Ioane 11:20-49

²⁰Mareta wasana i ataiei Iesu i laolaoma, i laubagibagiei bena se hailobai: na Maria numa eai i bawabigabiga.

²¹Mareta Iesu abo i heriba i ene, “Guiau e, oa taba inai, lougu taba nige i mate.

²²Na taiede ea nuatui wau ta saha saha u awanori Eaubada arinai Eaubada abo i leawa.”

²³Iesu ia i heriba, i ene, “Sora loum abo i torouio.”

²⁴Mareta ia i heriba i ene, “Ea nuatuiyao huia murimuritana eai torouio asubenana eai abo i torouio.”

²⁵Iesu ia i heriba i ene, “Eau torouiona, eo maurina ede: ia i awamamohoiegu, ena i matearirio, abo i mauri.

²⁶Esau ma maumaurina eai i awamamohoiegu taba nige i mate. Meta wa u awamamohoiei?”

²⁷Mareta abo i heriba i ene, “Guiau e, e: ea awamamohoiei oa Keriso, Eaubada Natuna, iaede wa si ene ia abo i laoma tanoubu eai ta.”

²⁸Ie riba ina doha, abo ie lau ena doga Maria i eogamahimahihiei, i ene, “Tanuaga i lagema, i hetalam.”

²⁹Riba wa i ataiei, i toroheuheula ie lau ia arinai.

³⁰(Iesu sora nige i lagema eanua, Mareta ena aba laubagibagiena wa, arinai mo ma bawana).

³¹Iudea tataodi wa maedi Maria numa eai se babawa, ia nuana se ribahebigabiga wa, Maria se ita i toroheuheula i lulage murimuri eai, se hemuriwatai si ene, “Abo i lau bousa eai ne, i doudou.”

³²Maria abo i lage Iesu ena aba bawa eai, ia ie ita i guridobi aena eai, i ribalau ia arinai i ene, “Guiau e, oa taba inai, lougu taba nige i mate.”

³³Iesu ia ie ita i doudou, Iudea tataodi maenayao se laoma wa hinage se dou, arinai nuana i amamna ariri, eo i nuadubu hinage.

³⁴I ene, “Haedi edi abatorena ede?” Se heriba si ene, “Guiau e, u laoma u ita.”

³⁵Iesu abo ie dou.

³⁶Iudea tataodi abo si ene, “I gadosisidumadumai wa?”

³⁷Isi headi si ene, “Teina tau ta taumatagibugibuna wa matana i helaladi, nige ena gigibori gonoana ina tau ta matena abo i ribanuahi wa?”

³⁸Iesu nuana i hisihisiliuio i lagema bousa eai. Bousa wa duhana ede, we’u esau i ota‐tawai.

³⁹Iesu i ene, “We’u me au buihesuara.” Mareta, taumatematena louna wa, ia i heriba i ene, “Guiau e, nuana abo i boha’o; paana i mateo asubena hasi.”

⁴⁰Iesu ia heriba i ene, “Ea heribam e nige’e, ea ’ne, taba u sunumaei, Eaubada hedebasaena abo u ita?”

⁴¹Arinai abo we’u wa se buihesuara. Iesu matana i helabaisini i ene, “Tamagu e, ea lautoiem ta, egu riba u ataieyao.

⁴²Eo ea nuatuiyao huia gamagamagari u ataiegu: taiede ina tatao se torohetaiirigu ta arinai ea ’ne ina doha, isi abo se sunumaei, abo si ene oa u hetamarigu ede.”

⁴³Ie riba ina doha abo ie eogalau ma arina lailaina i ene, “Lasaro e, u pesama.”

⁴⁴Taumatemate wa abo i taulagema, sinare wa sumana aena eo nimana se audidinidi: matana hinage se umui. Iesu i heribadi i ene, “Au eairi, abo i lau.”

⁴⁵Iudea tataodi gamagaridi se laoma Maria arinai wa, eo Iesu ena laulau wa se ita abo se awamamohoiei.

⁴⁶Na headi abo se lau Parisea tataodi aridi eai, ginauri Iesu i ginauridi wa se heribadi.

⁴⁷Kohena lailaidi eo Parisea tataodi sunederi eai se oigogo, si ene, “Edoha eda abiabina? Teina tau ta heiheinoi gigibori gamagaridi i ginauridi ta.

⁴⁸Ena iabom, ena ia nige ta ribanuahi, tatao gamagaridi ia abo se awamamohoiei: Roma tataodi ata hinage se laoma eda aba oigogo tabuna eo eda basileia ta se girihaidi.”

⁴⁹Adi sagu esau, esana Kaiapa, nei borimaina eai ne ia kohena lailaina, i heribadi i ene, “Omi nige ginauri esau abina au ata.