Hozea 11

1

2

3

4

5

6

7

8

9

10

11

12

13

14

¹Totoso koburuna se Izireli, si tataru nia Rau si asa, ke tioko vura nia Arau pa Izipi sa Tuqu koreo.

²Ba totoso titioko nono la si Arau koe Izireli, si rizu va seu nono la tu si arini koa Rau. Va vukivukihi la koe Beolo si arini meke va uququ humaṉa lea la si arini koari na beku.

³Arau mo va tumatumae nia ene se Iparemi, turaṉi Arau pa lima dia; ba lopu boka tumae nia rini sapu Arau mo salaṉi.

⁴Arau turaṉi koasa iku tataru koari na aroso tataru kopuni Rau. Ovulu pania Rau sa ioki pa ruadia meke kokopo gore si Arau pude poni i.

⁵Hokara kote pule la mo pa Izipi sari meke hokara kote Asiria mo baṉara ni sina korodia pule mae koa Rau?

⁶Na vedara si malakapi pa korapa dia vasileana, kote ta huara sari roto koari dia sasada meke va mate pani sari dia hiniva.

⁷Sari Qua tinoni si ṉiṉira sa dia hiniva pude taliri va seu koa Rau. Be titioko mae si arini koa Arau sa Tamasa Ululuna Hola ba lopu kote la si Arau meke ovulu sageni.

⁸Iparemi, vea meke kote veko pani igo Arau? Izireli, vea meke kote vala nigo Arau koari na kana? Vea meke kote huara igo Arau gugua ari pa Adima? Vea meke kote guni nigo Arau sapu gua ari pa Zeboimi? Sa Buloqu si hobe pa korapaqu Arau; siṉia na tataru sa Buloqu.

⁹Lopu kote va gorevura ia Arau sa Qua tinaṉaziri, meke lopu kote taliri si Arau meke huara ia se Iparemi. Ura na Tamasa si Arau meke lopu na tie, sa Tamasa Hopena si pa vari korapa mia. Lopu kote mae si Arau pa binugoro.

¹⁰Kote luli Au rini si Arau Zihova kote kurumu guana laione si Rau. Meke pana kurumu si Arau si kote neneqara sari Qua koburu meke pule mae gua pa kali lodu rimata.

¹¹Kote neneqaradi meke kamo mae guana kurukuru, mae guadi pa Izipi, guana kukuva pa Asiria. Kote va koa i Arau pa dia popoa,” zama vura gua se Zihova.

¹²Zama se Zihova, “E Iparemi si ele vari likohae Nau koha, sa butubutu Izireli si vari likohae Nau sinekesekei. Meke Ziuda si lopu pamaṉa nia sa Tamasa, lopu vahesi Au rini, Arau sa Tamasa Hopena sapu kopu ni sari Nana zinama.