Josue 24:13-27

¹³Mibeǥayan ku sikiyu te tanà he wazè niw heǥui. Impeubpè ku sikiyu ziyà te menge inged he kenè kew iyan mibangun duen. Egkaan kew ǥuntaan te menge paras wey menge ulibu he kenè kew iyan nemula zuen.

¹⁴“Umbe ǥuntaan, ezapa niw is Nengazen ne penilbi kew kandin te tinutuuwà. Engkezi niw en is menge ed-ezapen he ebpen-ezapen dengan te menge kepuun niw ziyà layun te Wahig he Eufrates wey ziyà te Ehipto, ne penilbi kew te Nengazen.

¹⁵Iyan, emun kenè niw igkelipey is kebpenilbi te Nengazen, pilì kew ǥuntaan he andew ke hentei is edsilbiyan niw. Iyan be is menge ed-ezapen he midsilbiyan te menge kepuun niw ziyà layun te Wahig he Eufrates, etawa iyan is menge ed-ezapen te menge Amorihanen he mid-ubpaan niw ǥuntaan is tanè dan. Piru siak mulà wey is pemilya ku, Nengazen is kenami he edsilbiyan.”

¹⁶Ne midtavak is menge etew te, “Wazà kayi te isip dey he ed-iniyuǥan dey is Nengazen wey ebpenilbi key te zuma he ed-ezapan.

¹⁷Is Nengazen he Megbevayè tew iyan mibpeǥawas kenitew wey te menge kepuun tew te kegkeuripen diyà te Ehipto. Ne neehè tew zaan is egkengein-inuwan he mibeelan din. Ne wazè din ituǥut he mekeizi kiw zuen te hipanew tew ziyà te teliwazà te menge nasyun he imbayè tew.

¹⁸Dutun te kedhengkayi tew te tanà, midsegseg te Nengazen is menge Amorihanen wey zuma pa he menge etew he ebpemen-ubpà kayi. Umbe ebpenilbi key zaan te Nengazen, su iyan sikandin Megbevayè dey.”

¹⁹Ne migkaǥi si Josue ziyà te menge etew te, “Kenè kew ebpekehimu he ebpenilbi te Nengazen su waǥas sikandin he Megbevayà wey tengelikuzen, su kenè din egkesuatan ke zuen selakew en he ed-ezapen niw. Kenè din ibpelavey is kebpekidsukulè niw wey menge salè niw.

²⁰Emun ed-engkezan niw is Nengazen ne ebpenilbi kew te zuma he menge ed-ezapen, egkepeukan kew zin ne edsilutan kew zin. Edèdeetan kew zin minsan pa te mibpurungan kew zin dutun te nehuna he timpu.”

²¹Piru midtavak is menge etew ziyà te ki Josue te, “Ebpenilbi key iyan te Nengazen.”

²²Migkaǥi si Josue te, “Iyan kew en ebpeketistiǥus te keugelingen niw he penaad, nenaad kew he ebpenilbi kew te Nengazen.” Midtavak sikandan te, “Uya, iyan key en menge tistiǥus.”

²³Migkaǥi si Josue te, “Emun iyan heeyan, engkezi niw en is menge ed-ezapen niw, ne penilbi kew te Nengazen he Megbevayà te Israel.”

²⁴Midtavak is menge etew te, “Edsilbiyan dey is Nengazen he Megbevayè dey, ne edtumanen dey is menge suǥù din,”

²⁵Dutun he andew midheǥet ni Josue is kebpepenengdua zin te menge etew ziyà te Shekem, ne imbeǥey zin diyà te kandan is menge kesuǥuan wey menge sulunuzen.

²⁶Insurat din heini ziyà te Libru te Kesuǥuan te Megbevayà. Ne migkuwa sikandin te zekelà he vatu ne impelastar zin diyà te lempek te kayu he ulayan he uvey te segradu he lugar te Nengazen.

²⁷Ne migkeǥiyan ni Josue is langun he menge etew zutun te, “Heini is batu iyan tistiǥus te kebpekidlalag te Nengazen kenitew. Egkehimu heini he tistiǥus kuntra keniyu emun ed-iniyuǥan niw is Megbevayà.”