1Ntɛ Rasɛl ɛnəŋk fɔ eyi fɛ kəkomɛ Yakuba mɔ, k'ɔyɔnɛ wɛŋc wəran Leya kəraca. Kɔ Rasɛl oloku Yakuba: «Məsɔŋ im awut kɔ pəyi fɛ ti-ɛ, iŋfi!»
2Kɔ pəntɛlɛ Yakuba nnɔ Rasɛl eyi mɔ, k'oloku: «Iŋcəmɛ dəkəcəmɛ da Kanu, nkɛ kəntɔsɔŋ əm dokombəra mɔ?»
3Kɔ Rasɛl oloku: «Wəcar kem wəran Bilha ɛwɛ, məfəntərɛ kɔ nkɔn ntɛ tɔŋsɔŋɛ pəsɔtɔ wan mɔ. Nnɔ suwu sem s' endekom wan wəkakɔ, pəsɔŋ' em kəyɔ wan.»
4Kɔ Rasɛl ɔsɔŋ Yakuba wəcar kɔn wəran Bilha. Kɔ Yakuba ɔŋkɔ kɔ,
5Kɔ Bilha ɛmbɛkəs, k'oŋkomɛ Yakuba wan wərkun.
6Kɔ Rasɛl oloku: «Kanu Kəpɔŋ kəmboc' em kiti, kɔ kənesɔ dim dem, kəmpoc' em wan wərkun.» It' ɛnasɔŋɛ wan wəkakɔ tewe ta Dan.
7Kɔ Bilha wəcar ka Rasɛl, ɔŋgbɔkərɛ sɔ kəbɛkəs, k'oŋkomɛ Yakuba wan wərkun ta mɛrəŋ.
8Kɔ Rasɛl oloku: «Kanu kəmar im kəsiməs kɔ wɛŋc im wəran Leya, k'intam kɔ.» Kɔ Rasɛl ɔsɔŋ wan wəkakɔ tewe ta Naftali.
9Ntɛ Leya ɛnəŋk fɔ ɛsak kəkom mɔ, k'ɛlɛk wəcar kɔn Silpa k'ɔsɔŋ kɔ Yakuba pənɛŋcɛ.
10Kɔ Silpa wəcar ka Leya oŋkomɛ Yakuba wan wərkun.
11Kɔ Leya oloku fɔ: «Pəbotu pender!» Kɔ Leya ɔsɔŋ wan wəkakɔ tewe ta Kadu.
12Silpa wəcar ka Leya ɔŋgbɔkərɛ sɔ kəkomɛ Yakuba wan wərkun ta mɛrəŋ.
13Kɔ Leya oloku: «Mba pəmbɔt im! Ɛy, aran ŋande ŋac-kul' em oŋ fɔ pəmbɔt əm.» K'ɔsɔŋ wan kakɔ tewe ta Aser.
14Dɔsɔk dɔlɔma katɛla kənayi, kɔ Ruben ɔŋkɔ dalɛ. K'ɔŋkɔ pəsɔtɔ di yeri yokom yɔlɔma, k'ɛŋkɛrɛ yi iya kɔn Leya. Kɔ Rasɛl oloku Leya: «Ilɛtsɛn' am, məpoc' em yokom yɔlɔma nyɛ wan kam ɛŋkɛr' am mɔ.»
15Kɔ Leya oloku Rasɛl: «Pəntəŋnɛ f' am ntɛ məmbaŋər im wos im mɔ, mɛnɛ məsɔtɔ sɔ yeri ya wan kem?» Kɔ Rasɛl oloku Leya: «Awa! Ndaram ende mɔkɔ fəntərɛ, kəway ka yeri ya wan kam.»
16Dɔfɔy dendebəp, ntɛ Yakuba ɛyɛfɛ dalɛ mɔ, kɔ Leya ɔŋkɔ pəfaynɛ kɔ, k'oloku Yakuba: «Nnɔ nderem mənde mɔkɔ fəntərɛ, bawo kəsɔtɔ kam pibi pɔmɔkɔ, mɛnɛ ntɛ isəkpərɛ pi yeri yɔlɔma ya dalɛ nyɛ wan kem ɛŋkɛrɛna mɔ.» Kɔ Yakuba ŋafəntərɛ pibi papɔkɔ kɔ Leya.
17Kɔ Kanu kəmbaŋ Leya, k'ɛmbɛkəs. K'oŋkomɛ Yakuba wan wərkun wəka kəcamət.
18Kɔ Leya oloku: «Kanu kəsɔŋ im kəway kem. Ina nwɛ ilɛk wəcar kem wəran k'isɔŋ kɔ wos im mɔ.» Kɔ Leya ewe wan wəkakɔ Isakar.
19Kɔ Leya endesɔ pəbɛkəs, k'oŋkomɛ Yakuba sɔ wan wərkun wəka camət-tin.
20Kɔ Leya oloku: «Kanu Kəpɔŋ kəmpoc' em! Tantɛ taŋ, wos im endeyi tofo tin k'ina, bawo iŋkomɛ kɔ awut arkun camət-tin.» Kɔ Leya ewe wan wəkakɔ Sabulon.
21Kɔ Leya ɛmbɛkəs, k'oŋkom wan wəran nwɛ ɛnasɔŋ tewe ta Dina mɔ.
22Kɔ Kanu kənde kəcɛm-cɛmnɛ Rasɛl, kɔ kəmbaŋ kɔ kɔ kəsɔŋ kɔ dokombəra.
23Kɔ Rasɛl ende pəbɛkəs, k'oŋkom wan wərkun. K'oloku: «Kanu Kəpɔŋ kiliŋ im malap.»
24Kɔ Rasɛl ewe wan kɔn wəkakɔ Isifu, k'oloku: «Kanu Kəpɔŋ kəbɛrɛn' em sɔ wan wərkun wəlɔma!»
25Ntɛ Rasɛl oŋkom Isifu mɔ, kɔ Yakuba oloku Labaŋ: «Məsak im ilukus nnɔ nderem, ikɔ nde atɔf ŋem.
26Məsɔŋ im aran em k'awut em aŋɛ imbəc' am taŋan mɔ, ŋaŋɔ səndekɔ, bawo məna yati məŋcərɛ yɛbəc nyɛ imbəc' am mɔ.»
27Kɔ Labaŋ oloku Yakuba: «Ifaŋ fɔ məboŋcər im kəway nkɛ indesɔŋ əm mɔ. Canu cem cəmentər im a Kanu Kəpɔŋ kəmpoc' em tetam.
28Məboŋcər im kəway kam iŋsɔŋ əm ki.»
29Kɔ Yakuba oloku Labaŋ: «Məna yati, məŋcərɛ kɔ tɔkɔ imbəc' am mɔ, kɔ tɔkɔ isɔŋɛ kɔ yɔcɔl yam yeyi mɔ.
30Bawo yɔcɔl yepic yɔkɔ inabəp' am mɔ, yɛla oŋ ndɛkəl. Kɔ Kanu Kəpɔŋ kəmpoc' am kəlɛk dɔsɔk ndɛ imbɛrɛ kəlɔ kam mɔ, haŋ mɔkɔ. Ndɛkəl oŋ ake tɛm tɔ indebəcɛ afum em-ɛ?»
31Kɔ Labaŋ eyif kɔ: «Ak'indesɔŋ əm-ɛ?» Kɔ Yakuba oloku: «Məfɔdesɔŋ im daka o daka. Kɔ məwosɛ kəyɔ tɔkɔ indelok əm mɔ, indesɔkɛk yɔcɔl yam yɛfɛt-yɛfɛt, ibum' am sɔ yi.
32Mɔkɔ indecepər yɔcɔl yam yɛfɛt-yɛfɛt fəp dacɔ, mədekɔ-cəmbər ŋkesiya yɛtɛmsər kɔ yɛcɛmcɛmər fəp kəsək yɔyɔnɛ yɔpɔŋ, yɔyɔnɛ yɛfɛt, ŋkesiya nyɛ yɔyɔ lom yɛcapsər mɔ, kɔ cir ncɛ cəŋcɛmcɛmər, ncɛ cəntɛmsər mɔ. Yayɔkɔ yendeyɔnɛ kəway kem.
33Dolompu dem deŋmentər əm ti alna, kɔ məndekɔ-mɔmən kəway kem-ɛ. Mpɛ o mpɛ pɔ mənəŋk di alna cir dacɔ ta pɛntɛmsər, ta pɛŋcɛmcɛmər kɔ ŋkesiya dacɔ ta pɛŋcapsər alom mɔ, məcərɛ fɔ iŋkiyər əm pi.»
34Kɔ Labaŋ oloku Yakuba: «Awa! Iwosɛ toloku tam.»
35Awa, dɔsɔk dadɔkɔ dɔ, Labaŋ ɛŋcəmbər mbiyofo ya cəgbɛr, yɛcɛmcɛmər, cir cətɛmsər kɔ cəcɛmcɛmər cir ncɛ cənayɔ pəfer mɔ fəp, ŋkesiya yɔkɔ yɛnayɔ alom ŋɛcapsər mɔ. Kɔ Labaŋ ɛlɛk yi fəp, k'ɛmbɛr awut ɔn dəwaca.
36K'awut ɔn ŋambɔlɛnɛ yɔcɔl yayɔkɔ, kəkɔt ka mata maas kɔ Yakuba dacɔ nwɛ ɛŋc-kɛk sɔ yɔcɔl ya Labaŋ mɔ.
37Kɔ Yakuba ɛlɛk wara wɛcaŋk wa tɔk maas yeciyanɛ, k'ɛnaci wi pol ntɛ tɔŋsɔŋɛ pəfer pa kətɔk powur mɔ.
38Kɔ Yakuba ɔndɔfət wara wawɔkɔ ɛnanaci mɔ nde yɔcɔl yoŋcmun mɔ, ntɛ tɔŋsɔŋɛ yɛcnəŋk wara wawɔkɔ mɔ, tɔsɔŋɛ yorkun yɛc-cɛc yɛran kɔ yender dəkəmun-ɛ.
39Kɔ yɔcɔl yɛŋcɛcɛnɛ wara wawɔkɔ kəsək, ti tɛnasɔŋɛ yɔcɔl yockoməs mowut ma cəgbɛr, mɛtɛmsər kɔ mɛcɛmcɛmər.
40Ntɛ Yakuba ɛŋgbɛy meŋkesiya mɔ, kɛŋcəmbər yi fɔr ya yɔcɔl ya Labaŋ kiriŋ nyɛ yɛnayɔ cəgbɛr kɔ alom ŋɛcapsər mɔ, k'ɔsɔtɔ yɔcɔl nyɛ ɛnacəmbər taciŋa ta owosɛ yɔnɔŋkəlɛnɛ kɔ ya Labaŋ mɔ.
41Kəcɛc nkɛ o nkɛ yɔcɔl yetifi yorkun yɛcfaŋ kəcɛc yɛran mɔ, Yakuba ɛŋclɛk wara wɔn wɛnaci pəcəmbər wi yɔcɔl fɔr kiriŋ dəndo yoŋcmun mɔ, ntɛ tɔŋsɔŋɛ yɛtam kəcɛcɛnɛ, yɛcnəŋk wara wawɔkɔ mɔ.
42Kɔ Yakuba ɛnəŋk fɔ, pɔcɔl peleŋki pɛfaŋ kəcɛc-ɛ, ɔfɔdɔf fɛ pi kəra kɔn kənaci. Kɔ tende tɛləpəsər oŋ Yakuba kəyɔ yɔcɔl yetəfi kɔ Labaŋ ɔyɔ yeleŋki.
43Kɔ Yakuba ende pəyɔnɛ wəka daka wəpɔŋ. K'ɔyɔ yɔcɔl yɛfɛt-yɛfɛt yɛlarəm, acar arkun, acar aran, yɔkɔme kɔ sofale-e.
