1Tegani sa e manuša uštile thaj inđarde e Isuse ko Pilat.
2Thaj lije te vačaren: “Arakhljam le sar hohavol amare manušen, thaj ni dol te počinen o porez amare carose, a pese vačarol kaj si o Hristo, caro.”
3A o Pilat pučlja le: “Tu li san o caro e Jevrejengo?” A o Isus irindoj vačarda lese: “Gija si sar so tu vačare.”
4A o Pilat vačarda e glavnone šerutnenđe: “Me ni arakhav nisavo banđipe ane kava manuš.”
5A von dije zori vačarindoj: “Vov pire sikaimasa e manušen bunil ki sa i Judeja. Sikavol ki sa i Judeja. Počnisada ki Galileja thaj avilo sa đi kate ano Jerusalim!”
6Thaj kana šunda o Pilat, pučlja: “Vov li si tari Galileja?”
7Thaj kana šunda o Pilat kaj si o Isus tari Galileja bičhalda le ko Irod, golese so o Irod vladisada ani Galileja. A vov sasa an gola đivesa ano Jerusalim.
8Kana dikhlja o Irod e Isuse sasa but radujimo, golese kaj odavno manglja te dičhol le, golese kaj but šunda lestar, thaj dija gođi kaj o Isus ka čerol nesavo čudo angle leste.
9Thaj o Irod pučlja baše but buča, a o Isus khanči ni vačarda lese.
10A e šerutne e sveštenikurenđe thaj e učitelja tare Mojsijaso zakono ačhile, thaj but bilačhipe vačarde lestar.
11A o Irod thaj lese vojnikura lađarde thaj asaje e Isusese, urade le ano carsko fostano, thaj bičhalda le palal ko Pilat.
12Thaj ane gova đive mirisajle o Pilat thaj o Irodo maškare peste, golese kaj angleder sesa ane čingara.
13A o Pilat čidija e šorutnen e sveštenikurenđe thaj e barutnen thaj e manušen thaj
14vačarda: “Anden manđe kale manuše thaj phenen kaj e manušen bunil. Ake me angla tumende pučljem le, thaj ni arakhav ni jekh banđipe so tumen čhuven pe leste.
15A i o Irod ni arakhlja banđipe pe leste, golese bičhalda le palal amende, thaj ak khanči ni čerda te mudardol.
16Golese Ka šibi le thaj ka mukha le.
18A e manuša sa dije vika vačarindoj: “Le kale a muk amenđe e Varava!”
19(O Varava sasa čhudimo ano phanglipe golese so čerda pobuna ano Jerusalem thaj mudarda nekas.)
20A o Pilat vađi jekh drom vačarda kaj bi vov mučhola e Isuse.
21A von dije vika: “Čhu le ko krsto, čhu le!”
22Thaj o Pilat trito drom vačarda: “Savo bilačhipe vov čerda? Me khanči ni dikhav sose bi mudardol, gija ka šibiv le thaj ka mukhav le.”
23A e manuša po but vazdije po glaso thaj manglje te čhuvolpe ko krsto, thaj čerde okova so manglje.
24Thaj o Pilat vačarda te avol sar so e manuša manđen.
25Thaj mukhlja e Varava, savo sasa ano phanglipe bašo pobuna thaj bašo mudaripe, a e Isuse dija lenđe sar so manglje.
26Thaj kana inđarde e Isuse, dolde nesave Simone tari Kirinija savo avola taro polje, thaj čute pe leste o krsto te phiravol le palo Isus.
27A palo Isus đele pherdo manuša, thaj đuvlja save ruje thaj žalisade le.
28A o Isus okrenisajlo premal lende thaj vačarda: “Đuvljalen taro Jerusalim! Ma roven pale mande. Roven pale tumende thaj pale tumare čhave.
29Golese dik, aven e đivesa ane save ka vačaren: “Blagoslovime kola đuvlja save našti bijanen, thaj e ođenđe save ni bijande, thaj e čučenđe save ni dije čuči!”
30Tegani ka vačaren e planinenđe: “Peren pe amende”, thaj e bregurenđe: “Učharen amen!”
31Golese kaj ako akana čerolpe kava e činđe kaštesa, so ka avol taro šućesa?”
32Inđarde vađi duje bilačhe manušen e Isusesa te aven mudare.
33Thaj kana avile ke kova than savo akhardola kokalo e šoreso, gothe čute ko krsto e Isuse thaj e duje bilačhe manušen, jekhe tari desno rig a avere ki levo.
34A o Isus vačarda: “Dade! Oprosti lenđe, golese kaj ni đanen so čeren.” Thaj e vojnikura čhudije o barbuto thaj ulade maškar peste leso fostanuro.
35But manuša ačhile thaj dikhlje sa gova, a e barutne marde muj thaj vačarde: “Averen spasisada, so ni spasil korkoro pes akana, te si vov o Hristo, birimo e Devleso.”
36A e vojnikura marde muj lesa, thaj avile paše leste thaj dijele šut.
37Thaj vačarde e Isusese: “Te san tu caro e Jevrejengo, spasi korkoro tut.”
38A sasa pe leste upre pisimo kale lafurencar: “Kava si caro e Jevrejengo.”
39A jekh tare bilačhe manuša so sesa ko krsto e Isusesa marda muj thaj vačarda lese: “Te san tu o Hristo spasi tut thaj amen!”
40A o dujto ko krsto so sasa dija vika pe leste thaj vačarda: “Tu ni dara taro Dol, kana san i tu korkoro gija osudimo?”
41Amen sam čače osudime, golese sam kate amare bučenđe, a vov nisavo greh ni čerda.”
42Thaj vačarda e Isusese: “Isuse, detu gođi pe mande thaj av manđe milostivno kana ka vladi sar caro.”
43Thaj vačarda lese o Isus: “Čače vačarav tuče: avđive ka ave mancar ano raj.”
44A sasa popodne kana peli i rat ki sa i phuv đi ke trin popodne,
45thaj kalilo o kham. Golese i Hramsko perdava pharadili ke opaš.
46Thaj o Isus dija vika ande sa o glaso: “Dade! ane ćire vasta dav mo đi.” Thaj gole lafurencar mulo.
47A kana diklja o kapetano so sasa, lija te hvalil e Devle thaj vačarda: “Čače kava manuš sasa čačukane pobožno manuš!”
48Thaj sa e manuša save čidijepe te dičhen kava, kana dikhlje so sasa, irisajle thaj mardepe ane pire kolina tari žal.
49A kola so đanglje e Isuse thaj e đuvlja so avile lesa tari Galileja ačhile po dur thaj dikhlje kava.
50Sasa jekh manuš palo alav Josif, savo sasa jekh taro jevrejsko baro (veće). Sasa lačho manuš thaj čače pobožno
51tari Arimeteja, ano foro e Judejako. Vov ni složisajlo golesa so čerde e Isusese, thaj ađučarda o carstvo e Devleso.
52Đelo ko Pilat thaj rodije o telo e Isuseso.
53Thaj o Josip uljarda e Isuseso telo taro krsto thaj pačarda le pohtanosa, thaj čuta le ano limori savo sasa taro bar, ane savo khoni naj sasa čuto.
54Čerda gova ko paraštuj, a o savato lija te ikljol.
55A e đuvlja save avile e Isusesa andari Galileja, đele palo Josif i dikhlje o limori i sar čute e Isuseso telo.
56Irisajle čhere te čheren i sung thaj so te mačhen e Isuseso telo. Kana sa čerde, več avilo o savato i naštine čeren khančhi gova đive pale Mojsijaso zakono.
