Mkulu, Mkulu’ Na kuno hambe mdite gondilonga?

⁴⁷Munhu yoneche yokuya kwa heni na kunyhulichiza na kugadita.