1Ngaye ngadjare ngabenkangemarnbun bininj nawu kabirrihni Jerusalem. Minj ngadjalni ngawokyak bu kunmekbekenh. Ngaye ngadjare Yawey kabenngehke. Dja mak ngadjare birriwarlahkenh bininj kabirrinan kore Yawey kabenngehke nuye bininj kore Zion dja kabenmarnbun kabirriyimerran birrimak bininj kore nungka ba bu bedda yiman kayime kabindibolkwolkan birribuyika bininj rowk.
2Ngudda bininj nawu ngurrihni kore kunred Jerusalem, wanjh kandibekka. Kaluk birriwarlahkenh bininj rowk ngundinan bu ngudda ngurrimak kore God. Nawu kings rowk bedberre ngundinan bu ngudda yiman kayime ngurriwernhmakkaykenh. Nawu Yawey nungan ngunngeybun bu ngunngeywon kunngey kunkerrnge ngudberre.
3Yawey nawu God ngudberre ngunkarrme kubid nuye yiman kayime king kakarrme manbu kadjongburrenkenh nuye, dja makka wanjh manmakkaykenh.
4Bininj ngundimulewam bu yiman ngundingeybom, “God bendjalbawong bedberre!” Mak birribolkyolyolmi ngudberre kunbolk bu birriyimi, “Mahni kunbolk yiman kayime daluk ngalbu nabininjkobeng bidjalwarnyakminj!” Kuhni birriyimi. Dja bolkkime wanjh bedda kabirriyime kunwok kunbuyika bu kabirriyime, “God nakka kabenmarnedjare yiman nakaliyi kabimarnedjare nuye ngalbininjkobeng nuye!” Nawu Yawey ngunmakwan ngudberre dja ngunmarnebolknahnan, wanjh kunmekbekenh birribuyika bininj ngundimarneyime, “Bedberre kunbolk yiman yerrih ngalbininjkobeng ngalbu kahnjilngmak kore nabininjkobeng ngarre.”
5Kaluk nawu God ngudberre nawu ngunmarnbom ngunmarnedjaremen bulkkidj duninjh yiman kayime nawu ngudjbang bininj kabimang daluk nuye bu kunnjilngmak dorrengh.
6Ngaye ngabenkurrmeng bininj nawu ngundimarnenahnan ngudberre ngudda nawu ngurrihni kunred Jerusalem. Ngadjare birrimekbe bininj munguyh kabirridi yiwarrudj kunbarnangarrakuyeng dja mak kunkakkuyeng. Minj kabirringurdme. Bedda munguyh birridjaldjawa nawu Yawey.
7Kabirrikayhme dja minj kabirringurdme kaluk bu Yawey kabolkmarnbun Jerusalem ba bu birriwarlahkenh bininj rowk kore kondah kurorre kabirribolkburlume kukadje Jerusalem.
8Nawu Yawey wokkurrmerrinj kunmekbekenh dja kaluk nungka kakurduyime kundulkarre nuye dorrengh. Nungka yimeng, “Bonj, ngaye minj ngabenbawon nawu birriyidko bininj ngudberre kabirrimre kabirringun ngudberre manme dja kabirribongun ngudberre wine. Burrkyak, minj kabirriyawoyhkurduyime nawu birridjenbubuyika bininj. Ngudda wanjh kunrayek ngurridurrkmirri, wanjh ngudda ngurringun dja ngurribongun, dja kunmekbekenh ngurriburlume nawu Yawey. Ngudda nawu ngurrimoyhma manbu manme, wanjh ngurringun. Ngudda nawu ngurrimoyhma manrakel manbu grapes dja ngurrimarnbun manbu wine, wanjh ngudda ngurribongun kuberrkkah kore ngardduk Temple.”
10Nawu Jerusalem ngurrihni, ngurriyingkihbolhmarnbu bedberre birrimirndebuyika nawu kabirrimhdurnderren. Mah, dja birrimdjalngimen rowk kore gates ngarre kukadje Zion! Ngurriburriwe kunwardde manbu kabenmarnebolhwarrewon. Mak ngurriwayhkemen manburrba nawu banner ba birriwarlahkenh bininj kabirrinan kore kubolkbubuyika rowk.
11Nawu Yawey mulewarrinj nuye dja benmarneyimeng bininj rowk kore kubolkbubyika rowk. Wanjh yimeng, “Ngadjare bininj kore kukadje Zion bu kabirribekkan mahni kunwok. ‘Ngudda nawu yiman kayime wurdwurd nuye Zion, Ngurribolkna! Dja ngurrina nahni nawu ngunngehke ngudberre wanjh kamhre! Nungka kamre dja ngunrohrokme, kaluk ngunwon kunmakmak nawu kakarrme.”
12Birrimekbe bininj wanjh kabirringeykendan “Birridjalmak Bininj nawu kawohrnan benngehkeng.” Dja ngudda ngurringeykendan “Nawu God benngalkeng, nawu kabirrihni kore kukadje manbu God minj bolkbawong.”
