San Juan 11:20-49

²⁰Gate ben Marta ba za' Jesús, na' guzé̱'e̱ zeajxrígale̱' Le̱', na' María begá'ane̱' xu'u.

²¹Marta guzre̱' Jesús: ―Xran, chela zu' nigá, quebe gute bi zana'.

²²Neda' nezda' Dios gunne̱' Lue' bítete̱ze da nabu'.

²³Jesús gunné̱': ―Webán bi zanu'.

²⁴Nadxa Marta guzre̱' Le̱': ―Nezda' webane̱' lu zra xelexebán benne' gate ca', zra bze̱be na'.

²⁵Nadxa gunná Jesús: ―Neda' naca' benne' dxusebáne̱' benne' gate ca', ne benne' dxunne̱' xel-la' nabán li lazre'. Nu benne' dxéajle̱'e̱ chia', lácala gatie̱', webane̱',

²⁶na' xúgute̱ benne' zaj naca bane̱', ne dxeléajle̱'e̱ chia', québequeze xelatie̱' tu chi'ize. ¿Dxéajle̱'u da nigá?

²⁷Marta guzre̱' Jesús: ―Awe', Xran. Neda' dxéajle̱'a nacu' Cristo, Zri'ine Dios, Bénnea' guche̱be lazre' Dios sel-le̱'.

²⁸Ca gudé gunná Marta da nigá, na' guxíaje̱' xeajzenne̱' bi bile̱' María, na' guzre̱' le̱' zrize: ―Ba bla' Benne' dxuse̱de, ne dxenné̱' lue'.

²⁹Ca ben María da nigá, na' guxase̱' guzé̱'e̱, xeajnné̱'e̱ Jesús.

³⁰Jesús quebe ne chu'e̱ xe̱zre na', na' zue̱' naga bezraga Marta Le̱'.

³¹Benne' judío ca' zaj zra' xu'u na' dxulunézruje̱' María xel-la' zren lazre', gate belelé'ene̱' guxasa María, ne chadí bdxúaje̱', na' xjácale̱ benne' caní le̱', dxeléquene̱' zéaje̱' dxu'a ba zeajchezre̱' na'.

³²Gate bzrin María naga zua Jesús, na' bzu zribe̱' zran ni'a Jesús, gunné̱': ―Xran, chela zu' nigá, quebe gute bi zana'.

³³Gate ble'e Jesús dxebezre María, ne cá'anqueze dxelebezre judío ca', benne' zjácale̱ne̱' María, na' bexíajele̱'e̱ne̱', ne guzúe̱' ste̱be lu lázrdawe̱'.

³⁴Na' bche̱be̱' benne' ca': ―¿Ga bcáchele bénnea'? Na' gulé̱'e̱ Le̱': ―Xran, gudá le'enu'.

³⁵Na' gudxezre Jesús.

³⁶Nadxa gulenná benne' judío ca': ―Le nna'xque cátite̱ nazrí'ine̱' le̱'.

³⁷Bal-la benne' ca' gulenné̱': ―Benne' nigá bexune̱' benne' la chul-la. La zue̱' nigá, ¿quebe guzéquene̱' ájala gune̱' chee̱ quebe gute Lázaro?

³⁸Jesús guzúe̱' ste̱be xetú, na' bzrine̱' dxu'a ba. Ba na' naca na tu bluaj, na' da' tu xiaj ta'a dxu'e na.

³⁹Gunná Jesús: ―Le xecá'a xiaj nigá. Marta, bi zan benne' gate na' guzre̱' Jesús: ―Xran, ba dxelá bénnea' tula, lawe' da ba guca tapa zra na'a gutie̱'.

⁴⁰Na' Jesús gunné̱': ―¿Quebe gucha' lue' che chéajle̱'u chia', walé'enu' xel-la' szren chee̱ Dios?

⁴¹Nadxa belexequé̱'e̱ xiaj ta'a na'. Jesús guné̱'e̱ xabáa, gunné̱': ―Xrae, dxapa' Lue': “Xcalenu'” lawe' da ba bennu' chia'.

⁴²Neda' nezda' tu dxénzquezenu' chia'. Dxennéa' da nigá chee̱ gaca tu da ba neza chee̱ benne' caní, chee̱ xeléajle̱'e̱ chiu' nasel-lu' neda'.

⁴³Ca gudé gunné̱' da nigá, na' gunné̱' zizraj: ―¡Lázaro, bedxúaj nigá!

⁴⁴Bedxúaj benne' gate na', nadxéaj ni'a ne̱'e̱ nen ládxe'dau' da buluchele̱' ni'a ne̱'e̱, na' lawe̱' dxela na ladxe'. Jesús guzre̱' benne' ca': ―Le xese̱zre̱', ne le gusane̱' xexíaje̱'.

⁴⁵Nadxa guléajle̱ benne' zan chee̱ Jesús, benne' judío ca' xjácale̱ María, ne belelé'ene̱' ca da be̱n Jesús.

⁴⁶Bal-la benne' ca' xjaque̱' xeajlechálajle̱ne̱' benne' fariseo ca', na' buluzenne̱' le̱' ca da be̱n Jesús.

⁴⁷Nadxa fariseo ca', ne benne' xíchaje̱ ca' chee̱ bxruze ca' belezrague̱' nen benne' xu'u lawe' blau chee̱ judío ca', na' gulenné̱': ―¿Ájazra gundxu? Benne' nigá dxúnle̱'e̱ xel-la' waca da za xabáa.

⁴⁸Che ca' güedxu Le̱' lataj, xúgute̱ bénneache xeleajlé̱'e̱ chee̱' chee̱ xuluzúe̱' Le̱' ca wenná bea, na' xelelá' benne' Roma ca', benne' zjaque̱' wedil-la, na' xuluzría xi'e̱ xudau' chee̱dxu, ne xe̱zr la xu chee̱dxu.

⁴⁹Nadxa tu benne' le̱' Caifás, bxruze blau iza na', guzre̱' benne' ca': ―Le'e québequeze bi nézele,