IOANE 11:20-49

²⁰Mareta na Iesu e maiva herevana e kamonai, bena ia na ela Iesu ida bae hedavari; a Maria na ruma ai e noho.

²¹Bena Mareta ese Iesu e hereva henia, eto, Lohiabada e, oi na iniseni ai boma noho, taihugu na basinema mase;

²²to vada dibagu ina harihari Dirava enai ba noia ḡauna na Dirava ese baine henimu.

²³Iesu eto, Taihumu na baine tore isi lou.

²⁴Mareta eto, Dibagu dina gabena ai, tore-isi-lou dinana ai, ia na do baine tore isi lou.

²⁵Iesu eto, Tore-isi-lou be lau; mauri danu lau; lau e abiabiraigumu tauna, ena be baine mase, to do baine mauri.

²⁶E maurimu bona e abiabiraigumu taudia iboudiai na basie mase, lasi ona lasi vaitani. Ina hereva na o abia daemu a?

²⁷Hahine na e haere, eto, Lohiabada e, oibe; vada name kamonai lava dae, oi na Keriso, Dirava Natuna, e gwauraia gunava tanobada ai bainema tauna.

²⁸Ia na unu e gwau toma, bena ela, tadina Maria e boiria hehuni, eto, Hahediba tauna vada ema; ia ese oi e boirimumu.

²⁹Maria ese una hereva e kamonai, bena e tore isi haraḡa-haraḡa, ia dekena ela.

³⁰Una negana ai Iesu na hanua lalonai do se raka vareai, a Mareta ida e hedavari gabuna ai e nohova.

³¹Taunabunai, Iuda taudia, Maria ida ruma lalonai e nohova e hamarumaruava taudia, ese Maria e itaia, e tore isi haraḡa-haraḡa, e raka lasi; bena idia ese e ḡavaia, badina be idia banava eto ia na gara bainela, mase tauna taina baine tai.

³²A Maria na Iesu e nohova gabuna ai e kau, e itaia, bena aena badinai e goru diho, eto, Lohiabada e, oi na iniseni ai boma noho, taihugu na basinema mase.

³³Maria bona hari Iuda taudia ia ida e raka hebouva na e taiva; bena Iesu ese e itadia, ia lalona e hisihisi bada, darana e doko.

³⁴Bena e henanadai, eto, Edeseni ai o atoa? Idia e haere, eto, Lohiabada e, aoma, a itala.

³⁵Iesu vada e tai.

³⁶Bena Iuda taudia eto, A itaia, ia ese e lalokau henia bada.

³⁷A haida eto, Ina mata-kepulu matana e hapapa tauna na ina tau ena mase ilao-ahuna asi dibana a?

³⁸Iesu lalona ma e hisihisi lou; bena ia na gara ela. Una gara na kohua; iduarana ai nadi ta vada e kurea ahu.

³⁹Bena Iesu eto, Nadi a kurea oho. A Mareta, mase tauna taihuna, eto, Lohiabada e, ia na vada eme bodaga, badina be dina hani vada e mase.

⁴⁰Iesu ese e haere henia, eto, Lau na hamaoromu, ani, ba heabidadama, bena Dirava hairaina do ba itaia.

⁴¹Bena idia ese nadi e kurea oho. Bena Iesu e gaga dae, e ḡuriḡuri, eto, Tamagu e, na hanamomumu, badina be oi ese vada o hakala henigu.

⁴²Lau na dibagu oi na nega idoidiai o hakala henigumu; ḡau tamona, ini hutuma e ginigu heḡeḡemu daidiai unu na gwau toma, bae abia dae oi ese o siaigu helaoreana.

⁴³Unu e ḡuriḡuri toma, bena e lolo badabada, eto, Lasaro e, a raka lasi.

⁴⁴Bena mase tauna na e raka lasi, aena imana e hirilai dabuadia bona vairana e kumilaia mukon; l na do mimia. Iesu eto A ruhaia, a kahua nege.

⁴⁵Bena Iuda taudia hutuma, hari Maria dekena ela bona Iesu ena kara e itaia taudia, ese Iesu e abiabiraia.

⁴⁶A haida na Farisea taudia dekedia ela, Iesu ena kara e hamaaorolaidia.

⁴⁷Una dainai, hahelaḡa taudia bona Farisea taudia na kaunsil taudia e boiridia hebou, eto, Ede baita kara toma, badina be una tau ese toa diaḡau e karamu?

⁴⁸Ita na basita ruamu, taunimanima iboudiai ese bae abiabiraia; bena Roma taudia baema, eda Dubu Helaḡa bona eda bese bae abi oho.

⁴⁹Bena idia ta, ladana na Kaiafa, una laḡani ai ia na hahelaḡa tauna badana, ese e gwau henidia, eto, Umui na ḡau ta asi dibamui;