1परमप्रभु यावेम रागी रागी आन पर्बम आ लोव़ पाइब येरमीया कली लोव़ पाप्तु।
2मार लोव़ पाप्तु देंशा हना “इजीप्त रागी आ पर्बम, इजीप्त ङा पिप फाराओ नेको आ लडाइ पाइबपुकी युफ्रेटीस खोला आ नेक्था कारकेमीश सहरमी बाक्शो बाक्तेक्म। यहूदा ङा पिप योसीयाह आ तौ येहो-याकीममी सासन पवा आ ४ बर्सम बेबीलोन ङा पिप नेबुकदनेसरमी लडाइ तोशा ग्रात। २राजा २३:२९
3आइक्च नु ठेयब तेक्तीक ठीक पने। लडाइ पचा कली ङोंइती बारीन।
4शाराम लगम पाइक्तीन। शारा ङोंइसीन। कांसा के ताकी गुक्शा इन तूतीक शेप्पीन। इन कांसा के फेक्तीक फेक्सीन।
5गो मारदे मेको आन कली हिंशो तङमी? मेकोपुकी नोले शोंइसीशो बाक्नीम। मेको आन लडाइ पाइबपुकी आन थुं लुक्च लत। मेकोपुकी रीब पा प्रोक्तेक्म। मेकोपुकीमी नोले लेश्शा मकोव़नीम। तेइ तेइ हिंतीकेइ हिंतीके बाक्ब” दे परमप्रभु यावेम देंत। येरमीया २०:३
6परमप्रभु यावेमी “रीब पा प्रोक्ब यो प्रोक्ने मचाप्नीम। लडाइ पाइबपुकी यो ब्रोंइचा मताइनीम। मेकोपुकी उत्तर गे ङा युफ्रेटीस खोलाम दाइल पांइसीशा गोल्नीम।
7एको नील खोला खोदेंशो पा बारशा जाक्ब, अरु ठेयब खोला बोक्शा कुशो खोदेंशो पा जाक्ब, सु बाक्मे?
8इजीप्त रागी नील खोला खोदेंशो पा बारशा जाक्ब। ठेयब खोला बोक्शा कुशो खोदेंशो पा जाक्ब। मेकोमी ‘आं कली बारशा रागी कली सुम्चा गेने। सहर नु मेकेर ङा मुर आन कली साइक्चा गेयीनी।
9शारापुकी दोरशा ङोंइती लने। बग्गी खुल्बपुकी थाम्पा दोरपतीन। लडाइ पाइबपुकी बारीने। कूश एथीयोपीया नु पूत ङा मुरपुकीमी तेक्तीक कुरनीम। लूद ङा मुरपुकीमी लिब्रा आप्नीम।
10मेको नाक्ती परमप्रभु, मुर नेल्ल आन परमप्रभु यावे आ नाक्त बाक्ब। मेको क्येक्क लेत्तीक नाक्ती बाक्ब। आंम जोरी सत्रु आन कली क्येक्क लेत्तीक नाक्ती बाक्ब। मुरुम तरवारम साइक्नीम। तरवार हुश तूशा, आ तूतू दाक्शो रूब। मारदे हना मुर नेल्ल आन परमप्रभु यावेमी उत्तर गे ङा रागीमी, युफ्रेटीस खोला आ नेक्था क्योरशा चढ़ेब। यसैया २:१२; ब्यवस्था ३२:४१-४२
11गे कन्ने मीश आल इजीप्त, इर गिलादम लशा ख्रेक्तीके चाक्को। गे शोर गाक्शो शुश खाल ङा ओख्ती ख्रेक्साक्वे। तन्न गे मसानेवे। येरमीया ८:२२
12रागी रागी ङा मुरपुकीम इ मुने दोक्शो लोव़ नेंतेक्म। इ वाइ ब्रेश्शोम रागी नेल्ल ब्रीब। मारदे हना लडाइ पाइब, लडाइ पाइब नु थोक्मुइनीम। मिनु मेको नेल्ल कालेमी गोल्नीम’ ” दे परमप्रभु यावेमी देंत।
13परमप्रभु यावेम बेबीलोन ङा पिप नेबुकदरेसरम इजीप्त कली लडाइ तोथ जाक्चा आ पर्बम येरमीया कली लोव़ पाप्तु।
14मार लोव़ पाप्तु देंशा हना “इजीप्तमी एको लोव़ नेंपतो। मिग्दोलमी एको लोव़ नेंपतो। मेम्फीस नु ताहपनेसमी यो एको लोव़ नेंपतो। गे नेल्ल ठीक दुम्शा आंम आंम राप्तीकेम रपीन। मारदे हना तरवारम इन एर ओंथ नेल्ल साइक्तु।
15मारदे इ बोल्यो लडाइ पाइब प्रोक्नीमी। मारदे बोक्शा मराप्नीमी? मारदे हना परमप्रभु यावेम मेको आन कली साइक्तु।
16इ लडाइ पाइबपुकी थोक्मुशा गोल्नीम। मिनु मेकोपुकीमी ‘लो, इं मुर आन बाक्तीक लय। इं जरमेशो रागी लेश्शा लय’ दे साइक्ब तरवार आ पर्बम मो देंमुइनीम।
17इजीप्त ङा पिप फाराओ कली फश लोव़ पाइब, दे नें वोतीन। मेकोम आ गेय पतीक नाक्ती साम्तु” देंत।
18परमप्रभु, पिपमी “आं ब्रोंइशा बाक्शो खोदेंशो पा” देंत। मेको पिप आ नें मुर नेल्ल आन परमप्रभु यावे बाक्ब। पहाड आन दाते ङा ताबोर पहाड खोदेंशो पा का जाक्ब। मेको समुन्द्र आ नेक्था ङा कारमेल खोदेंशो पा जाक्ब।
19गे इजीप्त ङा दारशो तमी ग्याइश्शा लाइक्चा पुंइसीचा कली इ मार मार कुम्लो पावो। मारदे हना मेम्फीस श्येत्थ दुम्ब। मेको खिं नेल्ल ब्रेश्शा, मुर मबाक्तीके दुम्ब।
20इजीप्त रागी दारशो मगिक्शो बी का खोदेंशो बाक्ब। तन्न उत्तर रे डांस का जाक्ब।
21मेको आ गाल्च ताक्शा लडाइ पाइबपुकी यो दोम्शो बाछा खोदेंशो बाक्नीम। मेको यो नेल्ल हिरशा लशा काथा प्रोक्तेक्म। मेको राप्शा मदिक्नीम। मारदे हना मेको आन हिंचा ङा श्येत जतीक नाक्ती जाक्शो बाक्ब। मेको आन सजाइ तची ना जाक्त।
22मेकोमी ग्रेशा गाक्शा, प्रोक्शो बुस्सुम खोदेंशो पा रेयके पाइब। मारदे हना आ जोरी सत्रु ङोंइती बारशा, खा कुरशा रवा तिम्ब मुर खोदेंशो पा जाक्नीम।
23परमप्रभु यावेमी “मेकोपुकीमी आ ब्वाकी नेल्ल तिम्चा माल्नीम। मारदे हना हिक्ने मचाप्चा ङा बाक्नीम। मेकोपुकी सल्हा क्येङा शुश बाक्नीम” देंत।
24मिनु इजीप्त आ तमी मुने तोक्चा पुंइसीब। मेको उत्तर रे जाक्ब मुर आन गुइम जिम्मा गेचा पुंइसीब।
25मुर नेल्ल आन परमप्रभु यावे, इस्राएली आन परमप्रभुम “गो थेबेस सहर ङा आमोन फाराओ, इजीप्त रागी नु आ देवी देवता नु आ पिप आन कली सजाइ गेनुङ। गो फाराओ नु मेको आ सक्ति कली थमा सुइक्ब नेल्ल आन कली सजाइ गेनुङ। येरमीया ४३:१२-१३; यसैया २४:२१
26गो मेको आन कली साइक्चा माल्ब बेबीलोन ङा पिप नेबुकदरेसर नु आ लडाइ पाइब आन ठेयब मुर आन गुइमी गेनुङमी। मेको नोले इजीप्त रागी ङोंइती ङा खोदेंशो पा मुर बाक्तीक रागी दुम्ब” दे परमप्रभु यावेम देंत। इजीकीएल २९:१४
27मेकोमी “आं गेय पाइब याकूब, गे महिनो। इस्राएल गे सुर्ता मपावो। गो इ कली ङोन रागी रे प्रोंइनुङ। इ चच युइ आन कली ग्याइश्शा लाइश्शा, वोइश्शो रागी रे प्रोंइशा चाक्नुङमी। याकूब लेंशा श्येत मजथु, थुं नाइश्शा बाक्ब। मिनु मेको कली सुइम हिंच मकोंइनीम। येरमीया ३०:१०
28आं गेय पाइब याकूब गे महिनो। मारदे हना गो गे नु बाक्शो बाक्नुङ। गो इ कली तेको रागी ङा मुर आन दातेमी ब्रपदु, मेको रागी ङा मुर नेल्ल आन कली क्याम्नुङमी। तन्न गो इ कली मक्याम्नुङ। गो इ कली ठीक सजाइ गेनुङ। गो इ कली सजाइ मगेथु मप्रोंइनुङ” देंत। येरमीया १०:२४; येरमीया ३०:११
