1Kɔ Labaŋ ɛyɛfɛ bət-bət suy, k'oŋcup awut-sɔ ɔn arkun k'aran, k'ontolanɛ ŋa, k'osumpər dɔpɔ kəlukus ka nde ndɔrɔn.
2Kɔ Yakuba sɔ ɛŋcəmɛ dɔpɔ dɔn darəŋ, kɔ mɛlɛke a Kanu ŋaŋcɛpsɛ kɔ darəŋ.
3Yakuba endenəŋk mi, k'oloku: «Afan ŋa Kanu ŋɔ!» K'ɔsɔŋ tofo tatɔkɔ tewe ta Mahanayim.
4Yakuba pəyi tadarəŋ k'osom nda wɛŋc Esay nwɛ ɛnayi kulum ka Edɔm mɔ, atɔf ŋa Sehir.
5Kɔ Yakuba osom ŋa ntɛ: «Ntɛ tɔ nəŋkɔ-loku wɛŋc im Esay: ‹A wəcar kam Yakuba-ɛ, a iŋkɔ iwon nda Labaŋ haŋ,
6Iyɔ cəna, sɔfale, ŋkesiya, cir, acar arkun kɔ aran. Ti t' isom' am nnɔ wɛŋc im eyi mɔ, pəctam kəwosɛ ibɛrɛ.›»
7K'asom ŋaluksərnɛ nnɔ Yakuba eyi mɔ, kɔ ŋaloku kɔ: «Səŋkɔ nda wɛŋc əm Esay, nkɔn sɔ kəlompəsnɛ k'ɛndɛ kədebəp əm, kɔ afum 400.»
8K'abəkəc ŋɔtɔfəntərɛ Yakuba, kɔ kənesɛ kəsumpər kɔ. K'eyer afum akɔ ŋanasol mɔ cəgba mɛrəŋ, kəbəp ŋkesiya, cir, cəna haŋ yɔkɔmɛ.
9Kɔ Yakuba oloku: «Kɔ Esay ɛntam afum a kəgba kin-ɛ, a kɔ ŋaŋyɛksɛ.»
10Kɔ Yakuba oloku: «Kanu ka papa kem Abraham, Kanu ka papa kem Isiyaka, Kanu Kəpɔŋ nkɛ kəlok' im: ‹Məlukus atɔf ŋam nde aŋkom əm mɔ, indeyɔn' am pətɔt!›
11Ifɛtər layidi kɔ pətɔt mpɛ məŋkɛr' em mɔ, ina wəcar kam. Bawo ntɛ iŋc-cepər Yurdɛn yayɛ mɔ, togbo tem gbəcərəm t' inatɔmpər, ndɛkəl oŋ iyer afum em cəgba mɛrəŋ.
12Ilɛtsɛn' am məbaŋ im, wɛŋc im Esay dəwaca! Bawo iŋnesɛ ta pədesut im, kɔ iya ka awut em.
13Kɔ məna Kanu mənalok' im: ‹Indeyɔ əm pətɔt, indeyɔ afum am ŋala pəmɔ asəŋc ŋa dəkəba, nŋɛ antɔtam kəlɔm mɔ.›»
14Difɔ Yakuba ɛnacepərɛnɛ pibi. K'ɛyɛkyɛk daka dɔn dɔkɔ ɛnakɛrɛ mɔ dacɔ, kəkɔ-pocɛ wɛŋc Esay:
15Cir 200, mbiyofo wəco mɛrəŋ, ŋkesiya yɛran 200 kɔ yorkun wəco mɛrəŋ,
16kɔ yɔkɔmɛ yɛran 30 kɔ awut ayi akɔ yɛŋcmɛsər mɔ, cəna cəran 40, mura wəco, sofale səran wəco mɛrəŋ kɔ sərkun wəco.
17Kɔ Yakuba ɔsɔŋ yɔcɔl yayɔkɔ fəp fa yi kɔ dokom da yi acar ɔn, k'oloku ŋa: «Nəy' im kiriŋ, nəsolɛ yɔcɔl yayɛ dokom dokom, nəbɔlɛnɛ yi kɔ yɔkɔ.»
18K'osom wəcɔkɔ-cɔkɔ: «Kɔ nəŋkɔ-bəpɛnɛ kɔ wɛŋc im Esay a pəyif əm: ‹An' ɔ məyɔnɛ? Deke məŋkɔ-ɛ? An' ɔyɔ yɔcɔl yayɛ məsolɛ mɔ-ɛ?›
19Məloku kɔ: ‹Ya wəbɛ kam Yakuba yɔ, kəpocɛ kɔ nkɛ ɔsɔŋ im a ikenɛ wəbɛ kem Esay mɔ. Mba nkɔn ɔfɔ wəkɔ ender im tadarəŋ mɔ.›»
20K'osom sɔ kəsom kin kaŋkɔ, asolɛ yɔcɔl aka mɛrəŋ, aka maas kəbəp ka aləpəs akɔ ŋanayi tadarəŋ ŋasolɛ yɔcɔl mɔ: «Tatɔkɔ tɔ nəŋkɔ-loku wɛŋc im Esay, kɔ nəŋkɔ-bəpɛnɛ-ɛ.
21Nəloku kɔ: ‹Wɛŋc əm Yakuba ender su wəkɔ tadarəŋ.›» Bawo Yakuba ɛnaloku fɔ: «Kəpocɛ kaŋkɛ kəy' im kiriŋ mɔ, ik' iŋkɔ-tor-torɛnɛ kɔ abəkəc. A sədenəŋkɛnɛ fɔr disrɛ. Tɔlɔma endekɔ-selɛn' em bel-bel.»
22Kɔ yopocɛ yayɔkɔ yeyi kɔ kiriŋ, k'eŋcepərɛnɛ pibi papɔkɔ dəndo dəkulum.
23Kɔ Yakuba ɛyɛfɛ pibi papɔkɔ, k'ɛlɛk aran ɔn mɛrəŋ, amarəs aran ɔn mɛrəŋ k'awut ɔn wəco kɔ pin, k'ɛŋcalɛnɛ ŋa dəŋgbəl da Yabɔk.
24Ntɛ Yakuba ɛlɛk aran ɔn, k'ɛŋcalɛnɛ ŋa dəŋgbəl kɔ daka dɔkɔ ɛnayɔ mɔ fəp.
25Kɔ Yakuba eyi di sona. Pəndebiyɛ, kɔ fum wəlɔma ɛyɛfɛ kəsiməs kɔ Yakuba haŋ dɔsɔka.
26Ntɛ wəsiməsɛnɛ kɔn ɛnəŋk, eyi fɛ kətam kɔ mɔ, k'osut kɔ nnɔ dətɔkɔc. Kɔ tɔkɔc ta Yakuba towur pəcsiməs kɔ fum wəkakɔ.
27Kɔ fum wəkakɔ oloku: «Məsak im ikɔ, bawo pəyi kəyɔ panpan.» Kɔ Yakuba oloku kɔ: «Ifɔsak əm məkɔ ta məntolan' em-ɛ.»
28Kɔ fum wəkakɔ eyif Yakuba: «Cəke c' aŋw' am-ɛ?» Kɔ Yakuba oloku: «Yakuba y' aŋw' em.»
29Kɔ fum wəkakɔ oloku kɔ sɔ: «Yakuba yɔfɔsɔyɔnɛ tewe tam, Yisrayel ŋ' ande pac-w' am, bawo məsiməs kɔ Kanu kɔ afum, kɔ məntam ŋa.»
30Kɔ Yakuba eyif fum wəkakɔ: «Ilɛtsɛn' am məboŋcər im tewe tam.» Kɔ fum nwɛ eyif kɔ: «Ta ake tɔ məfaŋɛ kəcərɛnɛ tewe tem-ɛ?» Kɔ fum nwɛ ontolanɛ Yakuba dəndo.
31Kɔ Yakuba ɔsɔŋ tofo tatɔkɔ tewe ta Peniyɛl, bawo nkɔn olokunɛ: «Inəŋk Kanu səgbətnɛnɛ, k'intɔfi.»
32Dec dɛŋcpɛ a pəc-cepər Peniyɛl. Yakuba pəctorər tɔkɔc tɔn.
33Ti tɔsɔŋɛ ntɛ awut a Yisrayel ŋantɔsɔm abənta ŋa dətɔkɔc mɔ, bawo abənta ŋa dətɔkɔc ŋɔ Kanu kənasut Yakuba, nde kəbɛnt ka dəkəcək kɔ kəbɛnt ka dəkumunt yɛmbəpɛnɛ mɔ.
