Hwan 11:20-49

²⁰A ta pakadangag ni Marta ta dumatang na hapa i Hesus a enna hapa dinafung, ammi nasirak hala i Mariya ta bali da en nga imatogkok.

²¹A ya uhohug ni Marta ta pagdafung na en te Hesus a “Ay, Afu, am dana itta kan mina sin a awena mina nasi na kabagis ken.

²²Ammi maski kunna ten a amuk ta maski am anu ya adangam ta Namaratu a iatad na hala teko,” kunna ha.

²³“Matolay hala sangaw ya kabagis men,” kunna hapa ni Hesus tentu.

²⁴“A amuk hala yen, Afu, te matolay kan hala sangaw ya ngamin kiden nagpasi ta araw na angtolay ta pagaddetan na arawin yan,” kunna ha ni Marta.

²⁵A ya uhohug para ni Hesus tentu a “Iyak hapa la ya agtolay, te iyak la ya pagafun na angat. A maski am masi ya mangurugen teyak a matolay hala.

²⁶A ya ngamin kiden matolay gafu ta pangurug da teyak a aweda sangaw mapidwa masi maski am kanu, te ittan ya angat da nga magnayun. Kurugam na de ya uhohug kin, Marta,” kunna.

²⁷“A kurugan ku ay, Afu, te iyak la takday a dana nangurugak na ta iko ya Anak na Namaratu ewan, ikid na Mangikerutan nga umange kan ta lutakin,” kunna.

²⁸A ta kabalin na nepangtabbag na en a nagtoli ta bali na, a nagan-anisat ta kabagis na en Mariya. “Ittan ya Mistro en, a paayagan na ka hapa,” kunna tentu.

²⁹A alistu imikkat i Mariya, a umange hapa te Hesus.

³⁰Ammi awena para la nakadulot ig Hesus ta agyan na babali kiden, te itta kid para la ta nangdafungan ni Marta tentu.

³¹A ta nepagtugut ni Mariya ta bali a dumadagdag hapa ya tolay kiden nga umange manabtabang ta damdam na en, te naita da tentu en imikkat, ammi pahig da ta ange ta agyan na tanamen magtangit.

³²A ta datang ni Mariya ta agyan ni Hesus a pa itan na bit kapye na umange nagtakab ta takki na kiden nagtangit. “Ay, Afu, am dana itta kan mina sin a awena mina nasi na kabagis ken,” kunna hapa tentu.

³³A ta nepakaita ni Hesus ta pagtangit na en ikid na dumadagdag kiden nga makatangtangit hapa a nanalasigak ta damdam na nonot na en hapa. A ya uhohug na hapa a

³⁴“Had mantu ya nangitanaman muy tentu,” kunna hapa tekid, a “E ka hala sin, Afu, te itam,” kunda.

³⁵A nagtangit na hapa i Hesus.

³⁶“Itan muy awa dakal hapa ya idduk na ta nasi en,” kun na Hudyo kiden.

³⁷Ammi ya uhohug na kadwan tekid a “Intu hala ya nakapaladdang ta mata na daramen, a anu kawagan na mantu ta awena kinahadan i Lasaru petta awena mina nasi?” kunda.

³⁸A ya lugar na nangitanaman da te Lasaru a kuman na kweba, a namunitan hapa ta dakal na batu. A ta datang da ta agyan na tanam na en a nanalasigak ha i Hesus, kapye na naguhohug.

³⁹“Azin muy haen ya batu ina,” kunna. Ammi nehangat na mina ni Marta, “Dulay de, Afu, am maazi, te pake mahuyuk na de, te mekappat na araw na,” kunna.

⁴⁰“Awek hud nebar teko ta maitam hala sangaw ya pakapangwa na Namaratu ewan am mangurug ka?” kunna hapa ni Hesus tentu.

⁴¹A inazi da mantu ya batu en. Nekaazi na batu en a tumangad hapa i Hesus nakimallak. “Amang, matalakak teko te dana dinangag nak.

⁴²A amuk hapa ta kanayun dangagan nak, ammi inuhohug ku yen petta madangag da hapa na tolay kidin mangkalihung ta isin, petta pangurugan da mina ta iko ya nangidob teyak,” kun na pakimallak na en.

⁴³A tentun nakauhohug ta kumanen a pake nagayag ta masikan. “Lasaru, imuhet kan,” kunna.

⁴⁴A limattog hala ya nasi en, ammi nafutfutan para la ta ga-gamit ta ulu na en abat ta takki na kiden, a nabadbadan hapa ya simid na ta panyaw. “Azin muy na ya nefutefut kiden, petta makatugut,” kunna hapa ni Hesus.

⁴⁵A ya Hudyo kiden nga nakihulun teg Mariya a mangurug kid na hapa te Hesus gafu ta iningwa na ta nasi en nga naita da.

⁴⁶Ammi ya kadwan tekid a umange kid ta Pariseyu kiden petta ipadamag da ya iningwa ni Hesusen.

⁴⁷A ta nepakadamag na Pariseyu kiden a sa nagmamiting kid na padi kiden ikid na kadwan kiden pinakadakal na Hudyo kiden. A ya bida da hapa a “Anu awan haman ta kwan tam, te addu para ya kwan na tolayin yan nga pagpaka-latan na tolay kiden.

⁴⁸A am awetam pagimmangan ya tarabaku na in a sa mangurug sangaw ya ngamin tolay ta intu ya ari da, a magribelde kid na sangaw ta gubyernu na taga Roma kiden. A yen sangaw ya ange na suddalu kiden taga Roma petta kutkutetan da ya lugar na pangdayawan tam ta Namaratu kontodu tolay tam kiden,” kunda.

⁴⁹A sangaw naguhohug hapa i Kaypas tekid, te intu ya kadakalan na padi kiden ta darunin yen.