Yohana 11:20-49

²⁰Bai Malita pajoa Yesu atendakuika, ngajenda kumpokela, nambu Maliamu ngaika kachakwe.

²¹Malita ngannengela Yesu, “Angwana, makabi upamba, Nhwacha gwito kabi ajomwikeje!

²²Nambu maanyi mpaka ngoe chachoa cha mpa kunnenge Nnoongo, mampa.”

²³Yesu ngannengela, “Nhwacha gwinu mayoka.”

²⁴Malita ngajanga, “Manyi mayoka mangobu ga kuyoka, lichoba lya kupela.”

²⁵Yesu ngannengela, “Nenga nga kuyoka na bwomi. Ojwaamini nenga ata akajomwike malama.

²⁶Na kila ojwalama na kuamini nenga aweje ngu. Bo, kuamini genago?”

²⁷Malita ngannengela, “Elo Angwana! Nenga amini mwenga nga Kilisto, Mwana jwa Nnoongo, jwajo ojwaika padunia.”

²⁸Bada ja kulenga genago, Malita ngajenda kunkema Maliamu nnombo mundu, ngannengela pantemela, “Mmoli abi pamba, ankema.”

²⁹Jwombe apajoa gena kingobucho ngajinuka, nukunnyendelela Yesu.

³⁰Yesu akiba anajingije pikijiji, ila akiba tango paali upapa apampokila Malita.

³¹Bai Akayahudi babakiba pamwe kachakwe Maliamu babakiba kumpe pole pabamona ajinwike nukupita panja chokwe, ngabankengama. Bakita akiba kujenda kamakabuli kulombola.

³²Bai Maliamu apaika paali pena apabi Yesu nukummona ngakilikitila, nukunnengela, “Angwana makabi upamba, akaka bango kabi bawije!”

³³Yesu apammona akaguta na Akayahudi babaika pamwe, nangweto uyo baguta, ngabe na chimbaa, na laaje kumwojo gwakwe.

³⁴Kibokachapenia ngabankonya, “Mammekiti ko?” Ngabannyanga, “Angwana, nhwike nnole.”

³⁵Yesu ngaguta.

³⁶Akayahudi ngabalenga, “Nnolange apampaile!”

³⁷Nambu kati jabe ngabalenga, “Bo, jonjo nganhwekwi mio jwangalola jola, kuotoje kuntenda Lazalo akaweje?”

³⁸Bai Yesu akiba na laaje kabele kumwojo, ngaika kamakabuli likabuli lyene lyakiba nduka, liekiligwe kwa libwe!

³⁹Yesu ngalenga, “Mmoyange libwe lyene!” Malita, nnombo mundu jwajo ojwawile, ngannengela, “Angwana, tayali atumbu kununga, atamite mulikabuli machoba ncheche!”

⁴⁰Yesu ngannengela, “Bo, nanengije anda nhwamini mamikibona kibumo cha Nnoongo?”

⁴¹Bai ngabaliboya libwe lyene. Yesu ngalola kunani kumbingu, ngalenga, “Nanumba ma Awawa kwa magambu umbi kunyoa.

⁴²Maanyi umbi kunyoa machoba goa. Nambu nengite genago magambu ga bandu ababi pamba bapate kuamini kutenda mwenga maundumite.”

⁴³Apajomola kulenga genago, ngakema kwa lilobe likolongwa, “Lazalo! Mpite panja!”

⁴⁴Jwajo ojwakiba ajomwike ngapita panja, kongo bantabite chanda mumakongono na mumaboko, nukumio jakwe kuwekeligwe. Yesu ngabalengela, “Mankulugule, manneke ajabule.”

⁴⁵Bai Akayahudi ajingi bakiba baike kwa Maliamu pabalola gena agatendite Yesu, ngaba nhwamini.

⁴⁶Nambu kati jabe ngabajenda kwa Mafalisayo ngabape nhwalo gwa ikobo eyatendite Yesu.

⁴⁷Akakung'i akolo na Mafalisayo ngababe na machabuli makolongwa, ngabalenga, “Tutendi nii? Mundu jonjo alaya iingi yi ikobo nduu muno.

⁴⁸Anda tunnekite tu bandu boa mabanhwamini, na Akaloma mabaika kualabia nyumba jito ja Nnoongo na kilambo chiito!”

⁴⁹Pena jumwe kati jabe ojwakonda Kayafa, ojwabi nkung'i nkolo chaka chenie, ngalenga, “Mangwetumwenga, mmanyije kilebe!