Isaiah 64

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Yawey! Ngarridjare bu ngudda yidjaldjalkma dja yirangmarrhmang heaven ba bu yimkolung kondah kanjdji kore kurorre! Ngarridjare manbu kunwarddekimuk kabolkrokarokan kore kumirrk ke!

²Yimkolu dja yibenbukkabukkan nawu ngarriyidko ba ngundingeyburrbun, yiman kayime manyahyi bu karranjbun wanjh kawurlhme, mak kamarnbun kukku bu kabonodnodmang. Mah, wanjh yibenmarnbu birriwarlahkenh bininj rowk kore kubolkbubuyika bu ngundiwernhkengehmek dja ngundimarnekukdeldelme!

³Kunkare ngudda kunwern yikurduyimi, kundulkarrekimuk dorrengh, kore ngad minj ngarriyingkihburrbuyi. Kunmekbe yimkoluy kondah wanjh manbu mandulumkimuk bolkrokarokani bu birrinang kundulkarre ke.

⁴Ngudda wanjh yidjalkudji God duninjh. Bu kunkare dja bolkkime minj nangale bininj biwobekkayi nabuyika God. Mak minj nangale binayi kunmim nuye nabuyika God. Minj nangale mak bikurdunayi nabuyika God yiman ngudda. Ngudda yidjalkudji nawu kanmarnekurduyime kunmak ngad nawu ngundiwoybukwon munguyh.

⁵Ngudda yire darnkih ba bu yibenbidyikarrme bininj nawu kabirridjaldjare kunnjilngmak dorrengh bu kunmak kabirridjalkurduyime, dja nawu ngundiwokmarrkmang ke. Dja ngaleng bu ngad ngundiwokweyi, wanjh ngudda kanyidduy. Adju, dja nangale nabuyika kanngehke?

⁶Ngarriwarlahkenh ngad wanjh yiman kayime ngarrikukwarreworrinj kunwarre dorrengh. Nawu kunmakmak ngarrikurduyime, wanjh yiman djalburudjan, dja yiman kunmadj bu nuhnudminj ngarridjongbuyindiwirrinj. Ngad yiman kunmalaworr manbu worrdowerrinj, dja kunwarre ngadberre kanwayhke yiman kunmayorrkkimuk kaburriwe kunmalaworr.

⁷Minj nangale kore ngad ngunngeykayhme, dja minj nangale mak kadjare bu ngunwernhkarrme. Ngudda wanjh kanbodmewong dja kanmarnewarlkkarrinj ngadberre kore minj ngundiyawoyhkebnan. Ngudda kandjalbawong bu ngarrikukwarrewarremen ngadmanbidju kore ngarrikurduyime kunwarre.

⁸Kawarre Ngabba! Ngudda Yawey wanjh ngadberre kornkumo! Ngudda kankukmarnbom yiman kayime bininj nawu kamang delek dja kamarnbun ngalng bu kaborrahkendong. Ngudda yidjalkudji kanmarnbom kunbidwi ke.

⁹Yawey, yuwn bu kanhdjaldung kunkimuk duninjh! Yuwn bu mak yidjalburrbun kunwarre ngadberre munguyh! Kanna ngad nawu bininj ke rowk, dja kanbekkabekka!

¹⁰Ngudda ke kubolkkimuk kubolkdjamun, makka wanjh bolkyimerranj kabolklarrk rowk! Zion bolkwarreminj, dja minj nangale kayo. Mak Jerusalem djalburrkyak, nakka bolkbularrbuyindanj rowk.

¹¹Dja Temple ke, manbu kunrurrk kunmak kore mawahmawah ngadberre ngundidjalburluburlumeni, wanjh kunak bularrbom dja rurrkwurlhkeng. Dja wanjh njalehnjale namakmak rowk nawu ngarrimarnedjareni, wanjh yakayakminj rowk.

¹²Wanjh bolkkime Yawey, yiddok minj kanbidyikarrme ngadberre? Yiddok minj yiwokdi ngadberre? Dja yiddok minj yidjalngurdme bu kandjaldung munguyh munguyh?