1O Iesu i watungi lena, “A inanos mot nama lingmulus, i ra ke ruk una matansako tagun in noworo na sipsip, ma i ka tito kut unarumu, i a tene wolong ma a tene ras orosi kut a kum utna.
2Ikut a musano ra i ruk una matansako, i a tene tamtamabat mulus anun a kum sipsip.
3A tene tamtamabat ina matansako in papos saro tari sur in ruk. A kum sipsip det longoro lele in nalngano. I ser kabo det nama kum risandet ma i ser ben pirso det.
4In ben pirso rop pas anun a kum sipsip, ra in mugu pas det ma det in muri, uni det longoro lele in nalngano.
5Ka det in mur tu usiro, det in kalabor gisen kut gusuni, uni ka det longoro lele in nalngano.”
6O Iesu i watung a wasiso elelar ri tandet, ikut ka det tasman asau ra i wasiso uni.
7I mo ra o Iesu i watung meleti lena, “A inanos mot nama lingmulus, iau a matansako anun a kum sipsip.
8Det rop ra det wanpat mugu tang, a kum tene wolong ma a kum tene ras oros pas a kum utna, ma a kum sipsip ka det longoro det.
9Iau a matansako, osi ra i ruk uni, din ulauni. In ruk ma in pirso ma in etoromi kut ana utna na inangon.
10A tene wolong i ruk kut sur in wolong, ma in um doko a kum sipsip ma in ban laulau det. Ikut iau, a wanpat sur det in utur ukai a nilaun, a nilaun ra i bukus nama wakakino.
11“Iau a wakak na tene tamtamabat anun a kum sipsip. A pitar anung a nilaun sur an mat bat det.
12A musano ra di kuli kut, awu sur a tene tamtamabat mulus anun a kum sipsip, ma a kum sipsip awu sur anunu. Ra in tama pas a ngalngalia na pap in nanpat, in kalabor pas gusun a kum sipsip, uni i papam kut sur a mani, ma ke maris a kum sipsip. Ma a ngalngalia na pap in karkarot det ma in lu sarara ru det.
14“Iau a wakak na tene tamtamabat anun a kum sipsip. A tasman anung a kum sipsip, ma anung a kum sipsip kai det tasman iau,
15elar nam o Tita i tasman iau, ma a tasman o Tita, ma a pitar anung a nilaun sur an mat bat det.
16Anung a ramano kum sipsip kai, ka det kis unin noworo na sipsip ri. An ben pas det utkai, ma det in longoro in nalngang, sur det rop det in kis kut unin teken noworo, ma ara sot kut in tene tamtamabat anundet.
17“O Tita i nem mulus iau, uni iau ut a pitar anung a nilaun, sur numur an los melet pasi.
18Kataio in rakon ru anung a nilaun, iau ut an pitari. Iau ut a utur ukai a dekdek sur an pitari, ma iau ut a utur ukai a dekdek sur an los melet pasi. Iri i a pinapam ra o Tita i tulu ru iau sur an pami.”
19A kum te Juda det tapagol una kum wasiso ri anun o Iesu.
20A susut tagun det, det watungi lena, “A laulau na nion kura uni, ma i sa toboroboro. Asau ra mot longoro i suri?”
21Ikut ara taro det watungi lena, “Awu sur a ngas na wasiso ri anun taio ra a laulau na nion kura uni. Pepetlai, a laulau na nion in pet lar pasi sur in utamtama a taro ra det pulu?”
22Numur det ukinalong a labino bung na lotu sur det in nuk melet pas a bung ra det papos a rumu na etabor uni. Det ukinalong a labino bung na lotu ri sapat o Jerusalem epotor una kum kalang na kotokoto.
23O Iesu i wan nanan una parada ra di watungi nama parada anun o Solomon, una rumu na etabor.
24A kum te Juda det tur talilis pas o Iesu, ma det tingi lena, “Nangisin mo un inanos mulus met? Ra ui a Karisito, un inanos talapor met.”
25Ra o Iesu i balu det lena, “A sa watung tari tamot, ikut ka mot nurnur. A kum pinapam ra a pami una risan o Tita, det wasiso talapor un iau.
26Ikut ka mot nurnur, uni awu sur mot anung a kum sipsip.
27Anung a kum sipsip det ser longoro in nalngang. A tasman det, ma det ser mur iau.
28Ma a pitar a nilaun tukum tandet, ma ka det in iru. Ma kataio in ras ru det gusun a lamang.
29O Tita ra i pitar tar det tang, i labo taun a kum utna rop, ma kataio in ras ru det gusun a laman o Tita.
30Mir nam o Tita, mir takai kut.”
31A kum te Juda det los watat melet sur det in duku doko o Iesu nami.
32O Iesu i watungi tandet lena, “A sa ese tar mot una susut na pinapam, ra o Tita i pitar tari tang sur an pami. Osi na utna tagun a kum pinapam ri, ra a pami, ra mot nem na duku iau uni?”
33Det balu i lena, “Met nem na duku ui, awu sur un tu utna na ukisin ra u pami, awu, uni u watung laulau o God! Ui a musano kut ui, ra u watungi lena ui o God.”
34O Iesu i watungi tandet lena, “Di sa tumus tari una numot a Warkurai lena o God i watungi lenri, ‘Mot a kum god.’
35I watung det lena det a kum god, det ra di pitar tar a wasiso anun o God tandet. Ma kataio in pet lar pasi sur in rakon ru a wasiso na Buk Tabu.
36Ma iau, o Tita ut i pilok pas iau, ma i tulu ru iau urin una rakrakon bual. Ra ilai ra mot takun iau lena a watung laulau o God uni a watungi lena, iau a Nutun o God?
37Ra ka ser pam a kum pinapam anun o Tita, gong mot nurnur un iau.
38Uniri a pami ut anun a kum pinapam. Ikut ra ka mot nurnur una nung a wasiso, mot in nurnur un iau kibino una kum pinapam a pami, sur mot in tasmani lena o Tita kuri un iau, ma iau kura un o Tita.”
39Ara dino melet det nem na pam ukai o Iesu, ikut i wan eno pas kut gusun det.
40O Iesu i wolos melet a danim Jodan sur a nubual ra numugu o Jon i baptaiso iai, ra i kis tiro.
41A susut na taro det wan torom o Iesu ma det wasiso etetalai torom det lena, “O Jon ke pam tu utna na ukisin, ikut a kum wasiso rop i sa watung tari una musano ri, i lingmulus sakit.”
42Ma a susut na taro tiro iai det nurnur uni.
