1Kana vačarda o Isus sa kava angle manuša, đelo ano foro o Kafarnaum.
2Jekhe rimskone kapetano sasa jekh sluga savo sasa nasvalo đi o meripe, save vov but manglja.
3Thaj kana o kapetano šunda e Isusese, bičhalda leste e šerutnen e Jevrejenđe te molin le te avol te sastarol lese sluga.
4Von avile ko Isus thaj but molisade le vačarindoj: “Trubul gova te čere lese,
5golese kaj manđol amare manušen, thaj vov pestar čerda amenđe sinagoga.”
6Thaj o Isus đelo lencar. Thaj kana avile pašo čher, bičhalda o kapetano pe amalen te vačaren lese: “Rajo! Ma čhuv tuče gova pharipe golesa so ka de an mo čher, golese so me naj sem dostojno te ave tali mi streja.
7Golese ni mangljem te avav angle tute kaj naj sem dostojno. Vačar jekh lafi gothar thaj sigate ka sastol mo manglo sluga.
8Golese kaj sem i me manuš tale nekaso autoritet, thaj isi man tale mande vojnikura, pa vačarav jekhese: 'Đa'!, thaj đal. Vačarav dujtonese: 'Av!' thaj avol. Vačarav me mingre slugase: 'Čher' thaj čerol gova.”
9Thaj kana šunda gova o Isus, čudisajlo, thaj irisajlo e manušenđe save đele pale leste thaj vačarda lenđe: “Vačarav tumenđe, vađi ni arakhljem Jevreje ano Izrael kas isi gači pačaipe.
10Thaj kana irisajle čhere okola so sesa bičhalde, arakhlje e nasvale sluga saste.
11Na but pale gova, o Isus đelo ano foro savo akhardola Nain, thaj đele lesa lese sikade thaj pherdo manuša.
12Kana avile pašo vudar e foroso, thaj dik, nesave terne čhave ikalde mule, jekhore čhave ani dej, savako rom mulo. Pherdo manuša andaro foro đana lasa te prahon e čhave.
13Kana dikhlja la o Rajo, pelo lese žal lače, thaj vačarda lače: “Ma rov!”
14Avilo paše, dolda pe ko than kaj pašljardo sasa o mulo čhavo, thaj e manuša save inđarena le ačhile. Thaj o Isus vačarda: “Čhaveja! Tuče vačarav, “Ušti!” “
15O mulo čhavo đuvdilo em bešlo thaj lija te vačarol, thaj o Isus dija le lese dače.
16Savore darajle, thaj hvalisade e Devle. Vačarde: “Baro proroko maškar amende!” thaj: “O Dol avilo te pomognil pire manušenđe.”
17Kava šundilo taro Isus ani sa i Judeja thaj ane pašutne thana.
18Thaj vačarde e Jovanese lese sikade sa so o Isus čerda. Thaj akharda o Jovane pire dujen sikaden
19thaj bičhalda len ko Rajo te pučen le vačarindoj: “Tu li san gova save obećisada o Dol kaj trubul te avol, il te ađučara avere?”
20Thaj avile ko Isus gola duj manuša thaj phende lese: “O Jovane Krstitelji bičhalda amen tute te puča tut: 'Tu li san gova save obećisada o Dol kaj trubul te avol, il te ađučara avere?”'
21A ane gova časo o Isus sastarda buten taro lengo nasvalipe, tar lengo pharipe thaj tare bilačhe duxura, thaj bute koren dija dičhipe.
22Thaj o Isus phenda e Jovanese sikadenđe: “Đan thaj vačaren e Jovanese so dikhljen thaj so šunden: e kore dičhen, e banđe phiren, e gubava thodon, e kašuče šunen, e mule ušten, thaj okolenđe save si ani potreba vačarolpe o Lačho lafi.
23Thaj vačaren lese i kava: 'O Dol blagoslovil okole savo naj sablaznimo zbog mande!”'
24Thaj kana đele e sikade e Jovanese, o Isus lija te vačarol taro Jovane e manušenđe: “So ikliljen te dičhen ki pustinja? I trska, savi banđol ki barval? Na!
25Il so ikliljen te dičhen? Manuše ane barvale fostanura urade? Na! Gasave manuša phiraven barvale fostanura, thaj ano šukaripe bešen ane carska palate.
26Il ikliljen te dičhen? Proroko? Va, me phenav tumenđe vov si po but taro proroko.
27Golese so si o Jovane manuš kastar o Dol vačarda ane piro Sveto Lil: “Ak me bičhalav me glasniko angle tute, savo ka čerol tuće o drom angle tute.”
28Vačarav tumenđe, tare sa e manuša save sesa bijande ni sasa pobaro taro Jovane o Krstitelji, thaj po baro si lestar o em cikno ano Carstvo e Devleso.
29Sa e manuša so šunde e Isuse, pa i nesave carincura, pinđarde kaj si e Develeso sikaipe šukar thaj krstisajle e Jovaneso krstipe.
30A e fariseja thaj e učitelja tare Mojsijaso zakono čhudije o plan e Devleso savo sasa lenđe. Thaj von ni manglje o Jovane te krstil len.
31A o Isus vačarda: “Kasa te uporediv akale manušen save si akana đuvde? Thaj so te vačarav lendar?
32Von si sar manuša save bešen ko drom thaj akharen jekh avere thaj vačaren: “Bašaldam tumenđe vesela đilja, a tumen ni čhelden, bašaldam tumenđe žalosna đilja a tumen ni rujen.”
33Golese, avilo o Jovane o Krstitelji. Savo ni hal ni mangro ni pijol ni mol, a tumen vačaren: 'O beng ane leste!'
34Aviljem me, o Čhavo e Manušeso, savo hav thaj pijav, a tumen vačaren: 'Dik manuš halano thaj mato, amal e carinconengo thaj e grešnikurengo!'
35Al, sa gola so prihvatisade gova sikaipe, phende kaj si e Devleso butđanglipe čačukano!”
36Jekh fariseji kaso alav sasa Simon dija vika e Isuse te hal mangro ke leste, thaj vov đelo ano čher e farisejeso thaj čhutape pašo astali.
37Thaj dik, sasa i đuvli ando foro savače đanglja pe kaj si grešnica, šunda kaj si o Isus pašo astali ano čher e farisejeso, i avili andre. Anda skupo sung ko čaro savo sasa taro alabasteri.
38Rojindoj, peli ke pe koča pale lese pingre. Lače asva pele pe lese pingre thaj lija te thovol len pe jasvencar, thaj pe balencar koslja len thaj čumidija lese pingre, thaj makhlja len e mirosa.
39A kana dikhlja o fariseji savo akharda le, vačarda ane peste: “Te avol proroko, bi đanola ko si kaja đuvli savi dolol le golese kaj si grešnica!”
40A o Isus phenda lese: “Simone! Isima khanči te vačarav tuče. A vov vačarda: “Učitelju, vačar.”
41A o Isus vačarda: “Duj đene sesa borči jekhe manušese. Jekh sasa borči panšel rimska dinara a o dujto pinda.
42Thaj kana len naj sasa te irin, o manuš ni manglja palal o borči lendar. Vačar tare kala duj savo ka manđole po but?”
43A o Simon vačarda lese: “Pa bi phenava kolese kas sasa pobaro borči.” A o Isus vačarda lese: “Gija si, šukar vačardan.”
44Thaj irisajlo premali đuvli em vačarda e Simonese: “Dičhe li kala đuvlja! Me aviljem ane ćo čher, paj ni andan me pingrenđe, a voj pe jasvencar thoda len, a pe balencar koslja len.
45Ni čumidipe ni dijan man, a voj sar aviljem ni ačhili te čumidol me pingre.
46Uljesa ni makhljan mo šoro, a voj sungasa makhlja me pingre.
47Golese vačarav tuče: “Baro manglipe sikada manđe, golese so si lače oprostime but bare grehura. Al kase zala oprostime, sikavol zala manglipe.”
48A lače vačarda: “Oprostime si ćire grehura.”
49Thaj ane peste lije te vačaren kola so si lesa pašo astali: “Savo si kava so e grehura šaj oprostil?”
50A e đuvljaće vačarda: “Ćo pačaipe ikalda tut. Đa ano mir.”
