1Nawu Yawey kayime, “Ngudda ngardduk kunred Zion, ngudda yiman kayime ngalwarlirrngwarre daluk, ngudda wanjh wurdyaw yak. Bolkkime wanjh yiwayinin bu yiwernhnjilngmakmen dorrengh! Ngudda minj wurdyaw ngunbuni bu karrangenkenh, wanjh yikayhmen kunnjilngmak dorrengh! Bolkkime ngudda yiman kayime daluk ngalbu wurdyawyak bu kabenyawmang wurdwurd dja kabiyurrhke daluk ngalbu nabininjkobeng kabikarrme.
2Mah, wanjh ngurrirurrkname dabburlin kore yihyo bu yiwarlahwon. Yiwernhnamen kunyarl dja manbu yidjabnamekenh ngarre dabburlin.
3Ngayime bu yerrekah nawu mawahmawah ke kabirriwarlahmen kore kubolkkukun dja mak kore kubolkdjakku. Bedda wanjh kabindibebke birriwern bininj nawu kabirridi kubolkbubuyika ba bu kabirribolkmang bedberre kunredbubuyika.”
4“Yuwn bu ngurriyawoyhkele! Ngudda minj ngurriyemengalme, dja minj birribuyika bininj ngundidjekmiwon. Kaluk ngurribengmidjdan kunwarre ngurriyimi bu ngurringudjbangni. Minj mak ngurridjalburrbun bu ngudda kunkareni ngurrimakarrdjukunni.
5Bolkkime wanjh God nawu ngunmarnbom wanjh ngunmey dja yimerranj nabininjkobeng ke! Nungka kahngeyyo Yawey Narrulkarrekimuk. Nungka nawu Nadjalkudji Nawernhmakmak Duninjh, dja ngunngehkeng ke. Nungka wanjh kabenmarnewohrnan birriwarlahkenh bininj kore kurorre rowk kabirrihni.”
6Nawu ngudda ke God kayime, “Ngudda yiman kayime ngalyawk ngalbu nabininjkobeng birruy dja bidjalbawong dja kuhni bu wernhnjilngwarreminj duninjh. Bonj. Bolkime nawu Yawey ngunkayhme dja mak ngunkimang ngudda yiman kayime bininj kabikayhme ngalbininjkobeng ngalbu bibawong.”
7Nungka nawu Yawey kayime, “Ngaye bawong ke bu kundjaldedjumbung, dja bolkkime ngadjare bu yimdurndeng kore ngaye, dja ngaye wernhmarnedjare!
8Ngaye ngayidduy nguddakenh dja ngakebborledkerrinj ba bu minj ngarrkebnarren. Dja bolkkime ngaye wernhkongibun ke, dja minj yawoyhbawon. Ngaye wanjh wernhmarnedjare munguyh. Kuhni ngayime Yawey nawu ngehke.”
9“Ngaburrbun bu Noah darrkiddi, ngaye ngawokkurrmerrinj. Ngayimeng, ‘Yuwn bu ngayawoyhmunkewe kundjurrh kunkimuk bu ngabenkebngakke bininj kondah kurorre.’ Wanjh bolkkime ngaye ngawokkurrmerren bu minj ngayawoyhyiddung ngudberre, dja minj munguyh ngaye yawoyhbun ngudberre.
10Mahni kuwarddekimuk, wardi kawarddedeldelme, dja kunubewu mandulum rowk kadjalyakmen, djalbonj, ngaye marnedjare duninjh ngudberre, dja ngardduk kunwok kore ngawokkurrmerrinj, kore kunmodmikenh ngardduk ngamulewarrinj, wanjh kahdjaldi munguyh.” Kuhni rowk nawu Yawey, dja nungka ngundjalmarnedjare.
11Nawu Yawey kayime, “Ngudda kunredkimuk Jerusalem, ngudda ngunmarneyidwernmerrinj dja yidjalkangewarre duninjh. Minj nangale ngunbidyikarrmeninj. Ngaye wanjh kangemarnbun. Ngaye yawoyhmarnbun manwarddemakkaykenh dorrrengh ba bu yidjaldi kamak rowk.
12Ngaye ngamarnbun walls dja gates ba bu yirurrkmakkaykenh, manwarddemak dorrengh manbu kahbame.
13Bininj nawu kabirriyo kore ngudda, wanjh ngaye ngabenbukkabukkan rowk, dja wurdwurd kumekbe kore ngudda, wanjh kabirridjaldi kunmodmikenh dorrengh.
14Bininj rowk kore ngudda wanjh birrimak, dja kabirridjalkurduyime kunmak, dja kunmekbekenh kabirrimurrngrayekmen. Minj kabirriyawoyhkelemen, dja minj nangale kabirrimre bu kabindiwarrewon.
15Bu bininj birribuyika kabirrimre kabirridjare kabindibun, wanjh bedman, minj ngaye ngabenmunkewe, dja bedda wanjh kabirribarabun, dja kabindimarneboddan bininj nawu kabirrihyo Jerusalem.”
16“Kandibekka! Ngaye wanjh ngabenmarnbom bininj nawu kabirridurrkmirri kunak dja wirlmurrng dorrengh, nawu kabirrimarnbun mandjawak manbu kabirriburrenkenh. Dja mak ngaye ngabenmarnbun bininj nawu soldiers dja bedda kabirrikan mandjawakkimuk ba bu kabindibun bininj.
17Dja yuwn bu ngudda ngundibun mandjawak dorrengh. Bininj nawu ngundiwiddjung, wanjh ngurriwokdurdiwe bedberre dja ngurrbenngurdke. Kuhni rowk wanjh ngudberre ngudda nawu kandimarnedurrkmirri ngaye nawu Yawey. Ngaye wanjh bidyikarrme ba bu ngurriwinhme munguyh.” Kuhni wokkurrmerrinj nawu Yawey.
