Josua 24:13-27

¹³Nambame yuu mendena nakamame mende yulu pyuo wara pii nange dokope dee taone nakamame waso pii nayami dupwape nyuo jiyu. Dokona lao epapu dakepa nakama yuu dokona karapala isa girapo olipipi dupwa nakamame wara pii nayami dupwana jingi lyuo nao palaminyi, Kamongome dopa letamo lao Josuame leya.

¹⁴Dopa lapala Josua pii konda pyuo leya. Epapu dakepa Kamongo doko rape rape lao banya yulu rolae pyakamyuo yaki nyii nalapape. Nakamana rora ambasu dupwa yuu Mesopotemia dee yuu Isipi dokona bange wakale anatuŋu lao lakandeyami dupwa nyuo nembalapape. Nembapala nakamame Kamongona yulu iki pyakamilapape.

¹⁵Dokona lao nakamame Kamongona yulu dokona pinya lao suu pyaa narami ramo nakamame mendena yulu pyakamirami lao suu piyami kande doko dakepa rombo palyuo lalapape. Nakamana rora ambasu dupwa yuu Mesopotemia dokona karo bange wakale anatuŋu lao lakandeyami dupwape panda yuu Amote karaminyi dokona wambunya anatu wakale dupwana lao rombo palyuo lalapape. Dopa piraminyipape nambamoo nambana ree palu dupwape Kamongona yulu pyakamirama, leya.

¹⁶Leyamo dokopa wambu dupwame isingi lao, Kamongo Anatu yaki nyii napala anatu menge dupwana yulu pyakami narama ingilyamo, leyami.

¹⁷Lapala namwana Kamongo Anatu dokome namwana rakange dupwape namwape yuu Isipi dokona kendemande yulu pyakamyuo kareyamano dokopa neta nyuo lanyuo epeya. Epeyamo dokopa yulu andake piyamo dupwa namwame kandeyama. Namwa panya peyamano dupwana akali rara wakale wakale dupwame namwa pyalana piyaminyipape Anatumi namwa nyuo retaro karo nyiso lanyuo peya.

¹⁸Namwa epeyama dokopa namwana Kamongo Anatu dokome Amote wambu yuu dakena palenge dupwa pyao ralinyi nembakaya. Nembakayamo dokona lao namwa opetae Kamongona yulu pyakamirama. Baa namwana Anatu, leyami.

¹⁹Leyaminyi dokopa Josuame wambu dupwa kando dopa lamaiyuo, Nakamame Kamongona yulu kapa pyakami narami ingilyamo rapisi. Baa Anatu poo pyasi wakasa dokome kyambo anatu dupwa lakanda narami lao suu pilyamo. Baame nakamana koo dupwa nyuo kame saka nara ingilyamo.

²⁰Dee mende nakamame Anatu yaki nyepala rara wakalena kyambo anatu lenge dupwana yulu pyakamyuo kararami ramo Anatu baame nakamana yanda pimwai ingyuo randa joo pira. Wamba baame nakama keta elyape ingyuo pisiyamopape epapu baame nakama pyao kokwa sera, leya.

²¹Leyamo dokopa wambu dupwame Josua lamaiyuo, Doko daa. Namwame Kamongona yulu pyakamirama, leyami.

²²Leyami dokopa Josuame isingi lamaiyuo, Kamongona yulu pirama lao nakama range lalu lao lao karaminyi, leya. Leyamo dokopa nakamame dopa lao, Kinyi. Namwa rangeme lalu lao letamano, leyami.

²³Leyaminyipa Josuame lamaiyuo, Nakamame pii doo letaminyi dokona rara wakalena kyambo anatu nyisa nembapala Kamongo Isaraele wambunya Anatu doko iki yapalyepala mona kapu kyuo maipwape, leya.

²⁴Leyamo dokopa wambu dupwame Josua kando isingi lao, Namwana Kamongo Anatunya yulu pyakamyuo banya pii dupwa laramuli pyuo warombo soo kararama, leyami.

²⁵Leyaminyi dokona Josuame kana minyuo lalu lao lenge pii wambu dupwana lao pyao palyiya. Pyao palyapala yuu Sikeme dokona baame nakamame mawa piipi mana piipi minyuo pyuo kararami lao maiya.

²⁶Maipala Josuame mawa pii dupwa buku Anatunya lowa pii pyasi palenge dokona pyao reteya. Retapala kana andake mende nyepala Kamongona misi lenge panda dokona isa oke lenge kareyamo renge dokona reteya.

²⁷Retapala Josuame wambu dupwa lamaiyuo, Kamongome namwa pii langipyamo dupwa peparae kana dakeme sipyamosa namwame yuu peparae kana kandapala kana minyuo lalu lao lenge pii dokona lao suu pyarama. Suu pyapala kana dokome lasaka pili lao nakamame namwana Anatu baa kando kamba laa naramisa pira ingilyamo, leya.