Isaiah 63

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Nahni nangale bininj kamhre kore Edombeh dja kore Bozrahbeh? Mak nawu kamhdjongbuyindi manbu kurlbakurlba manburrba namakmak. Dja kamhre kundulkarre kunkimuk dorrengh? Wanjh nawu Kawohrnan kayime, “Nakka wanjh ngaye bu ngawokdi! Ngaye ngadjalwernhdulkarrekimuk duninjh ba ngabenngehke rowk.”

²Aba, dja njalekenh nawu manburrba ke kurlbakurlba, yiman kayime ngudda yimelmeng grapes bu kunkalkkidkenh?

³Wanjh nawu Kawohrnan yimeng, “Ngaye ngadjalkudji ngahrey bu ngamelmeng, minj nangale bininj nawu birrikang kubolkwarlah nganbidyikarrmeninj ngardduk. Ngadjalmelmeng warridj ngayidduy. Ngayiddungi dja kunmekbekenh ngabenkukdjuwimeng. Wanjh kunkurlba bedberre ngandelkdelkkeng kore kunmadj ngardduk.

⁴Kuhni kunbarnangarra wanjh ngadjalburrbuni kore ngabendjadmeng dja ngabendungi. Kaluk kuhni kunbarnangarra yiman kayime kunkudji mandjewk kore ngabenngehke dja ngabenbebke yikahwi bininj.

⁵Dja burrkyak! Ngabolknang, dja minj nangale nganbidyikarrmeninj. Dja ngakangebarrhmeng bu minj nangale nganedjar:rkdiwirrinj. Kaluk ngadjalkudji ngakurduyimeng kundulkarre ngardduk warridj dja ngabenbebkeng bininj. Dja nakka kunkangeyid ngardduk bu ngamurrngrayekworrinj.

⁶Wanjh ngamelmeng kubolkbubuyika kunwern, nawu ngabenyiddungi. Ngayidduy bedberre, wanjh ngabenmarnbom bu birrikodjmayahmeng, dja ngabolkdelkdelkkeyi kunkurlba bedberre kore kurorre.

⁷Mah. Wanjh ngaye munguyh ngayolyolme Yawey nawu mimkongiwern duninjh. Dja mak ngayolyolme kore baleh nungka kurduyimeng ba bu karriburlume. Ngaburlume Yawey nawu kanmarnekurduyimeng kunmak kunwern kadberre, ngad nawu Israel kankebmawahmeng. Nungka wanjh kankongibun kadberre dja kannahnan munguyh.

⁸Nawu Yawey yimeng, “Woybukkih bedda wanjh ngaye ngardduk bininj, wurdwurd ngardduk nawu minj ngandikowe.” Kuhni yimeng bu nungka wanjh benngehkeng mawahmawah kadberre.

⁹Bu bedda birridjakbekkang, nakka nungka warridj djakbekkang, wanjh nungka kumwam kore bedda dja nungan benngehkeng. Nungka benmarnedjareminj dja benkongibom, wanjh benbebkeng kore birribongdi, benwayhkeng dja benngorrkang. Kuhni kurduyimeng bedberre bu kunkareni.

¹⁰Dja bonj. Bedda birridjalmunkebawong, dja mak birrinjilngwarrewong nawu Namalngmakkaykenh nuye. Wanjh kunmekbekenh nungka yimerranj bedberre nawu yidko, dja benbuni bu birriburreni.

¹¹Kaluk birrimekbe bininj nuye wanjh birridjalwohburrbuni bu kunkarekenh, kore Moses darrkidni dja nawu benkani. Dja birridjawarreni, “Kab, baleh God nawu kankang kore Red Sea Moses dorrengh, yiman kayime shepherd kadberre? Baleh God nawu kanmarnemunkeweng Namalngmakkaykenh nuye bu karrihdjarrdi?

¹²Baleh nungka nawu bibidyikarrmeng Moses kundulkarre duninjh nuye? Dja nawu bolarlmeng kadberre ba karridjalburlume munguyh munguyh?

¹³Baleh nungka nawu kankang kandji kore kurrula yiman kayime djarrang karlobme kore kabbal, dja minj karrimankang.

¹⁴Yiman kayime bulikki nawu kare kabbal? God nuye Namalngmakkaykenh nuye nawu Kawohrnan, wanjh kandjalngehkeng. Ngudda nawu Kawohrnan, kuhni ngudda kankani ngad nawu bininj ke, ba yingeykimukworrinj.

¹⁵“Mah! Dja kanna kore heavenbeh, kore ngudda yihni. Ngudda nawu yiyerrkan kore kaddum duninj, ngudda ke kunbolk kunmakmak dja kadjalbame! Mah! Yidjalngudjworrimen! Ngudda yiddok nawu yidulkarrekimuk duninjh? Njalekenh ngudda minj kanyawoyhkongibun, dja minj kandjalnahnan?

¹⁶Ngudda nakka ngad ngadberre Kornkumo! Nawu Abraham nakka kunubewu minj nganburrbun ngadberre bu nuye. Mawahmawah nuye. Dja nawu Israel kunubewu minj kankukburrknan ngadberre bu namud nuye. Dja ngudda Yawey wanjh Kornkumo duninjh ngadberre. Ngudda nawu kanngehkeng dja ngundingeyburrbuni bu kunkare dja mak bolkkime.

¹⁷Nawu Yawey, njalekenh ngudda kanmunkewe bu ngarribawon manbolh ke. Mak njalekenh bu ngudda kankangerayekwon ba minj ngundimarneboddan? Mah! Yimdurnden kore ngad dja kanbidyikarrmen ngad nawu ngundimarnedurrkmirri, ngad nawu ngudda ke bininj.

¹⁸Ngad nawu bininj ke wanjh ngarribolkkarrmi kunbolkdjamun ke dja ngarribolknahnani bu kundjaldedjumbung. Dja bonj, bolkkime nawu ngarriyidko birribolkwarrewong kunmekbe kunbolk ke!

¹⁹Ngad wanjh ngudda ke bininj bu kunkare mak bolkkime, dja bedda nawu birriwarre bininj minj yibenngeybuyi bu ngudda ke bininj.