Josua 24:13-27

¹³Tama tiyu, eno dagebolo te tǫ me deli te duga digi sę me isąwai digi, te tǫ dagebolo mani. Tama eno dagebolo te dagego me nigisiąwai hanu me mobadi yali. Megi dage te bulu dabede bidaluyu, tama dagego te ni du wain, me te ni oliv me tuyu bidibao. Tiali goli, te duga digi me bulusiąwai dao,’ dago Genuai Bidi God agai te po obao,” Josuago te po wai.

¹⁴Tama Josuago po ma weyu, te po wai, “Tialima, megi da, dagego te Genuai Bidi dologode bidiyu, agaba lotu po weyu, tama sesemane sogo dagego agade sę te dagego bomo tigidali teba munama, sę yao. Dagego te tibo godiba homu kone ebo tagalama, te duga wąį dabego te Mesopotemiade me te Isip pedai badu side bidali sogo augwalibolo te lotu po wali. Dagego te Genuai Bidiba naga lotu po wao.

¹⁵Tiali goli, dagego te Genuai Bidiba lotu wabo hagela homu ebaso da, teda dagego bugagia homu kone palao. Te dagego lotu po debolo waibawe? Te duga wąįgo te Mesopotemiade te tibo godiba lotu wali te Godiba lotu po waibawe? Ma, te Amor dabego tibo god, te megi te dage te bidibo tǫde te Godiba lotu waibawe? Tiali goli, ena, te ena we wai sibi dali, te dago da te Genuai Bidiba naga lotu po waibao,” Josuago te po wai.

¹⁶Tama te we bidi augwaligo te tiwai po wei ponoyu, te po wai, “Dago te Genuai Bidi tagalama, te tibo god dabeba lotu munu me wagobeo! Mu menio!

¹⁷Te Genuai Bidi deli naga te dago God, tama agai te da dali, te dago aya dede dali, te Isip kalabus sęde bidibadi, te da ma dobola selama, odasa asali. Tama dago te agai te ebo bomai sę suali. Te da gasa hani dabego tǫde bilaluali sogo, tama da te mena pabo sogo me, te Godigo da bugagia tonalualigo te da bugagia bidali.

¹⁸Te da asali sogo, Genuai Bidigo te tigidali hani bage ela gudulubo sę yali, te Amor dabe dali, augwali te e tǫde bidibadi tiali. Tama tibaso, dago me te Genuai Bidiba lotu waibao wali. Aga deli naga te dago God dao,” augwaligo te po wai.

¹⁹Tialima, Josuago augwalibolo te po wei ponani, “Te dagego homugo te Genuai Bidiba lotu po wabo homu ebawe? Aga te magi dwai sę isiąma, tama agai homugo te dagego tibo godiba lotu wabo hagela homu ebao. Agai homu te tibo god me deligo aga me hasegelegobeo. Te agai dagego sęgę me dwai sę yali te me sela sągobeo.

²⁰Tama mu tama, agai polobadu dagebolo wiegi yai sę mu yali, tiali goli te dagego Genuai Bidi tagalama, tama te gasa hanigo tibo Godiba lotu po obaso da, teda Genuai Bidigo po wado po olama, tama agai dage dene ilama, tama agai dage dolaibao,” te po wai.

²¹Tiali goli, te we bidigo Josuabolo te tiwai po wei ponani, “Mu menio! Te sę me egobeo. Te dago Genuai Bidiba naga lotu po waibao.”

²²Tialima, Josuago augwalibolo te po wali, “Duga digi haninama pusali, tama duga digi te Genuai Bidiba naga lotu po wabo po dąų wali.” Tama augwaligo te po wali, “Te tama dao! Dago haninama po pusali. Te dena digi dade wali po dao.”

²³Tama Josuago po ma wali, “Tialima, dagego te gasa hani dabego te tibo god dage tomode bidalubo te dagego sela sąyao. Tama dagego duga homu tigidali te God, te duga Israel dabego Genuai Bidiba muao.”

²⁴Tama te we bidi augwaligo Josuabolo te po wali, “Dago te Godiba lotu wainogo, te dago Genuai Bidi, tama aga bomai po naga wali paibao.”

²⁵Tialima, te sogo Josuago te we bidi dabe dali po me deli dąų walali. Tama te bulu Sekemde Josuago te bomai po me te po me asęnama, augwalibolo mani, te augwaligo wali pomainogo.

²⁶Josuago te po dabe te Godigo bomai po elalubo buku me deli tomode asęani. Nosali agai te masigi me deli selama, tama te ni kali pąde, te Genuai Bidiba lotu po wabo madi pąde te masigi dolaluama, muani.

²⁷Tama Josuago te we bidi augwalibolo wali, “Te sesemane sogo dago te masigi subo sogo da, te dago homugo te dago te dąų wali poba homu kone ma palaibao. Te masigigo te Genuai Bidigo dabolo wali po tigidali odali. Te dage homu hodolabo dąį me deli te ilali, te dagego te dena Godigo po munu me sela sąnamu dao,” te po wali.