SAN JUAN 11:20-49

²⁰Tya cuayáꞌ ndyuna nguꞌ chaꞌ cua lijya̱ Jesús, hora ti ngutuꞌu Marta ndyaa chaꞌ tyacua tyaꞌa loꞌo Jesús tyucui̱i̱. Sca ti María ndyanu niꞌi̱.

²¹Loꞌo liꞌ nchcuiꞌ Marta loꞌo Jesús: ―Ná ngujuii tyaꞌa ngula naꞌ si ngutiꞌi̱ nuꞌu̱ ca nde, cusuꞌ ―nacui̱ nu cunaꞌa̱ biꞌ jiꞌi̱ Jesús―.

²²Pana jlo tiꞌ naꞌ chaꞌ masi juani cuaꞌni ycuiꞌ Ndyosi lcaa chaꞌ nu jña nuꞌu̱ jiꞌi̱ Ni.

²³Liꞌ nguxacui̱ Jesús chaꞌ jiꞌi̱ Marta biꞌ: ―Tyuꞌú tyaꞌa ngula nuꞌu̱ chaca quiyaꞌ.

²⁴―Jlo tiꞌ naꞌ chaꞌ chaca quiyaꞌ tyuꞌú yu biꞌ nu loꞌo tyuꞌú lcaa jyoꞌo loꞌo cua tye ti chalyuu ―nacui̱ Marta.

²⁵Liꞌ nguxtyacui Jesús chaꞌ loꞌo nu cunaꞌa̱ biꞌ: ―Naꞌ laca̱ nu nduꞌni chaꞌ tyuꞌú ñati̱, naꞌ laca̱ nu nduꞌni chaꞌ chañi caca tsoꞌo cresiya jiꞌi̱ ñati̱ ―nacui̱ Jesús―. Masi cajaa nguꞌ, tya tyuꞌú nguꞌ biꞌ chaca quiyaꞌ, caja chalyuu cucui jiꞌi̱ nguꞌ si cua ngusñi nguꞌ chaꞌ jnaꞌ ―nacui̱ Jesús jiꞌi̱ Marta―.

²⁶Loꞌo juaꞌa̱ lcaa ñati̱ nu tsoꞌo ti ndi̱ꞌi̱ tyiquee chaꞌ ngusñi nguꞌ chaꞌ jnaꞌ, ná nscua chaꞌ cajaa nguꞌ biꞌ tsiyaꞌ ti. ¿Ha jlya tiꞌ nuꞌu̱ chaꞌ biꞌ?

²⁷―Chañi chaꞌ jlya tiꞌ naꞌ, cusuꞌ ―nacui̱ nu cunaꞌa̱ biꞌ―. Hasta juani jlya tiꞌ naꞌ chaꞌ nuꞌu̱ laca Cristo nu ñati̱ tlyu biꞌ, nuꞌu̱ laca nu sca ti Sñiꞌ ycuiꞌ Ndyosi, loꞌo juaꞌa̱ cua nda Ni jinuꞌu̱ lijya̱.

²⁸Ndye nchcuiꞌ Marta, liꞌ ndyaa nu cunaꞌa̱ biꞌ, cuaana ti ngusiꞌya jiꞌi̱ María tyaꞌa ngula: ―Cua tyalaa ti nu Mstru biꞌ juani ―nacui̱―. Nxiꞌya yu jinuꞌu̱ chaꞌ tsaa nuꞌu̱ slo yu.

²⁹Loꞌo ndyuna María chaꞌ biꞌ, hora ti ngutuꞌu ndyaa slo Jesús liꞌ.

³⁰Tya lyiji tyalaa Jesús quichi̱, tya ngaꞌa̱ yu su ndyacua tyaꞌa Marta loꞌo yu tya tsa̱ la.

³¹Loꞌo nu nguꞌ judío nu ndiꞌi̱ nxtyucua jiꞌi̱ María niꞌi̱ ni, loꞌo naꞌa̱ nguꞌ chaꞌ tsa tsiyaꞌ ca ngutuꞌu María ndyaa, liꞌ ndyaa lcaꞌa̱ nguꞌ jiꞌi̱ choꞌ; ngua tiꞌ nguꞌ chaꞌ toꞌ cuaá ndyaa choꞌ chaꞌ cunaa choꞌ.

³²Loꞌo liꞌ ndyalaa María ca su ndu̱ Jesús. Loꞌo naꞌa̱ choꞌ jiꞌi̱ yu, hora ti ngutu̱ sti̱ꞌ choꞌ slo Jesús. Loꞌo liꞌ nacui̱ María biꞌ: ―Si ngutiꞌi̱ nuꞌu̱ tsubiꞌ, cusuꞌ ―nacui̱―, ná ngujuii tyaꞌa ngula naꞌ liꞌ.

³³Xñiꞌi̱ tsa ñaa xtyiꞌi Jesús liꞌ, ndube tsa tiꞌ yu chaꞌ ndyunaa María, loꞌo juaꞌa̱ ngusiꞌya tsa nguꞌ judío tyaꞌa ndyaꞌa̱ María.

³⁴Liꞌ nchcuane Jesús jiꞌi̱ nguꞌ: ―¿Macala nguxatsiꞌ ma̱ jiꞌi̱ jyoꞌo biꞌ? ―Tsa naꞌa̱ na xi jiꞌi̱, cusuꞌ ―nacui̱ nguꞌ liꞌ.

³⁵Loꞌo Jesús ngusiꞌya liꞌ.

³⁶―Tyacaꞌa tsa jyoꞌo biꞌ jiꞌi̱ Jesús, ntsuꞌu tsa tyiquee yu ñaꞌa̱ yu jiꞌi̱ ―nacui̱ nguꞌ judío biꞌ.

³⁷Loꞌo juaꞌa̱ ndiꞌi̱ xi nguꞌ nu nacui̱: ―¿Ni chaꞌ laca ná ngujui ñiꞌya̱ nu cuaꞌni yu chaꞌ ná cajaa Lázaro nquichaꞌ? Nchca jiꞌi̱ yu cuaꞌni yu chaꞌ tyaca tsoꞌo cloo nguꞌ cuityi̱ꞌ.

³⁸Ca chaca quiyaꞌ xñiꞌi̱ tsa ñaa xtyiꞌi Jesús, loꞌo liꞌ ndyaa yu ca toꞌ cuaá. Sca tyuquee laca, loꞌo ndu̱ sca quee tlyu ndyacu̱ꞌ tuꞌba tyuquee biꞌ.

³⁹―Clyatsuꞌ ma̱ quee cua ―nacui̱ Jesús. Liꞌ nchcuiꞌ Marta tyaꞌa ngula jyoꞌo biꞌ loꞌo Jesús: ―Tyucu̱ tsa xtyiꞌi caca si tyuꞌutsuꞌ quee cua, cusuꞌ ―nacui̱―. Cua jacua tsa̱ nguatsiꞌ jyoꞌo re.

⁴⁰Liꞌ nacui̱ Jesús: ―Caca ñaꞌa̱ ma̱ chaꞌ tlyu tsa nu nduꞌni ycuiꞌ Ndyosi nu loꞌo jlya tiꞌ ma̱ jiꞌi̱ Ni. ¿Ha siꞌi juaꞌa̱ ni naꞌ jiꞌi̱ ma̱ tsa̱?

⁴¹Liꞌ ngulotsuꞌ nguꞌ quee nu ndyacu̱ꞌ tuꞌba tyuquee biꞌ. Liꞌ nguxñaꞌa̱ Jesús nde cua̱. ―Sti naꞌ ―nacui̱ Jesús liꞌ―, tsa xlyaꞌbe hi̱ chaꞌ cua ndyuna nuꞌu̱ chaꞌ nu nchcuiꞌ naꞌ loꞌo nuꞌu̱.

⁴²Lcaa tsa̱ cua jlo tiꞌ naꞌ chaꞌ nduna nuꞌu̱ lcaa chaꞌ nu nchcuiꞌ naꞌ loꞌo nuꞌu̱; pana nchcuiꞌ naꞌ loꞌo nuꞌu̱ juani xquiꞌya ñati̱ nu ndiꞌi̱ re, chaꞌ taca ca jlya tiꞌ nguꞌ jnaꞌ chaꞌ chañi chaꞌ cua nda nuꞌu̱ jnaꞌ lijya̱a̱ chalyuu.

⁴³Liꞌ cui̱i̱ tsa nchcuiꞌ Jesús: ―Lázaro, tyuꞌu nuꞌu̱ su ntsuꞌu nuꞌu̱ ndacua, tya̱a̱ nuꞌu̱ nde liyaꞌ re.

⁴⁴Liꞌ ngutuꞌu nu ngua jyoꞌo biꞌ; ñaꞌa̱ ti tya ngüixi̱i̱ lateꞌ ngati̱ tyucui ñaꞌa̱ hichu̱ꞌ, ñaꞌa̱ ti tya ndyacu̱ꞌ chaca lateꞌ loo. ―Xati̱ꞌ clya ma̱ lateꞌ nu ntsuꞌu chu̱ꞌ yu cua ―nacui̱ Jesús jiꞌi̱ nguꞌ―, chaꞌ ta ma̱ chacuayáꞌ tyaꞌa̱ yu.

⁴⁵Loꞌo liꞌ quiñaꞌa̱ tyaꞌa nguꞌ judío biꞌ jlya tiꞌ nguꞌ jiꞌi̱ Jesús, ñati̱ nu ndiꞌi̱ nxtyucua jiꞌi̱ María tsa̱ la, chaꞌ cua naꞌa̱ nguꞌ chaꞌ tlyu nu nguaꞌni ca ti Jesús cuentya jiꞌi̱ ycuiꞌ Ndyosi.

⁴⁶Pana ntsuꞌu xi nguꞌ biꞌ nu hora ti ndyaa slo nguꞌ fariseo, nda nguꞌ chaꞌ loꞌo nguꞌ ñiꞌya̱ nu nguaꞌni Jesús.

⁴⁷Biꞌ chaꞌ nu nguꞌ sti joꞌó nu laca loo loꞌo nguꞌ fariseo biꞌ, nguxana nxiꞌya nguꞌ jiꞌi̱ lcaa nguꞌ tisiya, chaꞌ tyuꞌu tiꞌi̱ nguꞌ. Loꞌo liꞌ nchcuiꞌ nguꞌ loꞌo tyaꞌa nguꞌ: ―¿Ñiꞌya̱ cuaꞌni na juani? ―nacui̱ nguꞌ―. Quiñaꞌa̱ tsa chaꞌ tlyu ndyuꞌni nu quiꞌyu biꞌ.

⁴⁸Loꞌo ta na chacuayáꞌ jiꞌi̱ yu chaꞌ tya cuaꞌni la yu juaꞌa̱, liꞌ xñi lcaa nguꞌ quichi̱ chaꞌ jiꞌi̱ yu. Liꞌ ca̱a̱ nguꞌ romano chaꞌ cuityi̱ nguꞌ laa tlyu jiꞌna, culoꞌo nguꞌ jiꞌi̱ ñati̱ tyaꞌa na su ndiꞌi̱ nguꞌ ―nacui̱ nguꞌ.

⁴⁹Liꞌ ndatu̱ tsaca nguꞌ; Caifás naa yu, loꞌo juaꞌa̱ yija̱ biꞌ laca yu xuꞌna sti joꞌó. Nchcuiꞌ yu loꞌo nguꞌ biꞌ liꞌ: ―Ni sca na ná jlo tiꞌ ma̱,