Gaalu Sɛʋɛi 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Ɠɔoɠɔ GALAGI ɓɔɛni Moize ʋɔ, é ɠɛ ma:

²«Ɓɔɛ Aalɔn ʋɔ, è ɠɛ ma: Siɛgi zu è fitina lɔfelaiti seizu la ti-zeizuʋɛti, ɗa ti zei ga pagɔ, nii a kɛ ti-ma zezei ɗa ɠula fitina zei anii ɠakala, ʋelela ʋelei.»

³Aalɔn kɛɛni ɠana. É fitinaiti seini, fitina zei anii ɠa ʋelela ʋelei, eɠɛʋelei Ɠɔoɠɔ GALAGI ma levei veeni la Moize ya.

⁴Pɛtɛ ʋelei fitina zei anii ɓɛtɛni la, é ɠɛni ga zanu doɠai, é zo kɔɠɔi ma, é lɛ ma wulu ʋuaiti pɔ. Ti fitina zei anii ɓɛtɛni, é zoloo naama ɠazaʋigi ma, nii Ɠɔoɠɔ GALAGI dɛɛni ga Moize.

⁵Ɠɔoɠɔ GALAGI ɓɔɛni Moize ʋɔ, é ɠɛ ma:

⁶«Leevi nuiti seɠe Izelayɛle nuiti saama, è ti ɲade.

⁷Wɛlɛ ʋelegi ɗa ti ɲade da. Ɗa ziɛi vaza ti ma, nii é ga ɲade ɗɛi, ti kpekai zeɠe, ti ti-ɓusɛi maaʋɛ pɛ bo da, ti ta-zeɠeiti gba. Tɔgi letemazu ti ɲadegai ɠana.

⁸Ta nikɛ zinɛ ɓokpa gila seɠe, é ʋɛɛ vebɛanii ʋa, nii soloogai ma, naa ɠa é ga ɓulu vukɔ ʋagɔi, gaayɔgai ga gulɔi. Ɗɔun ɗa nikɛ zinɛ ɓokpagi velesiɛi zeɠe, é ɠɛ ga koto gba zalaɠai.

⁹Ɗa li ga Leevi nuiti GALA daaɠomi seɠe ʋɛlɛi laaʋɛ, è Izelayɛle nuɓusɛiti kpein toli.

¹⁰Ɗa Leevi nuiti maaɓuɠa Ɠɔoɠɔ GALAGI ʋa, Izelayɛle nuiti ti yeei la ti ma.

¹¹Aalɔn ɠa Leevi nuiti fe nɔ̀un bɛ, Ɠɔoɠɔ GALAGI, Izelayɛle nuiti bɛ, ta lɔ niina nà-botii zu.

¹²Leevi nuiti ta yeei ʋɛɛ nikɛ zinɛ felegɔiti unmaʋɛ. Ɗa ti ɠula ga zalaɠai, gilagi ɠɛ ga koto gba zalaɠai, zɔi ɠɛ ga gala zalaɠai, naa ɠa a kɛ koto gba zalaɠai ɠula Leevi nuiti bɛ, eɠɛʋelei tɔgi la.

¹³Ɗa Leevi nuiti to Aalɔn ta ná-doun zunuiti kakala, è ti ve Ɠɔoɠɔ GALAGI ʋɛ.

¹⁴Pele ɠana, ɗa Leevi nuiti sei la yɛ, Izelayɛle nuiti saama, ta ɠɛ ga nɔ̀nɔiti.

¹⁵É zo názu ma niina, ta lɔ botii zu, ti ɗa kɛ GALA daaɠomi seɠe ʋɛlɛi wu. «Maanɛɛʋɛ è Leevi nuiti ɲade, è ti ve bɛ̀ ɠana.

¹⁶Mazɔlɔɔ ti veeʋɛ bɛ̀ ɲɛgɛlɛin Izelayɛle nuiti saama, ga Izelayɛle nuiti ti-loun zunu mɔungiti potogi. Gè Leevi nuiti seɠeʋɛ ga nɔ̀nɔiti.

¹⁷Mazɔlɔɔ doun zunu mɔungi kpein ka ga nɔ̀nɔ, Izelayɛle nuiti saama, nuiti ti-lointi, ta suaiti ti-ma yiʋoiti. Voloi gè doun zunu mɔungiti paani la Ezipete yooi zu, naama yeei ɠa gè ti makɛni la ɓɔɠɔ ʋɛ.

¹⁸Gè Leevi nuiti seɠeʋɛ, ga Izelayɛle nuiti ti-loun zunu mɔungiti potogi.

¹⁹Gè ti veeʋɛ Aalɔn ta ná-doun zunuiti bɛ Izelayɛle nuiti saama, ga ti Izelayɛle nuiti ta-wotii ɠɛ GALA daaɠomi seɠe ʋɛlɛi wu, ta botii ɠɛ ti ya, koto gba vai zu. Naazu faa ɲɔu la ɠɛa ga Izelayɛle nuiti, mazɔlɔɔ ti la maaɓuɠazu seizu ɲadegai ʋa.»

²⁰Moize ta Aalɔn, ta Izelayɛle nu ʋɛbɛi kpein, ti naa ɠɛɛni Leevi nuiti ta-vaa zu, nii kpein Ɠɔoɠɔ GALAGI ma levei veeni Moize ya, é ʋilɛ ti ʋa.

²¹Leevi nuiti ti ɓɔɠɔ ɲadeni, ti ta-zeɠeiti gba. Aalɔn ti veeni Ɠɔoɠɔ GALAGI ʋɛ, é tɔgi ma ɲade fai laazeeli koto gba vai zu ti ʋɛ, nii a kɛ ti ɲade.

²²Naa ʋoluma, Leevi nuiti ti lɔɔni botii zu, GALA daaɠomi seɠe ʋɛlɛi wu, Aalɔn ta ná-doun zunuiti zeezu. Ti kɛɛni ta-vaa zu, eɠɛʋelei nɔ Ɠɔoɠɔ GALAGI ma levei veeni la Moize ya.

²³Ɠɔoɠɔ GALAGI ɓɔɛni mɔnɔ Moize ʋɔ, é ɠɛ ma:

²⁴«Leevi nuiti ti kona ʋuufelegɔ maazu lɔɔlugɔi (25) zɔlɔɔgai, eyɛsu é lɛ zeemaazu, ta lɔ botii zu, ti ɗa kɛ GALA daaɠomi seɠe ʋɛlɛi wu.

²⁵Zɔi a kona ʋuulɔɔlugɔ (50) zɔlɔɔna, naa ná-botii ɠa ɠwɛ niina, é la mɔ botii ɠɛa.

²⁶Toɠa zoo é ɗa ɓɔ kɛɛɠɛleaiti ba GALA daaɠomi seɠe ʋɛlɛi wu, naati ta-wotiiti su, kɛlɛ tɔ ɓɔɠɔi la mɔ botii ɠɛa. Pele ɠana ɗa Leevi nuiti ta-boti vaiti so da.»