Jeremías 46

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Bab-Jehová-gayaburba, e-gayaburba-barsoged-Jeremíasʼse nonikid, neggwebur-baigangi ega sunmaknonikid.

²Josías-machi-Judá-rey-Joacim, Judá-yalagi birgabakegus dummadga maigua, Babilonia-rey-Nabucodonosor, Egipto-rey-Faraón-Necao-ogalakus gusad. Deunni, Faraón-Necao, Carquemis-neggweburgi Éufrates-diwar-nagaba maigusad. Bab-Jehová, Faraón-Necao-sordamargi, degi, Egipto-dulemargi weyob sognonikid:

³“Guakwaa sigu-abgaed amimar, bila-onogega namar.

⁴Guakwaa moli nasikmar. Moligi-nanamalad, moligi be nakwemar. Guakwaa gudii be imakmar, bormo-gurgin be yomar. Eswarmar be oswiswimakmar. Esgoro-mor be yomar.”

⁵Bab-Jehová soged: “¿Ar wede igidi? Be-sorda-bila-onomalad galakudmalad, gannar sorsik sikirmakdemalad. Ise-gwayale, sorsik-ataksuli duurmakmamaid. Bela dobegwar neg itoleged.

⁶Dule-binnasuli-yeer-abarmakedi, geg wakinned, dule-gandikidi, geg dukued. Dad-nakwed-argan-sapiledsik Éufrates-diwar-gakaba, yoledapdamalad, aimukuddamalad.

⁷”¿Ar wede doawa? Nilo-diwar-nodanikidyob nodaniki. ¿Wede doa diwar-sukamakdanikidyob daniki?

⁸Egipto-sordamar danikid, Nilo-diwar-engudanikidyob danikid, diwar-sukamakdanikidyob danikid. Ar Egipto-sordamar soged: ‘Yar-birise an nakoed, bela yalamar-naid an odogoed. Neggweburmar an osulogoed, degi, an e-dulemar obelogoed.

⁹¡Molimar, be urwemar! ¡Bila-ur-napaginmalad, binnasuli be abarmakmar! ¡Sorda-bila-onomalad, ginemar! ¡Cus-sordamar, be-sigu-abgaed be gamar! ¡Fut-sordamar, be-sigu-abgaed be sumar! ¡Lidia-sordamar, be-warsi be yaa imakmar!’

¹⁰”We-iba, Bab-Jehová-Bela-Gangued-Nikad-ibad. Buged-mai-imaked-ibaga guoed, e-isdarmaladgi buged-mai imakoed. Es-suid geg-itogusadse dulemar-gindakoed, es-suid na dulemar-ablisgine immelegoed. Dad-nakwed-argan-sapiledsik, Éufrates-diwar-gakaba, Bab-Jehová-Bela-Gangued-Nikadi, dulemar-oburgoed.

¹¹”Egipto-dulemar, Galaad-yalase be namar, ase, ina-wawadikid be aminamar. Inamar bukidar be amimalo-inigwele, gwen be nuguosurmalad.

¹²Bato neggwebur-baigan be-galakusad wismalad, binnasuli be-boedi bela napaneg-naidgi itoleged. Sorda-bila-onoged, sorda-baidbo-yolenanaidi, ebobela napagi aimukumamaid.”

¹³Bab-Dummad-gayaburba-barsoged-Jeremíasʼse weyob Bab-Jehová-gayaburba nonikid. Deunni, Babilonia-rey-Nabucodonosor, Egipto-yalagi gwichigudanigu, ega weyob sognonikid:

¹⁴“Egipto-yalagi we-ibmar be sogmalo, Migdol-neggweburgi, Menfis-neggweburgi, degine, Tafnes-neggweburgi be weyob sogmalo: ‘¡Guakwaa bukumalo, ise-neg-itogar ambikumalo! ¡Be-dikarbali, es-suidmar neg-gagadagoed!’

¹⁵¿Ar ibiga be-sorda-bila-onomalad aimukumamai? Ar gege gannaa gwisgumalad, ar Bab-Jehová we-dulemar-omukusad.

¹⁶Be-sordamar, egi yolenanaid, na birgi-birgine aimukumamaid. Weyob sogmalad: ‘Gwichibin sae, anmar-neggweburse anmar nae, anmar-gwalulesad-yarse anmar nae, anmar-isdarmalad-es-suid-idu anmar wakinne.’

¹⁷Degi, binnasuli weyob sogmalad: ‘¡Faraón unnila binsa ee gordii! ¡Egipto-reyga-ibmar-soglesad bergusad!’ ”

¹⁸Ani an Rey gued, dula-maidid, Bab-Jehová-Bela-Gangued-Nikadye an nugad. An soged: “Igi yar-baiganba bur Tabor-yar-dummad nosii, igi demar-gakaba Carmelo-yar bipisur nosii, deyob-dungueyobi, be-isdarmalad begi danimaloed.

¹⁹Bemar Egipto-yalagi-bukmaladi, gales-ebipiledmaloed-idu be guakwaa ambikumalo. Ar Menfis-neggwebur bela ollobi naguoed, bela bibisgoed, dulemar egi megosulid.

²⁰”Egipto-yala, moli-bebe-nikad-bunolo-yeerdaklegeyob dakleged, degi-inigwele, obelolegegala dad-nakwed-argan-sapiledsik, moliburyobi egi danimalad.

²¹E-sordamar-manigi-bennuklegarmalad ilemakar-bukwad, moli-bebe-nikad-bunolomar-wardada-daklegedyob dakleged, amarmoga, gannar sorsik duurmakmaimarmogad, bela danagwena gwen gwisgusuli duurmakmamaid, ar e-bergued-ibagan ega mosad, degi, sabsur-odurdakleged-ibagan ega nagunonikid.

²²Egipto-sordamar naibe-goleyobi-itolege duurmakmamaid, e-isdarmaladdi gandikidgi egi warmakdanikid. Sapi-sikmaladyobi, akan annik-annik e-bina danimalad.”

²³Bab-Jehová soged: “Be-sapimar ise-gwamakar-bukwa-inigwele, bela naitinagase obelolegoed. Sapi-sikmaladi, bur bule sesmarba mergued, dule geg we-dulemar ebised.

²⁴Egipto-yala-yeerdaklegedi, nue obingegsalegoed. Dulemar-dad-nakwed-argan-sapiledsikmaladga uklegoed.”

²⁵Israel-dulemar-e-Bab-Dummad-Jehová Bela-Gangued-Nikadi soged: “An Tebas-dulemar-e-bab-dummad-Amónʼye-nugad sabsuli odurdakoed. Degi, Egipto-dulemar, e-bab-dummagan, degine, e-reymar an sabsur-odurdakbaloed. Degine, Faraón, degi, dulemar-Faraónʼgi-bensurmalad an sabsur-wiobaloed.”

²⁶Bab-Jehová soged: “Dulemar-be-oburgwebi-gudimaladga an be-urmakoed, Babilonia-Rey-Nabucodonosorʼga, degi, ega-arbamaladga an be-ukoed. Geb a-sorbali, Egipto-neggwebur epennegwadyobi gannar ambikuoed.

²⁷Be an-dula-Jacob-wagan-gumaladi, melle be gwayemar, Israel-wagan, melle be dobee itomar. Jacob-wagan, ar an we-yargi bemar-onogoed, ar be-wagan Babiloniaʼgi-gales-bukmaladgi an onogoed. Gannar be bogidik-gudii guoed, dobedsuli be garmakdii guoed.”

²⁸Bab-Jehová soged: “Be an-dula-Jacob-wagan-gumaladi, melle be gwayemar. Be-bendakega an be-yalaba gudiid. Bia an be-oaisakismala, a-yalamar an bela-naitinagase obelogele, bemardi an be-obelogosulid. Unnila igar-innikigwadba an sabsur-bemar-odurdakoed, an bemar-odurdaksuli an guosulid, an bemar-odurdakedsegad.”