Ose 11

1

2

3

4

5

6

7

8

9

10

11

12

13

14

¹«Maa soppoon Israyil ba muy ndaw, Fa Misra laa ko wooye, muy sama doom.

²Lu ñu leen gëna woo, ñu gën maa sore. Ay tuuri Baal lañuy defal ay sarax, te ay xërëm lañuy taalal cuuraay.

³Ndaxam man maa tette Efrayim, fab ko, te ràññeewuñu ne maa leen topptoo.

⁴Ay goji nit laa leen ñoddee, ay buumi cofeel. Maay ki leen yolomalal ŋalaabi ŋaam, sëgg, leel leen.

⁵Duñu dellu réewum Misra. Waa Asiri ñooy doon seen buur, nde ñoo baña délsi fi man.

⁶Ab saamar ay wëndeelu ca seen dëkk yu mag, dàjji seen bunti dëkk, ba warax leen ndax seeni mébét.

⁷Sama ñoñ dañoo làggi ci ñàkke ma kóllëre, wooyees na leen fa kaw, te kenn ci ñoom jógul.

⁸«Efrayim, ana nu ma lay baye, yaw Israyil laa ne, nu ma lay tege ciy loxo? Ana nu ma lay defe ni Atma? Nu ma lay yemaleek Ceboyim? Sama xol a bëpp, sama yërmandee yëngu.

⁹Duma wéye di tàkkal sama mer, duma yàqteeti Efrayim, ndax maay Yàlla, duma nit, maay Aji Sell ji ci seen biir, duma dikke am sànj.

¹⁰Dees na topp ci gannaaw Aji Sax ji, muy yëmmu ni gaynde. Mooy yëmmu moos ni gaynde, ay doomam di lox, jóge sowu.

¹¹Ni njanaaw lañuy loxe, jóge Misra, mel nim pitax, bawoo Asiri. Maa leen di dëël seeni kër.» Aji Sax jee ko wax.