Text copied!
CopyCompare
Buk Baibel long tokples Kandas - Jon

Jon 14

Help us?
Click on verse(s) to share them!
1O Iesu i watungi tandet lena, “Gong a balamot i mamaut, mot in nurnur un o God, ma mot in nurnur kai un iau.
2A rumu anun o Tita, a susut na kukur rumu kura uni. Ma ra awu, an inanos mot ut uni. An nan sur an waninar tar a dino sur mot.
3Ra a sa waninar tar a dino sur mot, an milet melet, ma an ben pas mot torom iau sur mot kai mot in kis una tamon ra a ser kis iai.
4Mot tasmani ut a kisapi sur a tamon ra an nan suri.”
5O Tomas i watungi tano lena, “Labino, ka met tasman a tamon ra un nan suri, ra met in tasman petlan a kisapi suri?”
6O Iesu i balu i lena, “Iau a kisapi, ma iau a lingmulus, ma iau a nilaun. Kataio in nan torom o Tita un tu kisapi gisen, un iau kut.
7Ra mot in tasman mulus iau, mot in tasmani kai o Tita. Uniri mot sa tasmani, ma mot sa tama tari.”
8O Pilip i watungi tano lena, “Labino, un ese tar o Tamam torom met, i kut ra met nemi.”
9O Iesu i balu i lena, “Pilip, a sa kis suano i tomo nam mot, pepetlai, ko tasman iau utmakai? Osi ra i tama iau, i sa tama tar o Tita. Sur asau u watungi lena an ese tar o Tita torom mot?
10Pepetlai, ko nurnur lena iau kura un o Tita, ma o Tita kuri un iau? A kum wasiso ra a watungi tamot, awu sur anung. O Tita ra kuri un iau i pam anun a pinapam.
11Mot in nurnur un iau ra a watungi lena kura iau un o Tita, ma o Tita kuri un iau. Ma ra ka mot nurnur una nung a wasiso, mot in nurnur kut un iau, kibino una kum utna na ukisin ra a pami.
12“A inanos mot nama lingmulus, o naro ra i nurnur un iau, in pam a kum pinapam elar nami ra iau a ser pami. Ma in pam a kum lamlabino pinapam taun a kum pinapam ra a sa pam tari, uni an nan torom o Tita.
13Ma a kum utna rop ra mot saringi nama risang, an pam sot pasi, sur o Tita in los a minamar un o Nutunu.
14Ra mot in sasaring sur tu utna nama risang, an pam sot pasi.
15“Ra mot in nem iau, mot in mur anung a kum warkurai.
16Ma an saring o Tita, ra in tulu ru ara Tene Warut bulung torom mot, sur in kis tukum torom mot.
17I a Tokodos na Nion, ra in upuaso a lingmulus. A taro tagun a rakrakon bual ka det in nemi, uni ka det in tama lele i ma ka det in tasmani. Ikut mot, mot tasman a Tene Warut, uni i kis tomo nam mot ma in kis un mot.
18Ra an nan gusun mot, ka mot in kis na nat na soi, uni an milet melet kut torom mot.

19“Ken suano i kut, ra a taro tagun a rakrakon bual ka det in tama melet iau mo. Ikut mot, mot in tama iau. Ma mot in laun, uni a laun.
20A bung ra an katutur melet gusun a minat, mot in tasmani lena kura iau un o Tita, ma mot kai kuri un iau, ma iau kura un mot.
21Osi ra i utur ukai anung a kum warkurai ma i muri, i ra i nem iau. O Tita in nemi, ma iau kai an nemi, ma an ese iau toromi.”
22O Judas (awu sur o Judas Iskariot) i ting o Iesu lena, “Labino, sur asau ra un ese tar ui torom met kut, ma awu sur torom a taro una rakrakon bual?”
23O Iesu i balu i lena, “Ra taio i nem iau, in mur anung a kum etowo. O Tita in nemi, ma mir nam o Tita mir in nan toromi, ma mir in kis tomo nami.
24Osi ra ke nem iau, ken mur anung a kum etowo. A kum wasiso ra mot longoro i awu sur anung, anun o Tita, i ra i tulu ru iau urin.
25“A watung a kum wasiso ri torom mot, ra a kis utmakai tomo nam mot.
26A Tene Warut, a Tokodos na Nion ra o Tita in tulu ru i una risang. In ususer mot una kum utna rop, ma in unuk tar mot melet nama kum wasiso ra a sa watung tari tamot.
27A pitar a malmal torom mot. Anung a malmal ra, a tabor mot nami. Ka tabor mot elar nama rakrakon bual i etabor. Gong a balamot i mamaut, ma gong mot ngara.
28Mot sa longoro tari, ra a sa watung tari torom mot lena, ‘An nan pas ma an milet melet torom mot.’ Ra mot nem iau, mot in gas ra an nan torom o Tita, uni i, i labo tang.
29A sa inanos mugu tar mot una kum utna ra numur in nanpat, ma ra i sa wanpat, mot in nurnur.
30“Kan wasiso liklik mo torom mot, uni a labino taginin una rakrakon bual milau mo in nanpat. Kalako dekdekino sur in winim pas iau nami,
31ikut an pam sot rop pasi ut a kum pinapam ra o Tita i tulu ru iau sur an pami, sur a rakrakon bual in tasmani lena a nem o Tita. “Mot tur, dat na wan.”