2 Cronica 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Midhendiyà si Rehoboam te Shekem, su ziyà meburunburun is menge Israilihanen su ibpahayag dan is kedhimuwa zan kandin he hadì dan.

²Hein nezineg haazà ni Jeroboam he anak ni Nebat, ne midlikù sikandin diyà te Israel. (Su ziyà sikandin meke-ubpà te Ehipto, su mibpeleǥuyan din si Hadì Solomon.)

³Impetawag te menge Israilihanen si Jeroboam, ne pudu zan midhendiyà te ki Rehoboam ne ke sikandan te,

⁴“Meveǥat is mibpeveelan kenami te amey nu. Piru emun ebpekemehegkapen nu heini, ne ebpenilbi key kenikew.”

⁵Midtavak si Rehoboam te, “Beǥayi e zèpa keniyu te tetelu he andew te ked-isip-isip kayi, egkepasad haazà ne likù kew kayi te kedì.” Umbe mid-ulì haazà is menge etew.

⁶Nekid-ahà si Hadì Rehoboam te ebpemendumala he nemenilbi te amey zin he si Solomon hein uuyag pa sikandin. Mid-insà si Rehoboam diyà te kandan te, “Hengkey is igkesambag niw kedì he igketavak ku zuen te menge etew mehitenged te hangyù dan?”

⁷Midtavak sikandan te, “Emun ibpeehè nu kandan is keupiya nu kandan, ne igkeveǥey nu kandan is edhengyuen dan, ne ebpenilbi sikandan kenikew taman te taman.”

⁸Peru wazà pezumdumahi ni Rehoboam is sambag dan kandin, kekenà, iyan midhinguma zin is menge vetan-en he iring din te kengunguhezi he ebpenilbi kandin.

⁹Mid-insaan din sikandan te, “Hengkey is sambag niw kedì te idtavak ku te hangyù kedì dutun te menge etew? Iyan hangyù dan is pekehegkapa ku is meveǥat he mibpeveelan kandan te amey ku.”

¹⁰Midtavak haazà is menge vetan-en te, “Iyan heini itavak nu zutun te menge etew he midhangyù kenikew: Is tindezeisey ku ne zekelè pa te hawak te amey ku.

¹¹He ke và dà egkegiya, meveǥat pa is ibpetuman ku keniyu kenà is impetuman te amey ku. Emun midlagkut kew te amey ku te letigu, ne iyan idlagkut ku keniyu is iring te venayew he meǥarang he menge putew.”

¹²Midlavey is tetelu zutun he andew, ne midlikù dutun si Jeroboam wey is menge etew ziyà te ki Hadì Rehoboam, sumalà te migkaǥi te hadì kandan.

¹³Piru wazà pezumdumahi ni Rehoboam is menge sambag kandin dutun te menge ebpemendumala. Kekenà, midrengrengitan din dà haazà is menge etew

¹⁴sumalà te sambag kandin duen te menge vetan-en. Migkeǥiyan din sikandan te, “Meveǥat is impetuman te amey ku keniyu, piru meveǥat pa is ibpetuman ku keniyu. Emun midlagkut kew te amey ku te letigu, ne iyan idlagkut ku keniyu is iring te venayew he memeǥarang he putew.”

¹⁵Umbe wazà pemineǥa zutun te hadì is hangyù dutun te menge etew, su paaǥi te Megbevayà he iyan egketuman is migkaǥi zin diyà te ki Jeroboam he anak ni Nebat pinaaǥi ki Ahia he tig-Shilo.

¹⁶Hein neisip-isip te menge Israilihanen he wazè dan pemineǥa te hadì, ne migkeǥiyan dan is hadì te, “Wazè dey lavet kenikew te kevuwazan ni David! Belaǥad ka keniyan te ginhedian nu! Hengkayi kew en is menge Israilihanen, su ebpemen-ulì kiw!” Ne nemen-ulì is menge Israilihanen.

¹⁷Iyan dà is menge Israilihanen he menge meǥinged diyà te Juda pedayun is kedumelaha kandan ni Rehoboam.

¹⁸Ne impehendiyà ni Hadì Rehoboam te menge Israilihanen si Hadoram, kes edumala te menge etew he ebpeǥesen te kedterebahu. Piru mibpenuleng sikandin te vatu te menge Israilihanen taman te kebpatey zin. Ne migaanggaan med-untud si Hadì Rehoboam te kerwahi zin ne mibpelaǥuy pehendiyà te Jerusalem.

¹⁹Ne minsan guntaan edribildiyan te menge Israilihanen is menge kevuwazan ni David