1Ngudda bininj nawu ngurrihni Zion, ngurriyawoyhdolkka! Ngurrimurrngrayeknin. Ngudda ngurrihyo kore God nuye kunredkimuk Jerusalem. Bininj nawu minj kabirriwoybukwon God minj kabirringime kore ngudda, dja mak bininj nawu kabirridjaldjare kunwarre.
2Mah, ngudda nawu ngurribeybeywurd ngarre Zion, wanjh ngurridolkka kore kundjulng ngurriyerrkang, dja ngurriwe wirlmurrng chains nawu ngundikomdukkang. Ngurridjalyerrka kore throne ngudberre, ngudda nawu bininj ngurrikang Jerusalem.
3Ngurribekka kore nawu Yawey ngunmarneyimeng, “Kerrngehkenh birribang bininj ngundidjalkang kore ngurrbenmarnedurrkmirri, dja minj money ngundimarnekarremulewam ngudberrekenh. Dja ngaye ngehke ngudberre, dja minj money marnekarremulewan.”
4Kuhni warridj Yawey nawu Kawohrnan Rowk yimeng, “Kerrngehkenh nawu bininj ngardduk birriwam walem bu birriwabmeng kore Egypt. Dja bolkkime bininj birribang nawu birrikang Assyria wanjh bindibongkarrmi ngardduk bininj.”
5Wanjh Yawey kayime, “Adju, baleh ngaye ngakurduyime? Nahni bininj ngardduk wanjh birribang bininj bindikang dja minj bindimarnekarremulewayi. Dja nahni birribang bininj kabindimarnewohrnan dja kabindidjekmiwon!” Kuhni kayime nawu Yawey. Dja mak yimeng, “Nahni birriwarre bininj wanjh munguyh ngandingeywirrihme ngardduk.
6Bonj, ngaye wanjh ngabenbukkabukkan ngardduk bininj ba bu ngandingeyborlhme, dja bu kunmekbe ngakurduyime, wanjh kabirriburrbun bu ngaye wanjh ngayingkihyolyolmerren. Woybukkih kunu ngayeman.” Kuhni rowk nawu Yawey yimeng.
7Kamak rowk bu karrinan bolkkime nahni bininj kamre kore kuwarddekimuk, dja nungka kamkan kunwok kunmak. Nungka kahmulewan kunmodmikenh dja mak kunwok kunmak. Kahmulewan kore God kanngehkekenh! Nungka wanjh kabenbengdayhke bininj rowk kore kunred Zion, dja kayime, “Ngudda ke God kawohrnan rowk, nungka nawu king duninjh!”
8Ngurrbenbekka bininj nawu kunkakkuyeng kabolknahnan kore Jerusalem. Bedda kabirrihnan kunmim bedberre nawu Yawey kamdurndeng kore kunred Zion wanjh kabirridjarrkkayhme kunnjilngmak dorrengh.
9Ngudda nawu ngurrihni kore bolkwarreminj kore Jerusalem, wanjh bolkkime ngudda ngurridjarrkwayinin kunnjilngmak dorrengh. Ngurriburrbun Yawey ngunkangemarnbom ngudberre nawu nuye bininj, dja ngunngehkeng ngudda nawu ngurrikang Jerusalem.
10Nawu Yawey kanngehke kundulkarre nuye dorrengh ba bu birriwarlahkenh bininj nawu kabirrihni kubolkbubuyika wanjh kabirrikurdunan God kadberre bu kanngehke.
11Ngudda nawu ngurrikanahkan banikkin manbu nawu Yawey nuye, wanjh ngurrimbebmen dja ngurriray. Yuwn bu ngurrikilekme nawu nawarre, dja ngurridjalmarnburren bu ngurriyime manbu kundjalmakkenh.
12Dja med, yuwn bu ngurrikelerlobme. Ngurriburrbun nawu Yawey ngunmarnedokme dja mak God nuye Israel wanjh ngundarnhkadjung ba bu ngunnahnan.
13Nawu Yawey kabiyolyolme nuye nawu kabimarnedurrkmirri, wanjh kayime, “Ngurrina, nahni nawu nganmarnedurrkmirri nakka kurdumak. Kaluk nungka kakurduyime bu djal kunmakkenh nuye. Wanjh nungka kaluk kangeykimukmen, dja bininj birriwarlahken kabirriburluburlume.
14Bu kunkare birriwern bininj birrikangebarrhmeng bu nungka birrikuknang. Kunyid kunkimuk bikukwarrewong. Minj bininj duninjh kukyimeninj. Wanjh bedda minj birriwernhkukburrknayi kore kukbuyikaminj.
15Dja bolkkime nungka kabenkukdjuhke kunkurlba nuye birriwern bininj kore kubolkbubuyika rowk. Wanjh nawu kings birrikihkimuk, wanjh nakka kabenmarnbun bu kabirrikangebarrhme dja kabirridjalwokngurdmen. Wanjh kumekbe kabirrinan dja kabirrimenmenbekkan kore njalehnjale nawu minj korroko birribangmebekkayi dja mak minj birriwobekkayi bu kerrngehkenhni.” Kuhni yimeng nawu Kawohrnan Rowk.
