1रेहोबाम शेकेमम लमाक्त। मारदे हना इस्राएली नेल्ल मेको कली पिप सेल्चा कली शेकेमम जाक्शो बाक्मा बाक्त।
2मिनु नेबात आ तौ येरोबामम मेको लोव़ नेनानु, इजीप्त उइ बाक्शो बाक्माक्त। मेको सोलोमन पिप क्येङा प्रोक्शा इजीप्त लशो बाक्माक्त। मिनु येरोबाम इजीप्त रागी रे लेम्माक्त।
3मिनु मुरपुकीम मेको कली ब्रेत्थ सोइक्तमे बाक्त। मिनु मेको नु इस्राएली नेल्ल रेहोबाम आ बाक्तीक जाक्शा, मेको कली
4“इन आफोम आंइ कली हेल्शो गेय पपाइश्शो बाक्त। मुल गे इन आफोम गेशो हेल्शो गेय इच्का सोपी पाइतीनी हना, गो इन कली गेय पाइनीकी” देंमा बाक्त।
5मिनु रेहोबामम “आं कली नाक्त सां सम्म मिम्चा गेयीनी। मिनु लेंशा जाक्कीन” दे सोइक्तीमी बाक्त। मोपतीके मुरपुकी लेश्शा लमा बाक्त।
6मिनु नोले पिप रेहोबामम आ आफ सोलोमन ब्रोंइशा बाक्मेनु, अर्ती गेब खाल्पापुकी नु अर्ती पुंइशा “एको मुर आन कली मार लोव़ लेत्तुमी? गे मार अर्ती गेनीनी?” दे हिल्लो पवा बाक्त।
7मिनु मेकोपुकीम “गे एको मुर आन कली शिशी पा रिम्शो लोव़ पाइतीनी हना, मेकोपुकी गेना हना यो इन गेय पाइब दुम्नीम” दे अर्ती गेमे बाक्त।
8तन्न मेकोमी मेको खाल्पा आन अर्ती मनेना बाक्त। मिनु आ नु कोल्शो ठिटा आन अर्ती पुंइशा
9“मेकोपुकीम आं आफोम आन कली गेशो हेल्शो गेय सोपी सेल्चा कली पुंइतेक्म। मिनु गो मेको आन कली मार लोव़ लेत्तुमी? गे मार अर्ती गेनीनी?” दे हिल्लो पवा बाक्त।
10मिनु मेको नु काथा कोल्शो ठिटापुकीम “इन आफोम आंइ कली हेल्शो गेय गेशो बाक्त। मुल मेको सोपी सेल्शा गेकी, दे पुंइब मुर आन कली ‘आं आइक्च ब्रेप्चो आं आफ आ क्रातो क्येङा ठेयब बाक्ब।
11आं आफोम इन कली हेल्शो गेय पपाइश्शो बाक्माक्त। तन्न मुल गो मेको क्येङा हेल्शो गेय पपाइक्नुङ। आं आफोम इन कली कोक्केम तुप्पाइश्शो बाक्माक्त। तन्न मुल गो इन कली बिच्छीम क्राइक्पाइक्नन्नी’ मतीन” दे अर्ती गेमे बाक्त।
12मिनु येरोबाम नु मेको मुर नेल्ल पिप रेहोबामम देंशो खोदेंशो पा नाक्त सां नोले रेहोबाम आ बाक्तीकेम जाक्मा बाक्त।
13मिनु पिपम मेको मुर आन कली मरिम्शो लोव़ पाइमी बाक्त। मारदे हना मेकोमी खाल्पा आन गेशो अर्ती मनेना बाक्त।
14मिनु मेको ठिटापुकीम गेशो अर्ती बिश्शा, मेको आन कली “आं आफोम इन कली हेल्शो गेय गेशो बाक्माक्त। तन्न मुल गो मेको क्येङा हेल्शो गेय गेनुङ। आं आफोम इन कली तुप्पाइश्शो बाक्माक्त। तन्न मुल गो इन कली बिच्छीम क्राइक्पाइक्नन्नी” दे माइक्मी बाक्त।
15मिनु पिपम मेको मुर आन लोव़ मनेना बाक्त। मारदे हना परमप्रभुमी शिलो ङा अहीयाह रे पा नेबात आ तौ येरोबाम आ पर्बम देंशो लोव़ खाप्चा कली परमप्रभु यावेम मोदेंशो पपाइश्शो बाक्माक्त। १राजा ११:२९-३१
16मिनु उत्तरम बाक्ब इस्राएलीपुकी नेल्लेमी “पिपम आंइ देंशो मबिप्ब” दे तुइक्तमे बाक्त। मिनु मेकोपुकीमी पिप कली “दाऊद नु आंइ के मार भाग बाक्बा ङा? येस्से आ तौ नु आंइ के मार बाक्बा ङा? गे इस्राएलीपुकी, आंम ताम्बुम लने। मुल दाऊद आ खिं ङा मुर, गे आंमा इन खिं कली कोव़ङीन” देंमा बाक्त। मोपतीके इस्राएली नेल्ल आन ताम्बुम लमा बाक्त।
17तन्न रेहोबामम यहूदा ङा सहरम बाक्ब इस्राएली आन कली सासन पा बाक्माक्त।
18मिनु पिप रेहोबाममी आ गेय पाइब आन कली कोव़ब हदोराम कली मुर आन बाक्तीकेम सोइक्ता बाक्त। तन्न इस्राएलीपुकीम मेको कली फुल्लु आप्शा सदमे बाक्त। मिनु पिप रीब पा दयु प्रेक्शा आ बग्गी ङोइश्शा, यरूसलेम लमाक्त।
19मिनु मेको नाक्ती रे मुल सम्म उत्तरम बाक्ब इस्राएलीपुकीम दाऊद आ खिं ङा मुरपुकी नु मदुथु, सासन पचा मगेशो बाक्नीम।
