Jon 11:20-49

²⁰O Mata i longoro i lena o Iesu kura mo i wan nanan urin, ra i pirso, i wan barato i. Ikut o Maria i kis utmakai tiro urumu.

²¹O Mata i watungi tan o Iesu lena, “Labino, ra gunuk un kis ut nin, a tisinglik ken mat.

²²Ikut a tasmani lena, ra uniri un saring o God sur tu utna, in pitari kut tam.”

²³O Iesu i watungi tano lena, “O tisimlik in laun melet kut.”

²⁴O Mata i balu i lena, “A tasmani lena in laun melet una bung ra o God in ukatutur melet pas a taro gusun a minat.”

²⁵O Iesu i watungi tano lena, “Iau a nilaun melet gusun a minat, ma iau a nilaun mulus. Osi ra i nurnur un iau, ra in mat, in laun melet,

²⁶ma osi ra i laun ma i nurnur un iau, ken mat. Pepetlai, u nurnur ut una wasiso ri?”

²⁷O Mata i balu i lena, “Ma Labino, a nurnur lena ui a Karisito a Nutun o God, i ra o God i tulu ru i urin una rakrakon bual.”

²⁸Numur ra o Mata i sa watung tari lenri, i milet melet ma i kabo eno pas a tisino ino o Maria, ma i inanosi lena, “A Tene Ususer i sa wanpat ma i iting sur ui.”

²⁹O Maria i longoro i lenri, ra i pirso lakit ma i wan toromi.

³⁰O Iesu ke wanpat utmakai tiro utamon, i kis utmakai una nubual ra o Mata i barato pasi iai.

³¹A kum te Juda ra det kis tomo nam o Maria tiro urumu sur det in umaromi, det tama i ra i pirso lakit pas gusun det unago utamon, ra det muri. Uni det nuki lena in nan sur a kulam na minat sur in domos iai.

³²O Maria i wanpat una nubual ra o Iesu i kis iai, ra i tama pasi, i kis butkeke taru numugu nisano, ma i watungi lena, “Labino, ra gunuk un kis ut nin, a tisinglik ken mat.”

³³O Iesu i tama o Maria tomo nama kum te Juda ra det wan tomo nami det domos nanan, ra i nuknuk doko una niono ma in balano i maut doko.

³⁴O Iesu i ting det lena, “Kura mot ubek tar a minatino awai?” Det balu i lena, “Labino, wan urin sur un tama i.”

³⁵Ra o Iesu i tangis.

³⁶A kum te Juda det watungi lena, “Mot tama i, i maris doko i!”

³⁷Ikut ara taro tagun det, det watungi lena, “I utamtama pas a matan a pulu, ilai ra ke ulangolango pasi kai a musano ri, sur gong i mat?”

³⁸In balano Iesu i maut doko, ra i wanpat nisan a kulam na minat. A kulam na minat ra, a mato kura tiro una papor wat, ma di ubek bat tari nama labino wat.

³⁹O Iesu i watungi tandet, “Mot in bulus ru a wat.” Ra o Mata, a tisin a musano ra i mat, i balu i lena, “Labino, i sa sangnain, uni i sa wat na bung bat tari!”

⁴⁰O Iesu i watungi tano lena, “Pepetlai, ka watung tari tam lena, ra un nurnur un tama a minamar anun o God?”

⁴¹I mo ra det bulus ru a wat. O Iesu i tatado usapat netes, ra i watungi lena, “Tita, a watung wakak torom ui, uni u sa longoro iau.

⁴²A tasmani lena u ser longoro iau, ikut a wasiso lenri, kibino una taro ri, sur det in nurnur lena ui u tulu ru iau.”

⁴³I sa watung tari lenri, ra i kakabo namin labino walngano lena, “Lasarus, un pirso!”

⁴⁴O Lasarus i pirso, tomo nama kum malu ra di rau tar aru lamano ma aru kikino nami, ma ara du malu kai ra di pulus bat tar in masarino nami. O Iesu i watungi tandet lena, “Mot in palos ru a kum malu na minat gusuni sur in nan.”

⁴⁵I mo ra a susut na te Juda ra det kis nisan o Maria, det tama a utna ri o Iesu i pami, ma det nurnur uni.

⁴⁶Ikut ara taro tagun det ka det nurnur, ra det wan torom a kum Parisi ma det inanos det una utna ri o Iesu i pami.

⁴⁷A kum lamlabino tene etabor torom o God, ma a kum Parisi det kabo tomo a taro na kiwung, ma det watungi lena, “Asau dat in pami? A musano ri i pam a susut na utna na ukisin.

⁴⁸Ra dat in madek ru i, a taro rop det in nurnur uni, ma a kum taro na inaim tagitong o Rom det in nanpat ma det in rege ru anundat a rumu na etabor ma det in rakon ru anundat a gapman kai.”

⁴⁹Ara tagun det a risano o Kaiapas, a mugumugu na tene etabor torom o God una kilalo ra, i watungi lena, “Ai, ka mot mananos.