Ioanes 11:20-49

²⁰Marta lao rongadar, me Iesus kotido, ap koieila tu ong i. A Maria momod nan im o.

²¹Marta ap potoan ong Iesus: Maing, ma re kotikot met, ri ai ol sota pan mela.

²²Ari so, i asa meakot re pan kotin poeki ren Kot, Kot pan kotiki ong ir.

²³Iesus kotin masani ong i: Ri om ol pan maureda.

²⁴Marta potoan ong i: I asa, me a pan maureda ni ias en ni ran nik o.

²⁵Iesus kotin masani ong i: Ngai kamaur o maur, me poson ia, pan memaureta pil murin a mela.

²⁶A meamen me maur o poson ia, sota pan mela kokolata; koe kamelele mepukat?

²⁷A potoan ong i: Ei Maing, i poson, me ir me Kristus Sapwilim en Kot, me udan pwara dong sappa.

²⁸A lao indada met, ap koieila ren Maria ri a li, monginki ong i: Saunpadak kotidor kainoma uk.

²⁹A lao rongadar, ap uda, madang wei re a,

³⁰A Iesus saikenta lel ong kanim o, pwe a kotikoteta wasa Marta tu ong i ia.

³¹Sus oko, me mi re a nan im o, pwen kamait i ala, lao kilangada, me Maria madang uda tang wei, rap idauenla i, indinda: A pan ko ong ni sousou, pwen sangesang ia.

³²Maria lao lel wasa o, o kilang i, ap poridi ong ni aluwilu a indang i: Maing, ma re kotikot met, ri ai ol sota pan mela.

³³Iesus lao masani i sangesang, o Sus oko, me iang i kokodo pil sangesang, ap kupurola,

³⁴Masani: Komail pwilikidi ia i? Irail potoan ong i: Maing, kotido masani.

³⁵Iesus kotin tontonir.

³⁶Sus oko ap inda: Kilang duen a pok ong i!

³⁷A akai ir me indada: A so kak pan men et me kapad pasang mas en me maskun o, me ol men et ender mela?

³⁸Iesus pil kupurola koti dong sousou o. A por o ulong nan kisin dol o takai eu mi poa.

³⁹Iesus kotin masani: Katapure wei takai en! A Marta, en me melar ri a li, indada: Maing, a matalar, pwe a mi met pong pa pong.

⁴⁰Iesus kotin masani ong i: I so indai ong uk, ma koe poson, koe pan kilangada lingan en Kot.

⁴¹Irail ap katapure sang takai o. A Iesus kotin masanda masani: Sam, I danke komui, me komui mangi ia er.

⁴²A i asa, me komui kin mangi ia ansau karos, a pweki pokon o, me u sili, I indaki mepukat, pwe irail en poson, me komui, me kadar ia do.

⁴³A lao kotin masani met, ap kapitie laudeta masani: Lasarus, koieido!

⁴⁴A me melar o ap pedoido, likau en sousou kidim pena na o pa kan, o mas a me pirapinki pena lim en puto. A Iesus kotin masani ong irail: Lapwada kapitila i!

⁴⁵Men Sus toto, me ko dong Maria, o kilanger, me Iesus kotin wiadar, posonla i.

⁴⁶A akai ir kowei ren Parisär oko, kaire kin irail me Iesus kotin wiadar.

⁴⁷Samero lapalap o Parisär akan ap pokon pena kapung indada: Da me kitail en wiada? Pwe aramas men et kin wia kilel toto.

⁴⁸Ma kitail sota pan mokidi ong i, karos pan posonla i, o men Rom pan kodo, ki sang kitail wei o atail kainok.

⁴⁹A amen irail ad a Kaipas, me samoro lapalap ni par o, indang irail: Komail meid so lolekong.