1Genuai Bidigo po wadolama weyu, te tiwai wali, “Te Israel dabe te dwasianu ogwa wai tiwai digi, eno aga godolo mu elama, te eno aga i olama, te Isip taga soao olama, te eno ogwa bidalio.
2Eno te hauwa sogo augwali i weyu, te ena wali asao po wai. Tiali goli, sesemane sogo te augwaligo ena tudiba muani. Eno we bidi augwaligo te tibo god Balba ofa yalio. Augwaligo te wiegi yai denami ebo hano ilibo ofa te haniani tibo godiba yai dao.
3Ena digi eno te Israel dabe ola mawai, te ayago te wai sunumi ola mabo tiwai yali. Te eno nogogo augwali tolasa asai. Eno augwali usu ma ilali, tiali goli augwaligo eno digi eno te sę augwalide yali homu me ebeo,” wali.
4“Eno augwali homu dene elama, te eno augwali godolo mu yai, tama eno augwali enaba sali. Eno te augwalide elaluali genuai sęgę sela sąnama, te augwali bugagia wiegi yai ilama, te augwali nai manio.”
5“Tiali goli, augwali enaba me asisąwai. Tialima, augwa te Isipba ma pomainu ebowe, ma te Asiria dabego augwali tonalumainu egowe yaibao.
6Genuai boi hwįyu, te boi bidi dabego te taun obo sunumi aluama, tama augwali te taun tomoba pelama, hwįaibao. Te boi hwįbogo te eno we bidi silaibao,” wali, “magi baso meni, te augwaligo augwa homu kolesaga naga wali pai.
7Sesemane sogo augwaligo bomonama, ena tudiba muani, tialima eno augwaliba te mawainu ebo dwai dene te augwali me geda mugobeo. Te genuai sęgę augwalide elalubaso, te augwali dwai gela waibao. Tama te mena bidi me deligo te sęgę me sela sąwainu ebaso, usu me egobeo,” wai dao.
8“Dage Israel, te eno dage tagalu da me egobeo,” wali, “te ena dagede wi me pogobeo. Tama eno dage te bulu Atma me Seboim, te bulu si bidi hani mu silali tiwai gilama da me tegobeo,” wai. “Eno dage tigidali mu doloyu da me egobeo, magi baso meni, eno dage godolo homu mu ebo dao,” wali.
9“Eno dageba haliga sębę yali, tiali goli eno dageba te dwai dene da me magobeo. Magi baso meni, eno kolesaga te bidigo kolesaga tiwai menio. Ena God, te eno kolesaga tedali gasagi yai elalubao, tiali goli ena te dage dali bidibao. Eno wado elama, te eno dage doloyu da me egobeo,” wabo dao.
10“Te eno ena we bidi dabego boi bidi te i bomonama weyu, te hasa laiongo ga weyu, i wabo tiwai eyu, te eno augwali wi ilaibao. Tama eno we bidi dabego te giliga dega sigulubo badu tagalama, tama didibili ebo dali te polo asesa, ena wali asaibao.
11Te augwaligo Isip tagalama, tama te polo asesa asu, te ba bola asobo tiwai yaibao. Awe, augwali me Asiria tagalama, te ba hi dabe tiwai bola asaibao. Tama eno augwali te augwa page buluba ma odasa asaibao. Ena Genuai Bidi, eno te po wai dao,” wali.
12Genuai Bidigo po ma weyu, te po wai, “Te Israel we bidi augwaligo enaba tibo po hauwa sogo mu wai. Te Juda dabego eno po sela sąbo sę mu idualio. Tiali goli, ena God, ena augwali tiwai menio. Ena doloba pai, te eno homu hasegelama, te eno tibo po me wagobeo, te we bidide eno homugo mu kęą pai God dao,” te po wai.
