Jon 17

1

2

3

4

5

6

7

8

9

10

11

12

13

14

15

16

17

18

19

20

21

¹Ra o Iesu i sa watung rop tar a kum wasiso ri, i tamtama tito usapat una langit, ra i watungi lena, “Tita, a du bung i sa wanpat, un pitar a minamar torom o Nutum, sur o Nutum in pitar a minamar torom ui.

²U pitar tar a dekdek tang sur an warkurai sur a taro rop, sur an pitar a nilaun tukum torom det rop ra u pitar tar det tang.

³A nilaun tukum i lenri: A taro det in tasman ui, ra ui kut a God mulus, ma det in tasman o Iesu Karisito kai, i ra u tulu ru i urin.

⁴A sa pam sot pas a kum pinapam ra u pitar tari tang sur an pami. Ma una pinapam ra, a sa ese tar a minamarim nin una rakrakon bual.

⁵Tita, uniri, ra an kis tomo melet nam ui, un pitar a minamar tang. A minamar ra numugu a kis uni tomo nam ui, ra ka di ukisi utmakai a rakrakon bual.

⁶“Det ra u sa pilok pas det gusun a rakrakon bual, ma u pitar tar det tang, a sa watung puaso tar ui tandet. Det anumi, ra u pitar tar det tang, ma det sa mur anum a kum wasiso.

⁷Uniri, det sa tasmani lena a kum utna rop ra u pitar tari tang, i wanpat mulus ut tagisapat tam.

⁸A sa inanos tar det nama kum wasiso ra u pitar tari tang, ma det sa muri. Ma det tasman mulusi lena a wan ut tagisapat tam, ma det sa nurnur lena ui ut u tulu ru iau urin.

⁹“A wararing sur det. Awu sur a wararing sur a taro tagun a rakrakon bual, ikut a wararing sur det ra u pitar tar det tang, uni det anum.

¹⁰Det rop ra anung, anum utkai, ma det rop ra anum, anung utkai. Ma anung a minamar din tama i un det.

¹¹Uniri an nan torom ui, kan kis suano i melet mo nin una rakrakon bual, ikut det, kuri utmakai det una rakrakon bual. Tita, ui u tasur sakit, un tamtamabat det nama dekdekin a risam, a rising ra u pitar tari tang. Un tamtamabat det sur det in takai kut, elar nam ui ma iau, dar takai kut.

¹²A kis tomo nam det, ra a tamtamabat det nama dekdekin a risam, a rising ra u pitar tari tang. A tamtamabat det, ma kataio tagun det i iru. Ara sot kut in iru, o Judas, i ra i wan sur a iniru tukum. I wanpat lenra, sur din pam sot pas a wasiso ra di sa tumus tari una Buk Tabu.

¹³“Iri an nan torom ui, ikut a watung a kum wasiso ri ra a kis utmakai nin una rakrakon bual, sur anung a labino gasgas in ubukus anundet a nilaun.

¹⁴A sa watung tar anum a kum wasiso tandet, ma a rakrakon bual i nget det, uni awu sur det taginin una rakrakon bual, elar nam iau kai, awu sur iau taginin una rakrakon bual.

¹⁵Ka saring ui sur un rakon ru det gusun a rakrakon bual, awu. Ikut a saring ui sur un tamtamabat det gusun a Tene Sakino.

¹⁶Awu sur iau taginin una rakrakon bual, ma det kai awu sur det taginin una rakrakon bual.

¹⁷Anum a kum wasiso i lingmulus. Un utalapor det nam anum a lingmulus na wasiso, sur det anum a taro mulus.

¹⁸U tulu ru iau urin una rakrakon bual, lenkutkai ra iau, a tulu ru det una rakrakon bual.

¹⁹A pitar tar iau ut torom ui, sur det kai, det anum a taro mulus una num a lingmulus na wasiso.

²⁰“Awu sur a wararing kut sur det, a wararing utkai sur a taro ra numur det in nurnur un iau, a taro ra a kum tene nurnur det in wasiso puaso un iau torom det.

²¹Tita, a wararing lena det rop ra det nurnur un iau, det in takai kut, elar nam ui kuri un iau ma iau kura un ui. A nemi sur det in laun un dar, sur a taro una rakrakon bual det in nurnur lena ui u tulu ru iau urin.

²²A sa pitar tar a minamar tandet, a minamar ra u pitar tari tang, sur det in takai kut, elar nam dar, ra dar takai kut.

²³Iau kura un det, ma ui kai kuri un iau, sur det ara mukut, sur a taro nin una rakrakon bual det in tasmani lena, u tulu ru iau urin, ma det in tasmani kai lena, u nem det elar nami ra u nem iau.

²⁴“Tita, a nemi sur det ra u sa pitar tar det tang, det in kis tomo nam iau una tamon ra an kis iai, sur det in tama anung a minamar, a minamar ra u pitar tari tang, uni u nem iau numugu ra ko ukisi utmakai a rakrakon bual.

²⁵Tita, ui u tokodos, a taro nin una rakrakon bual ka det tasman ui. Ikut iau, a tasman ui, ma anung a taro na ususer kai, det tasmani lena ui, u tulu ru iau urin.

²⁶A sa watung puaso tar ui torom det, ma kan mana nama wasiso talapor un ui torom det, sur det in tasman ui, sur a marmaris ra u nem iau nami, in kis un det ma iau kai an laun un det.”