Josua 24:13-27

¹³Iwe, üa ngenikemi eu fanü ämi ousap angang ngeni, üa pwal ngenikemi telinimw pwe oupwe imweimw lon, nge sap aüemi, oua pwal ochoch föün irä seni ekewe tanipin irän wain me olif, nge sap fotukiemi.’

¹⁴Iei mine oupwe meniniti ewe Samol mi Lapalap o angang ngeni fän leten lelukemi pwal fän allükülüköch. Oupwe pöütala ekewe kot ämi kewe lewo ra fel ngeniir me pekilan ewe chanpupu Oifrat pwal me Isip, nge oupwe chök angang ngeni ewe Samol mi Lapalap.

¹⁵Nge ika ousap mochen angang ngeni ewe Samol mi Lapalap, ikenai oupwe filätä iö oupwe angang ngeni. Oupwe filätä ika oupwe angang ngeni ekewe kot ämi kewe lewo ra angang ngeniir me lon ewe fanü pekilan ewe chanpupu Oifrat, ika än chon Amor kewe kot mine fanüer we oua nom lon. Nge ngang me chon leimwei, äm aipwe angang ngeni ewe Samol mi Lapalap.”

¹⁶Iwe, ekewe aramas ra üreni, “Äm aisap fokun likitala ewe Samol mi Lapalap o angang ngeni pwal ekoch kot.

¹⁷Pun ewe Samol mi Lapalap äm we Kot, i a emwenikeemiwu me äm kewe lewo seni ewe fanü Isip, ewe leni ia ra nöünikem amanau ie. Aia küna ekewe manaman i a föri. A tümwünükem lon unusen äm sai lein chon ekewe mwü meinisin ia aia pwerela ie.

¹⁸Iwe, ewe Samol mi Lapalap a asüela me mwem chon ekewe mwü meinisin, pwal ekewe chon Amor mi nom lon ewe fanü. Iei mine pwal äm aipwe angang ngeni ewe Samol mi Lapalap, pun i äm Kot.”

¹⁹Nge Josua a üreni ekewe aramas, “Ämi ousap tongeni angang ngeni ewe Samol mi Lapalap, pun i eman Kot mi pin, i pwal eman Kot mi lukomong. Esap mochen amusala ämi pupungau me tipis.

²⁰Are oua likitala ewe Samol mi Lapalap o angang ngeni pwal ekoch koten ekis, i epwe kul o afeiengauakemi. Epwe arosakemiila mürin an afeiöchükemi.”

²¹Nge ekewe aramas ra üreni Josua, “Apwi, äm aipwe chök angang ngeni ewe Samol mi Lapalap.”

²²Mürin, Josua a üreni ekewe aramas, “Ämi oua püsin chon pwärätä fän itemi, pwe oua filätä ewe Samol mi Lapalap pwe oupwe angang ngeni.” Nge ir ra üreni, “Äm aia chon pwärätä.”

²³Mürin, Josua a üreniir, “Oupwe pöütala ekewe koten ekis mi nom remi o akulu lelukemi ngeni ewe Samol mi Lapalap ewe Koten Israel.”

²⁴Iwe, ekewe aramas ra üreni Josua, “Äm aipwe chök angang ngeni äm Kot ewe Samol mi Lapalap, aipwe pwal aleasochis ngeni alon.”

²⁵Iwe, lon ewe ränin Josua a angei än ekewe aramas pwon, a pwal föri allük me pwüüng fän iter me lon Sikem.

²⁶Iwe, Josua a makei ekei kapas lon än Kot we puken allük. Iwe, a angei eföü fau watte o aüetä fän ewe irä ook lon ewe leni mi pin än ewe Samol mi Lapalap.

²⁷Nge Josua a üreni ekewe aramas meinisin, “Nengeni, ewe fau epwe eu pisekin pwärätä ngenikich, pun a rongorong ekewe kapas meinisin ewe Samol mi Lapalap a ürenikich. Iei mine epwe eu pisekin atuttur ngenikemi, are oua ü ngeni ämi we Kot.”