JUAN 11:20-49

²⁰Goṉ Mart pa lo ziaad Jesús, dzigo briee me biaad-xinëz me Jesús; laa Marí biaaṉ ro yu.

²¹―Jesús ―rëb Mart―, teḻne niaca miṉe nu no luu segur niete bzian naa;

²²sac naṉ naa, grëtaa ncuaaṉe rnab luu lo Dios, ruṉ me miṉe rnab luu.

²³―Peet tsienied guic luu ―rëb Jesús―, ible zrieeban bzian luu.

²⁴Pquiab Mart, rëb Mart: ―Nliw, naṉpaa naa ible zrieeban me gaḻ dze ne laa guidzliu rii nitlo, zeeṉe grëse meṉgut, laa zho grieeban.

²⁵Dzigo rëb Jesús: ―Naa nac meṉ ne rbeeban grë meṉgut, ni naa nac meṉ ne rdeed guieḻmban lo grë miech. Grëse zha ne dib zdoo gliladz naa, niicle guet zho zig ret grëraa miech rii, zdziṉ dze ne gban zho stib.

²⁶Sac grëse zha ne dib zdoo rliladz naa, laa zho bgaale tib guieḻmban ndzon ga, guiaaṉd zho ladznia guieḻgut. ¿Led rliladz luu lëë Mart, ne sca gaca?

²⁷―Rliladz naaw ―rëb Mart―. Rliladz naa ne luu nac meṉ ne bzooblo Dios ga, luu nac Xpëëd Dios, Meṉ ne zëëble diidz ga cxeeḻ me guiaad lo guidzliu.

²⁸Blozhse ga, wbire Mart zie Mart zietsedz Mart Marí. Bdziṉ Mart zhliaanse bredz Mart Marí (sac nzian zha ne ndxie ga ziequiaabdiuzh Marí) rëb Mart: ―Niinapaale blanso Maestro, na laa me rbeedz luu.

²⁹Zigne bin Marí sca rëb Mart, briee nguzhooṉ Marí laa Marí zie nëz co.

³⁰(Bdziṉ Marí, laa Jesús bii zo zaatne güeydzieel Mart me ga; gase blëz me, bzëëbd me lad guiedz.)

³¹Grë meṉ Israel, zha ne ndxie lidz Marí ga ziechoobladz zdoo me, zeeṉe goṉ zho sca lëëlëd briee me, naḻaque zho zhits me; sac naṉ zho bod ro xpaa bzian me ziegoon me.

³²Zigne bdziṉ me zaatne zo Jesús ga, pquiitsgzhib me lo Jesús. ―Jesús, luu ne nac luu meṉ ne rnabey ―rëb me―, teḻne niaca miṉe nu no luu zeeṉe blanguidz bzian naa, niete me.

³³Psilo Marí roon Marí. Zeeṉe goṉ Jesús, niicle Maríw, niicle grë zha Israel ne bdziṉ ga, mban rac zho, grëse zho roon, dzigo ye me biab guieḻnë me.

³⁴Bnabdiidz me rëb me: ―¿Pa lo pqueets to me? ―Dë gaṉle ―rëb zho―, zeeṉa gaṉ luu pa lo bgueets me.

³⁵Horco psilo Jesús biin me.

³⁶Grë zha Israel co, zeeṉe goṉ zho roon me, rneechaa zho: ―¡Goḻwi gaṉle, blactaa nquialadz me Lazh!

³⁷Laa zla zho rnee: ―Led me name beeṉguiac lo mgui ne roḻd lo ga, ¿pe nrieelod zha niuṉ me, zeeṉa niete Lazh?

³⁸Zeeṉe laa Jesús bdziṉ ro baaṉ Lazh, biire biab guieḻnë me. Zig nac tib bliee niaa baa co; rna tib quie nroob ntse zaatne rsëëb zho ngutoo;

³⁹dzigo bnabey Jesús cob zho quie co. Pquiab Mart, bzian ngutoo co rëb me: ―¡Mazd gdioobda! ¡Nadze rac tap ngbidz gut me, mbanle na rlaa me!

⁴⁰Dzigo rëbchaa Jesús: ―Led laa naa nile lo luu, teḻne dib zdoo luu rliladz luu naa, bii zaṉ luu gaṉle zha nactaa grë ncuaaṉe ndzon ne ruṉ Dios.

⁴¹Zeeṉe blozh bdob zho quie co, dzigo blis Jesús lo me nëz gbaa, ni rëb me: ―Dios, luu ne nac luu Pxoz naa, xquizh xquieḻnzaac luu sac rquiaadiag luu miṉe rne naa.

⁴²Naṉ naa tibaque rquiaadiag luu miṉe rnee naa, per laa naa rzeta niina, zeeṉa grëse miech ne ndxie nu gliladz zho gaṉle ne nli luu pxeeḻ naa.

⁴³Dzigo nguiedz bredz me, rëb me: ―¡Lazh, briee i!

⁴⁴Zigne sca bnee me, laa ngutoo co briee ga, scase nrieḻ lar dib nia me, dib ni me ne, ni nioog stib lë lar lo me. Dzigo rëb Jesús: ―¡Goḻxadz grë lar ne nrieḻ me i, zeeṉa guey me!

⁴⁵Grë meṉ Israel ne güeynaḻ zhits Marí ga, zeeṉe goṉ zho sca bleeban Jesús Lazh, nzian zho bliladz ne nli Dios pxeeḻ me.

⁴⁶Nogaa zho leḻ güey zho güeyzodiidz zho lo grë zha farisé zha bleeban me Lazh.

⁴⁷Horco lëëlëd pcaalsa grë pxoz ne rnabey, ni grë zha farisé, rëb zho: ―¿Pe gnë to dieṉ zha gaca? ¿Zha dziuuṉ ne mgui ne rnee zho Jesús ga, sac goṉ pe zhidaa milagr ne quiayuṉ me?

⁴⁸Teḻne squise csaan ne me, mbe grëse miech sëëb xnëz me; lozh ga, zeeṉe gacnaṉ meṉ rnabey ne zob Romaw, laa me cxeeḻ grë xmeṉguiib me guiaadnitlo zho xyadoo ne, guiaadnitlo zho ladz ne.

⁴⁹Dzigo pquiab Caifás, meṉ ne nac pxoz nroob leṉ iz co, rëb me lo zho: ―¡Ni lal nu lëë peet rieṉde to!