John 11:20-49

²⁰Tana bona Martha te rongovia na maiana Jesus, gaia te rughuhoru me va sodoa, ma Mary te kabu so tana vale.

²¹Ma Martha te bosa vania Jesus, “Lord, ke vagha ko ghahagho tua iani ke, na vavinegu ke mua mate!

²²Mi nau tu ghilala hughu itaeni, God ke lubatia vanigho na hava tua ko nongia itatana.”

²³Ma Jesus te bosa vania, “Na vavinemu ke ghoi vola oli so.”

²⁴Martha te bosatughu, “Inau tu ghilalaa gaia ke tughuru oli tana bongi sosoko.”

²⁵Ma Jesus te bosa vania, “Inau na tughuru oli mana vola. Ahei tua ke taluutuniu ke, ke vola, sakai vamua ke mate.

²⁶Ma hei tua te loghoa na vola maurihali me ke taluutuniu, ke mua ghoi mate tua. ?O taluutunia sughua eni?”

²⁷Ma Martha te ghaghua vania, “Eo Lord! Inau tu taluutunigho ighoe na Messiah, Dalena God! Ighoe agaia God te baubahu ge ke mai tana maramana.”

²⁸Mi murina Martha te bosa eni, agaia te pulohi tana vale, me va holokeha hoghona heghena, me bosa vania, “E mai tua na Tarai, me liona na righiamu.”

²⁹Tana bona Mary te rongovia eni, agaia te tapatughuru me mina me vaa righia.

³⁰Tana bona keri, Jesus te ghaha mua i paribebetena na komu, tana bona te sodoa iga Martha.

³¹Na vure tara kabu kolua Mary tana vale, mara kokoe togholuvua, tara saritaonia tana bona tara righia te mina tapatughuru me rughuhoru. Gaira tara ghanaghana ke me va tangi tana vatuluma ni beku.

³²Ma Mary te sara me righia mua Jesus, agaia te tualaghi tuturu vania me ghaghua, “Lord, ke vagha ko ghahagho tua iani ke, na vavinegu ke mua mate!”

³³Mi tana bona Jesus te righia Mary te tangimate, me righira ghua na vure tara ghaha kolua tara tangi ngangaraha. Na kutuna Jesus te dikalio me kanoragha ngangata.

³⁴Ge huatira me ghaghua, “?Ivei tau tavughia?” Agaira tara bosatughu, “Lord, ko mai righia.”

³⁵Jesus te tangi.

³⁶Keri ge na vure tara righia ge ra bosa, “Ko righia, agaia te dolovi ngangataa.”

³⁷Hauva balu itadira tara bosa heghedira, “Agaia te kisu utoa na matana te rorodo. ?E ghua ge mua nea siki totobo me ke bei mate Lazarus?”

³⁸Ma gaia Jesus te ghoi vahaghitaili tana tarungana so, me tona tana tavughi, na vatuluma ni beku tara pata nia na vatu na mataulana.

³⁹Jesus te vetenara, “Kau lavikeha na vatu!” Ma Martha, na vavinena na tinoni te mate, te ghaghua, “Lord, e mabulu tua itaeni na pukuna e vati tua na bongi taeni te mate.”

⁴⁰Ma Jesus te bosa vania, “U bosa vanigho tua, ge toko taluutuniu ke, mi geva ko righia nina maana God.”

⁴¹Ma gaira tara bokihi kehaa na vatu. Ma Jesus te rei dato ikokou me kokoeliulivuti, “Mama, inau tu holoutogho to rongovia nigua na kokoeliulivuti.

⁴²Inau tu ghilala to rongoviu haia, mu bosa ladaa itaeni, na pukuna na vure raini kara taluutuniu ighoe to niu vetena mai.”

⁴³Mi murina te bosa eni, Jesus te nia hoholo na manga sule me ghaghua, “Lazarus, ko tughuru dato mai.”

⁴⁴Ma gaia Lazarus te tughuru dato mai, na limana mana tuana te poroi so na tivi ni tavughi, mana tivi te virighia na uluna. Ma Jesus te bosa vanira, “Kau toghia, ma kau lubatia me ke tona.”

⁴⁵Me subo na vure tara mai kaoa Mary mara righia na hava te gonia Jesus, ge ra taluutunia.

⁴⁶Mana balu tadira tara pulohi tadira na Pharisee mara bosa vanira na hava te gonia Jesus.

⁴⁷Ma gaira rana Pharisee mana lei manesukaghi kamanagho tara talughoni kolura na Ovu ni Dete mara ghaghua, “?Na hava ka gonia? Na mane eni te gonighi subo na lei vaughilala butuli!

⁴⁸Ke vagha ka lubatia ge ke nia tona haliu na gehegehe eni ke, igeva na lei tinoni soko kara taluutunia. Mi geva na habadira na Rome kara tughuru ma kara dikalaa dida na Valetabu, mana kemada udolu tua!”

⁴⁹Ma sakai tadira na ahana Caiaphas, na puku ni sonisukaghi tana niulu keri, te bosa, “Sakai sughua na bulemiu ighau!