Dyan 11:20-49

²⁰Di kaklinge Marta mdadong Dyisas, lamwà kenen du snitongan, bay fanak Méri di gumnèla.

²¹Na man Marta di ku Dyisas, “Amu, ku alò ge dini di kafdas lagimi là sa moon mati.

²²Kabay gadègu balù ani, ku tan i fnim di Dwata blén ge.”

²³Na man Dyisas di kenen, “Mték lêman lagim.”

²⁴Na man Marta, “Hae, gadègu mték kenen lêman du magin kenen di kték dad to mati kadang di fulé duh.”

²⁵Na man Dyisas di kenen, “Agu sa mték i dad mati, na agu sa mlé nawa, taman balù simto to faglut di deg balù ku mati kenen, mto kenen lêman.

²⁶Na balù dad to mto fa ku faglut ale di deg nun nawala landè sen. Man, fnaglutam kè i mangu ani?”

²⁷Tmimel Marta, manan, “Hae Amu, fnaglutgu ge i Tingà Dwata, dunan Krayst i Mgalék Dwata fakangan fsalu dini di tah tanà.”

²⁸Di kafnge Marta man ani mulê kenen, na tlon flanekan Méri du stulen alò ale, manan, “Tadini i To Tamdò, na snalekan ge.”

²⁹Di kaklinge Méri dun, gasil kenen tadag na smitong ku Dyisas,

³⁰du là fa kel Dyisas di gumnè ale Méri, bay déén fa kenen di gusmitong Marta kenen.

³¹Nun dad Dyu dademe Méri di gumnean mlala kenen, na di kitela kenen gasil tadag na lamwà, mlalò ale kenen du man nawala ku salu kenen di lbang du mngel ditù.

³²Di kakel Méri di gufanak Dyisas teenan kenen, na lkuad kenen di munan, manan, “E Amu, ku alò ge dini, là moon mati i flanekgu.”

³³Di kite Dyisas mngel Méri na i dad Dyu mlalò kenen, too matdel i nawan na mlidù,

³⁴na manan, “Tanè i gulambangyu kenen?” Na tmimel ale, “Ditù ito, Amu, fye teenam.”

³⁵Na mngel Dyisas.

³⁶Taman man i dad Dyu, “Neyeyu, too bong nawan ku Lasarus.”

³⁷Kabay man i dademe, “Kenen sa i fgulê i to butè, kan ku laan gafgulê ku Lasarus du fye laan mati?”

³⁸Na lêman too matdel nawa Dyisas, na salu kenen di gulambangla ku Lasarus, dunan satu ilib, na nun batu sang di baan.

³⁹Na man Dyisas, “Nwèyu i batu én.” Kabay Marta, libun i to mati, manan, “Amu tafat butang i klon lbang, na tasasè nan i bunan.”

⁴⁰Na man Dyisas di kenen, “Làgu kè gman di ge teenam kadang i kdatah Dwata, ku faglut ge?”

⁴¹Taman nwèla i batu sang i lbang. Na lngalà Dyisas di langit, na manan, “Mà, bong fye di ge du fanlingem agu.

⁴²Gadègu galam agu fanlinge, bay mangu ani mdà di dad to tadag dini, fye faglut ale na ge i mdek deg.”

⁴³Na kafngen man ani, toon falbong i taluan tamlo, manan, “E Lasarus, lamwà ge!”

⁴⁴Na lamwà i tamati, na maglabéd i blian na sigalan safut gal fungas i to mati, na nun safut labéb di bawehan. Na man Dyisas di dale, “Nbelyu safut fungas kenen du fye gagu.”

⁴⁵Na dee di dad Dyu mlalò ku Méri na mite i nimò Dyisas ani faglut di kenen.

⁴⁶Kabay dademe di dale, salu ale di dad Farisi, na tulenla dale i mgimò Dyisas ani.

⁴⁷Taman stifun i dad ulu i dad bà di Dwata na dad Farisi magin i dademela dad gal mukum, na stulen ale, manla, “Tan i kiboito ku Dyisas, du dee tnikeng mgimoan?

⁴⁸Du ku bayaito, faglut i kdee dad to kadang di kenen, na salu dini i dad ganlal di banwe Roma du falmola i gumangamfuito na banweito ani.”

⁴⁹Na talù satu di dale déén dnagit ku Kayafas, dunan i gumdatah i dad bà di Dwata di fali én, na manan, “Landè sa gnadèyu!