1Sión-yargine gar-trompeta ogormar, an-yar-islidikidgi neg-owisoleged-gar be ogormar. Bela dulemar-we-yargi-gudimalad wawanmakmar, ar ade, Bab-Jehová-danikid-e-iba mosad, ar bato nue-warmaksad.
2A-ibagi, negasichid nagunonikoed, neg gudure sigoed. Mogirmar-gudureged nagunonikoed, neg daas sigoed. 2. BAB-JEHOVÁ-E-IBA-DANIKIDGI GANNAR SUNMAKLENAID (2:2b-11) Igi neg-oibodanikile, bela yarmargi neg-mee imakdanidae, deyobi, dule-bukidar dule-bulegana danimaloed. Epenne we-dulemaryobid dulemar gwen dakledisulid, deginbali, yoedsega dulemar-deyobid gwen daklegosurbalid.
3We-dulemar sooyobi gumalad, bela ese ibmar gummaked. We-dulemar-nonikoed-iduale, soo bela ibmar-ogumaked, we-dulemar-nasad-sorbali, soo bela ibmar-obeloged. We-dulemar, amba yoo dagegua, we-yar-naidi, Edén-nainuyobi daklegenad. We-dulemar, we-yargi-nasmargua, e-sorbali, yar, nega-dulesulidganyob nagusad. E-ganguedgi ibmarmar geg wakinned.
4E-gangued, moliyob gangumalad. Dulemar-moli-birgi-abarmakmaidyob abarmakmalad.
5Yar-birgi ichomakdemalale, bila-onomalad-ur-napagined-gollomakedyob, oimakmalad. Igi-gagan-dinnagana soose-gummakdele, gormamaidae, deyobi gollomakmalad. Igi-bila-onomalad-bulegan, bila-onogega guagwar bukmala, deyobi gumalad.
6We-dulemar-asabin bela dulemar-we-napneggi-bukmalad gwakidmalad, bela e-niga argwatemalad.
7Bila-onomalad-buleganyobi urwemalad, bila-onomaladyobi galumar-birgi nakwe-nakwe imakmalad. Bela ilekwaa na e-igarba namaloed gwen igar-baid-baidsik-nadapi gumalosulid.
8Na muchub-muchub-yolenanai gumalosulid, na ilemakar nadapmaloed. Sigu-egi-milemamaid-abinni, amba ilekwaa nadapi gumaloed.
9We-dulemar neggweburgi sabsur ubononimaloed, galumar-matusulid-mamaid-birgi abarmakdimaloed. Negmargi nakwe-nakwe imaknonimaloed, dule-atursamaladyobi, yawagak-seniganaba dognonimaloed.
10We-dulemar-bila-onomalad-abin napneg wawanmakdoed, nibneg giglimakdoed. We-dulemar-abin dada, degi, nii sichii nadoed, bela niisgwamala bar gaosulid.
11Bab-Jehová, e-sordamar-idu-nadapi, maryob e-gaya-goled itogega imakoed. Bab-Jehová-e-sordamala bukidarad, e-igar-uksadba-ibsamaladi, gege ebisleged. Bab-Jehová-danikid-e-iba gwayed-dummadid, dobed-dummadid. ¿Doa abin-gwisguoe?
12Bab-Jehová weyob soged: “Emigindi, bela-bela be-gwage-ulubgine be an-amimala, mas-gunsuli be gudii gumar, be bomar, degi, be naibi itomar.”
13Wile-itogedbali, mer mor-esirmakedgi be binsamar. Unnila gwagegi nunmaked-dummad-itonai be gumar. Be-Bab-Dummad-Jehová be gannar amimar, ar ade, Bab-Dummad, dule-nuedid, dule-wiledakedid, Gwae-gwae urwesulid, bela-bela emar-sabgumaid, sabsur-odurdakoye-sogda-inigwele, igi-barsaye sogdedaed.
14Abakale, Bab-Dummad binsaed gwakalile, igi-barsaye sokalile, deyobi, anmargi ise-nued binsaoed. Ibmar-gwag-ukleged, degi, vinoʼmar, Bab-Dummad-Jehováʼgadga guoed.
15Sión-yar-birgi gar-trompeta ogormalo, dulemar-onmakega ese gormalo, masgullesulid-iba nasikmalo.
16Bela dulemar-bukwad-onmakega imakmalo, bela dulemar swilidik ambikumalo. Sapin-dummagan bela onmakmalo, burwigana onmakmalo, goemarse-bakale, onmakmalo. Emisgwa-ome-nikusad e-gabedneggi nodage, emisgwa-sui-nikusad e-gabedneggi-maidgi nodamoga.
17Bab-Dummad-neg-yawagak-siid, degi, ibmar-ukleged-aila-siid, amar-imbagi, dule-irwa-Babse-gormalad Bab-Jehováʼga-arbamaladi, be bomala. Weyob sognanai be gumala: “Bab-Jehováʼye, be wile be-dulamar dake. Mer be-dulamar-nug-oichogega be imake, mer dulemar-yar-baid-baidgi-bukmalad be-dulamargi dodogega be imake. Ibiga dulemar-yar-baid-baidgi-bukmalad sogmaloe: ‘¿Ar bia e-Bab-Dummad nadsunna?’ ”
18Geb degine, Bab-Jehová na e-sabgued e-yarga oyosad, e-dulamar egi-isgussuliyobi daksad.
19Bab-Jehová e-dulamarga weyob sogded: “An bemarga ibmar-gwag ukoed, vinoʼmar, degi, olivo-gwallu ukbaloed. Bemar we-ibmarmargi immelemaloed. Dulemar-yar-baid-baidgi-bukmalad bemargi dodomalaga bar an imakosulid.
20”Dule-dad-nakwed-argan-sapiledsik-danikid an bemargi-banguega imakoed, a-dule, dule-buksurmaladsik, dule-negasulidganba an balimetoed. E-sordamar-idu-danimalad, dad-nakwedsik-demar-naidgi, didulegega an imakoed. E-sordamar-sorba-danimaladdi, dad-argwanedsik-demar-naidgi, didulegega an imakoed. E-muimar nunguega an imakoed, sunnasuli-yapannega an imakoed.” Bab-Jehová ibmar-dummagan imakoed.
21An-yargi-bukmalad mer-dobgumala, bur weligwar itomala, wergumala. Ar Bab-Jehová ibmar-dummagan imakoed.
22Ibdula-sapurbarmalad, mer dobgumala, ar gaganmar aramakdagoed. Sapimar bela sanmakdagoed, sapi-higueraʼye-nugadi, degi, uva-dubmar yeer sanmakdagoed.
23Sión-dulemar weligwar-itomar, be-Bab-Dummad-Jehováʼba be wergumarsun. Ar be-Bab-Jehová e-iba-sogedba bega dii owioed. Ar igi epenneunni, ibmar-digleged-idu dii owidae, degi, ibmar-gwag-weleged-idu dii owidae, deyobi bemarga dii-wied-ibagan nasikoed.
24Ibmar-gwag-saboged-negmar ibmar-gwag ena sigoed. Ibmar-gwagmar-egured-negmar vino ena sigoed. Olivo-gwallu ena sigbaloed.
25Bab-Jehová soged: “Ses-danagwen-gudimalad, ses-dummagan, ses-sapingana, ses-burwigan, birga-nasmaladgine bemar-ibe bela ibmar-gwag guchagusad, gannar bemar a-ibmarmar-nikuega an be-imakoed.
26Bemar obinebaka, nue-immelegedse gunmaloed, geb be-Bab-Dummad-Jehová-nug be odummomaloed. Ar ani be-Bab-Dummad-Jehová, bemarga ibmar-gegerdakleged imakoed. An-dulamar bar bipisaale, bingeguosurmalad.
27Geb degine, wisgumaloed, ani an Israel-dulemar-abargi gudiiye. Ani an e-Bab-Dummad-Jehová gued. Anyobid dule-baid sated. An-dulamar bar bipisaale, bingeguosurmalad.”
28Bab-Jehová sogdebalid: “We-ibmar-gusad-sorbali, An-Burba bela-dulemargi an odenonikoed. Be-masmala, degi, be-bunamala, an-gayaburbagi sunmakdemaloed. Selebagusmalad gabdakdemaloed, sapingana negburgan dakdemaloed.
29A-ibagangi, An-Burba, mai-machergangi, mai-omegangi, an odenonibaloed.
30Ibmar-gegerdakleged nibneggine, napneggine, an oyogoed. Ablisbi neg-nagunonikoed, soo-dummad oyolegoed, degi, waa-bupurmagwichi neg gudoed.”
31Bab-Jehová-e-iba-dobegwar-itoleged-danikoed-idu, e-iba-gwayed-dummad-danikoed-idu, dad-ibegwar-ganaidi negasichidga gudoed, nii-ganaidi ablisgi-oglesayobi ginnitibi daklenonikoed.
32Bela dulemar e-Bab-Dummadga Bab-Jehová-imakmaladi, abonolemaloed. Ar igi Bab-Jehová sogsagusa, deyobi, Sión-yargi, Jerusalén-neggweburgi, abonoleged nikaoed. Bab-Jehová na dulemar-susagusadi, dulemar-dula-bemaloed-abargi gudii imakoed.
