1Kandibekkabekkan ngudda nawu ngurrihni djarreh kore kubolkbubuyika, ngudda nawu djarreh ngurrihyo. Nawu Yawey ngandjarrngbom ngaye kerrngehkenh bu ngabangmengalmeninj dja kunmekbe nganngeywong. Dja mak nungka nganmarnbom bu ngamarnedurrkmirri.
2Nungka nganmarnbom ba bu ngawokdi mandjad duninjh bu nganwong nuye kunwok. Dja mak nungka nganwarlkkang munguyh kore kubid nuye. Nungka nganmarnbom ba bu ngayimerranj yiman kayime nuye arrow nawu mankebmak, dja nganwarlkkang kore ngalng nawu arrowskenh nuye.
3Wanjh nganmarneyimeng, “Ngudda nawu yingeyyo Israel, wanjh ngudda kanmarnedurrkmirri ba bu bininj ngandiburlume ngaye bu nguddakenh.”
4Kuhni nganmarneyimeng, dja ngaye ngayimeng, “Aba! Ngaye ngarrurrkmirri kunwern dja bonj, ngabarabom. Ngaye ngangudjyakworrinj bu djal burudjang. Dja bonj, nawu Yawey nungan ngandjalnahnan dja nungka nawu ngardduk God, wanjh yiman ngankarremulewan kore ngarrurrkmirrikenh.”
5Bu kerrngekenh nawu Yawey nganmarnbom kore kuwalirrng ba bu ngamarnedurrkmirri. Nungka djareni bu ngaye ngabendurndiwe bininj nawu Jacob benkebmawahmeng ba bu kabirridurnden kore nungka. Nungka djareni bu ngabenmirndemang birrimekbe bininj nawu Israel benkebmawahmeng kore kubolkbubuyika birribebbehdi. Nawu Yawey ngangeykimukwon bu nganwon ba bu kuhni ngamarnekurduyime. Nungka wanjh nganwon nuye kundulkarre.
6Nawu Yawey nganmarneyimeng ngardduk, yimeng, “Minj yiyakwong rowk kore kanmarnedurrkmirrikenh, dja ngaye ngadjare kunbuyika yirrurrkmirri, dja kunkimuk duninjh. Ngudda werrk yibenmarnbun kunnguya rowk nawu Jacob nuye bininj bu bu kabirriyawoyhngeykimukmen. Bedda nawu Israel Israel benkebmawahmeng nawu ngabennahnang, wanjh yibendurndiwemen kore ngaye. Dja bolkkime ngadjare kunbuyika yikurduyimen, dja kunmekbekenh ngaye marnbun ngudda ba bu yibenmarnebolkwolkan bedberre bininj nawu minj Jews. Kuhni yikurduyime ba bu ngaye ngabenngehke birriwarlahkenh bininj nawu kabirrihni kubolkbubuyika rowk kore kurorre.”
7Wanjh nawu Yawey kawokdangen. Nungka wanjh kabenngehke bininj rowk nawu Israel benkebmawahmeng, dja nungka God bedberre. Dja namekbe nawu kabimarnedurrkmirri nuye Yawey, wanjh birridjalwern bininj nawu minj Jews kabirriwirrihme dja kabirridjalwarnyak. Nungka wanjh kabenmarnedurrkmirri kings warridj. Wanjh nawu Yawey kabimarneyime namekbe nawu kabimarnedurrkmirri nuye, wanjh kayime, “Kaluk namekbe nawu kings wanjh ngundiburlume bu ngudda yire darnkih, dja nawu princes ngundimarneboddan. Kuhni ngunmarnekurduyimerran bu kunmekbekenh ngaye Yawey minj ngakurren, ngadjalkurduyime kore ngawokkurrmerren. Dja ngaye djarrngbom ngudda. Ngaye nawu God Nadjamun Duninjh bedberre nawu Israel nuye bininj.”
8Kuhni wanjh Yawey yimeng, “Kaluk yerrekah kabolkyimerran bu ngaye ngehke ngudberre. Ngaye wanjh wokmang kore kandimarnekayhme dja bidyikarrme. Ngaye wernhnahnan ngudberre dja kukdjurruddi. Ngaye marnbun ngudberre ba bu birriwern bininj ngundinan dja kabirriborlhme bu ngaye Yawey ngawokkurrmerrinj. Bu kunmekbe wanjh ngaye ngabolkmarnbun ngudberre kunbolk. Bolkkime mahni kunbolk wanjh kubolkwarre, dja ngamarnbun ba bu ngurridurndeng ngurrihni kamak rowk.
9Ngaye ngabenmarneyime nawu kabirrbongdi bininj, ‘Mah, ngurrimdolkka!’ Dja mak ngabenmarneyime bininj nawu kabirridjaldi kore kubolkmunun, ‘Mah! Ngurriray kamak rowk!’ Dja bedda kabirrire yiman kayime sheep kabirringalke kubolkmak dja kabirridalkngun kumekbe kore kurrulum.
10Wanjh bedda minj kabirrimarrwedowe, dja minj mak kabirrikombukdowe. Bedda minj kabirrikuklardmen kore kubolkdarleh. Dja nawu kundung minj kabenbun. Nakudji nawu kabenmarnedjare wanjh kabenmirndekan kore manbomak kunronj kaborri kungad.
11Bu kunmekbe wanjh ngaye ngabolhmarnbun kore kuwarddekimuk, dja ngayingkihbolhmarnbun ngardduk manbolh kore ngardduk bininj kabirrirengehre.
12Ngardduk bininj kabirrimre djarrehbeh, yika kore kakbibeh, yikahwi karrikadbeh dja mak yikahwi kabirrimre walembeh kore kunbolk Aswan.” Kuhni yimeng nawu Yawey.
13Mah, ngudda kunngol rowk, wanjh ngurriwayinin yiman kayime bininj kabirriwayini! Dja ngudda nawu kurorre, wanjh yiwayinin dja yinjilngmaknin yiman bininj. Ngudda kuwarddekimuk rowk, wanjh ngudda warridj ngurriwayinin yiman bininj! Ngurriburrbu Yawey kabenkangemarnbun nuye bininj, dja kabenkongibun bininj nuye nawu benmarneyidwernmerrinj.
14Dja bonj, bininj nawu kabirrihni kunred kunkimuk Jerusalem, wanjh birriyimi, “Aba! Nawu Yawey kandjalbawong, dja kandjalbengmidjdanj!”
15Wanjh nawu Yawey kayime, “Burrkyak! Yiddok daluk kabibawon barrken nawu kabidjikkawon? Yiddok minj kabimarnedjare barrken ngarre? Kunubewu yikahwi daluk minj kabinahnan wurdyaw nawu biyawmey, dja ngaye Yawey minj munguyh bawon ngudberre.
16Ngurrina! Ngaye mandjawakwi ngabimbom ngudberre kunngey rowk kore kubidmirrk ngardduk! Ngaye burrbun ngudberre munguyh munguyh.”
17“Nawu bebeywurd ngudberre kabirrimdurnden werrkwerrk, dja nawu birriwarre bininj nawu ngundiwernhwarrewong, wanjh bolkkime ngundibawon dja kabirrire.
18Mah, wanjh ngurribolkna kuhri dja kuhri! Ngurrbenna nawu bebeywurd rowk ngudberre kabirrimirndemornnamen kore ngudda. Woybukkih duninjh ngawokkurrmerren ngudberrekenh, ngaye nawu Yawey dja yingkihmarneyime bu ngudda ngurrbenburlumen nawu bebeywurd ngudberre, dja ngurrbenkarrme dja ngurrbenmulewan bu bedda birridjalmak.”
19“Yoh, kunkare wanjh ngurrimarladjni, dja ngudberre kunbolk wanjh bolkwarreminj ngudberre. Dja bolkkime ngurriwernhwarlahmen dja ngurribarlke kunbolk ngudberre! Birrimekbe bininj nawu ngundiwarrewoni, wanjh bonj, kabirrihni munguyh djarreh duninjh.
20Kunkare wanjh ngurridi djarreh kore kunbolk bedberre birridjenbuyika, dja kumekbe wanjh ngurrbenmey wurdwurd. Bolkkime wanjh ngurrbenbekkan bu bedda kabirriyime, ‘Kondah kore karrihni, wanjh yiman kubolkdjokko! Ngad ngarridjare kandibolkwon manbu kubolkwarlah.’
21Bu kuhni kabirriyime, wanjh ngudda ngurriyimerren kore kukange, ‘Nangale benbornang nahni wurdwurd ngardduk? Ngaye ngabenbalanhmey ngardduk wurdwurd duninjh, dja minj ngayawoyhyawmang. Ngaye wanjh bininj ngandiburriweng dja ngandimunkeweng djarreh, dja minj nangale nganmarnedjareniwirrinj. Dja nangale bendjordmiweng nahni wurdwurd? Ngaye wanjh bininj ngandidjalbawong, dja nahni wurdwurd balehbeh?’ ”
22Wanjh Yawey nawu kawohrnawohrnan rowk kayime, “Ngurrina! Ngaye ngabenmarnewokmunkewe bininj nawu minj Jews kore kubolkbubuyika. Ngaye ngabenmarnewokmunkewe ba bu birriwarlahkenh bininj ngandibekkan. Dja bedda wanjh kabirrimre kore ngaye, kabindikarrrme bebeywurd ngudberre kore kunberl, dja mak kabindiyawmornekan nawu ngalbebeywurd ngudberre.
23Bu kuhni kamkurduyimerran, wanjh kings duninjh bedda kabirryimerran yiman kornhkornkumo ngudberre, dja ngalbu queens kabirriyimerran yiman ngalbabadjan ngudberre. Bedda wanjh ngundimarneboddan kumirrk ngudberre, kabirridjalbolknan dja ngundiburlume ngudberre. Bedda kabirrikurrmerren kanjdji kore ngudda. Bu kuhni rowk kayimerran, wanjh ngurriwernhburrbun bu ngaye nawu Yawey, dja bininj rowk nawu ngaye ngandiwoybukwon, wanjh ngaye minj ngabendjalbwon, dja ngabendjalnahnan.”
24“Kunubewu ngudda ngurriyime, ‘Bu bininj birribang duninjh kabirridjirdmang njalenjale, dja mak kabindibongkarrme nawu bindidarrkidmey, wanjh bonj, nangale kabenbebke nahni bininj bu kabenngehke?’
25Wanjh ngaye Yawey wokmang, dja kayime, ‘Kuhni rowk wanjh kakurduyimerran. Ngaye wanjh ngabenbun birribang bininj nawu ngudda ngundibun, dja ngabenbebke nawu wurdwurd ngudberre. Ngabenwarrewon nawu kabindibongkarrme dja ngakukmang njalenjale kunwern manbu bedda birridjirdmey.
26Ngaye ngabenmarnbun bininj nawu ngundibuni ba bu bedda kabirriburrendeleng, dja kabirringurren kunkanj, dja mak kabirribongun kunkurlba bedberre yiman kunbang kabirribongun. Bu kuhni ngayime wanjh birriwarlahkenh bininj rowk kore kondah kurorre wanjh kabirriwohburrbun bu ngaye Yawey wanjh ngehke ngudberre, dja ngaye bebkeng ngudberre kore ngurribongdi. Ngaye wanjh God nawu ngudjkimuk duninjh nuye Jacob.”
