Iosua 24:13-27

¹³A habia ne mua a malala, i uka ma mu leho vona. A habi ne mua a maka tanga i uka ma mu rata. Ngane mu made vona a maka tanga nga, mu kani a maka kanena kai a vain a oliv. Ra maka kai nga i uka ma mu varo na limane mua.’”

¹⁴E Iosua i vakalongo lobo a nitane BAKOVI DAGI, i ta tabu i ta maea, “Ngane mu longo. Mu togoa e BAKOVI DAGI, mu ramaia mu rata vakaroro a leho vona na hatene mua. Mu lohopile vona a maka vure ranga e huriki a gare ne mua ri kavurike ria na tabeke ne Mesapotamia ne Egipto. Mu ramai kunanea e BAKOVI DAGI.

¹⁵Mua, i uka ma mu ngaru ni ramai e BAKOVI DAGI, mu luhoi kamumu. E rei ngane mu gu ramaia? Mu gu kavurike a maka vure ranga ne huriki a gare ne mua o Mesapotamia? O mu gu kavurike a maka vure ranga ne huriki a Amor, ra mu made na malala ne ria ngane? Pali iau, turana a kabu nau, mete ge ramaia mete ge kavurike kunanea e BAKOVI DAGI.”

¹⁶Lakea e huriki ri koli ri ta maea, “Mi koi hateka ni kavurike a vure ranga, mi gi kavurike kunanea e BAKOVI DAGI.

¹⁷Ia kunana e BAKOVI DAGI a Vure ne mia, i bole mule mia turane huriki a gare ne mia na tahuna mi leho manga a vorakato o Egipto. Mi matai pali a maka nivakasiri dagi i rata. Na tahuna si laho polo vona a malala na kabu ranga, na tahuna si lakea na tabeke ranga e BAKOVI DAGI i matakari hita si laho kamumu.

¹⁸Na tahuna si laho valai, e BAKOVI DAGI i vakatubu ni lili tala e huriki a Amor ra ri made muga koea. I mavonga, mia ranga mi gi kavurikea e BAKOVI DAGI. Ia kikeri a Vure ne mia.”

¹⁹E Iosua i ratea ne ria a nita iea, “Pali iau a luhoi mua, i uka ma mu kara ni ramaia e BAKOVI DAGI. Re BAKOVI DAGI a narona i kamumu i malamala, i marikoi ne mua mu gu kavurike a vure ranga, bara mu rata mavonga i uka ma ge puga vuroki a nitagege, a naro hale ne mua.

²⁰Mua mu pea e BAKOVI DAGI mu kavurike a vure ranga bara i ngalahere i habi a vuranga ne mua. I muholi e BAKOVI DAGI i rata kamumu mua, pali na tahuna mu ngalahere vona, bara i ratapile mua.”

²¹Pali e huriki ri takia e Iosua ri ta maea, “I uka liu, mi gi ramai kunanea e BAKOVI DAGI.”

²²Lakea e Iosua i taki ria, “Mua kunana mu puka tala a ngava pali, mu ta muholi mu gu ramai kunanea e BAKOVI DAGI.” Lakea ri ta maea, “I muholi, mi ratea na ngavane mia a nita iea.”

²³E Iosua i ta tabu i ta maea, “I kamumu a ngava mu ratea. Ngane mu vuroki tala a maka vure na kabu ranga ri tabuli turane mua. Mu pulo a narone mua, mu lakea tabukoi ne BAKOVI DAGI a Vure ne hita a Israel.”

²⁴Lakea e huriki a bakovi a ngatavine ri takia e Iosua ri ta maea, “Mi ngaru kunana mi gi kavurikea e BAKOVI DAGI a Vure ne hita, mi gi ramai a maka vinara vona.”

²⁵Na parava iea kunana na tanga e Sekem, e Iosua i ratea tara ngava dagi turane huriki, i habi a maka vinara ne ria, i taki ria ri gi ramai.

²⁶E Iosua i here dili a nita nga na puhu i tabuli vona a maka vinara ne BAKOVI DAGI. Muri i bolea tara kedo i vakapesia na taruna a kai a ok, tabukoi na mailo ne BAKOVI DAGI.

²⁷Lakea e Iosua i taki e huriki i ta maea, “Na tahuna si masia a kedo iea, bara si luhoi mulea a ngava dagi si ratea. A kedo iea i longo pali a nita lobo e BAKOVI DAGI i taki. Bara i tabuli manga a kilakila ne vona ni bole mule a niluhoi ne mua, i uka ma mu gu longotaro a nitane BAKOVI DAGI ne hita.”