Iosua 24:13-27

¹³Oea va ea reava arinai nige au paipaisoai, eo eanua nige au ginauridi ea lediva, boeadi eai aue mia: oea va nige au umaidi hinage aridi eai ami aiai au abi au ai.

¹⁴Arinai ede Guiau au matausiei, au heaeaiei ma nuamiu se ohi, au heaeaiei mamohoi: eaubada tamamiueao se heaeaiedi goila hari teha eai, eo Aigupito eai, au toresuaraidi; Guiau abo au heaeaiei.

¹⁵Ena au ene Guiau ta heaeaiei i baaea, teina asubena ta au nuatui, eai abo au heaeaiei: eaubada va tamamiueao se heaeaiedi goila hari teha eai, Amoraiti tataodi edi oea arinai au miahai edi eaubadaeao: eau mo, eo egu numa taumiaina, ai Guiau abo ai heaeaiei.

¹⁶Tatao abo se heuio si ene, Eaubada taba i nuahimai, Guiau abo ai nuagabaei bena hari eaubada ai heaeaiedi:

¹⁷Guiau, ema Eaubada, ai, eo tamamaieao Aigupito eai i woeaidima, numa tutugudui eai ai laoma, heiheinoi lailaidi matamai eai i ginauridi, dobila gamagaridi eai ai laoma, eo tatao gamagaridi boeadi eai ai laoma, i itavataimai:

¹⁸Matamai eai hinage Guiau tatao gamagaridi i hetatagorigoridi, doha Amoraiti tataodi oea eai se mia: arinai ede ai hinage Guiau abo ai heaeaiei: paana ia ema Eaubada.

¹⁹Iosua i ribalau tatao aridi eai i ene, Guiau taba nige au heaeaiei: paana ede ia Eaubada tabuna, eo ia Eaubada aiaromagigirina ede: laugagaeo au utusidi, eo emi baaea taba nige i ribagigiridi.

²⁰Ena Guiau au nuagabaei, hari eaubada, hari eaubada bena au heaeaiei abo i hebaaeamiu, eo i helautomiu, abiabi lorodi i abidi arimiu eai va abo se lautom.

²¹Tatao abo si ene, Nigee, Guiau mo abo ai heaeaiei.

²²Iosua abo i ribalau tatao aridi eai i ene, Au witinesiuioimiu, Guiau au hineri, ia abo au heaeaiei. Si ene Ai witinesi ede.

²³I ene, hari eaubada boeamiu eai au gabaedi, Guiau Isaraela edi Eaubada nuamiu abo se lauei.

²⁴Tatao se ribalau Iosua arinai, si ene, Guiau eda Eaubada abo ai heaeaiei, ia arinana abo ai avaabiei.

²⁵Arinai nei asubena eai ne Iosua tatao i ribahesunumadi, laugagaeo, eo sanapu esau Sekema eai i toredi.

²⁶Iosua Eaubada ena laugagaeo bukana eai teina riba ta i uridi: veu tau lailai i abi, i hetoro oeagi paana eai, Guiau ena numa tabuna hasarina eai.

²⁷Iosua i ribalau tatao gamagaridi aridi eai, i ene, Au ita, arida eai teina veu ta abo eda witinesi: paana riba gamagaridi Guiau i ribalau arida eai i ataiei: arinai abo ia eda witinesi, ata emi Eaubada au morui.